Wörm

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

De piering of gewoene (rege)wörm (Lumbricus terrestris) huurt tot de Rinkwörm. Wie de mieste wörm zien dit Aajdmundege.

'nen Eikelwörm (soort oonbekind) op sterk water. Eikelwörm zien de insegste Nuimundege wörm.

Spadella cephaloptera is 'ne pielwörm en huurt neet bij de Aajd- of Nuimundege.

Veur de beek, zuug Worm.

---

Wörm zien twiezijeg symmetrische bieste mèt 'ne laankwerpege vörm zoonder inwendeg of oetwendeg gereemsel en zoonder lidmaote. De bieste die me allewijl wörm neump, hure tot diverse zier versjèllende stamme; ze zien dus polyfyletisch. Vreuger dach me dao aanders euver: Linnaeus naom in zie Systema Naturae 'n 'klas' Vermes op, boe heer alle oongewervelde mèt e weik lief touw rekende. In de loup vaan de negentienden iew is dit taxon losgelaote.

Wörm kinne in de zie, op 't land, in de groond of es endoparasiet in 't lief vaan 'ne gashier leve.

De ierste twiezijeg symmetrische bieste waore dinkelek 'n soort wörm. De mieste stamme oet dees gróp zien dat nog. Gróppe bieste die de naom 'wörm' drage zien de volgende (alle taxa zien stamme wienie neet aanders gezag):

Primitief Bilateria

• Pielwörm (Chaetognatha)

Aajdmundege (Protostomata)

• Egelwörm (Echiura)
• Floerwörm (Onychophora)
• Haokwörm (Acanthocephala)
• Hoofiezerwörm (Phoronida)
• Kelkwörm (Entoprocta)
• Peerdshaorwörm (Nematomorpha)
• Peniswörm (Priapulida)
• Pindawörm (Sipuncula)
• Platwörm (Platyhelminthes)
• Rinkwörm (Annelida)
• Roondwörm (Nematoda)
• Snoerwörm (Nemertea)
• Stekelwörm (Kinorhyncha)
• Tandmoondwörm (Gnathostomulida)

Nuimundege (Deuterostomata)

• Eikelwörm (Enteropneusta), klas oet de stam Hemichordata