Zurrik

Zurrik (Nederlands Soerendonk) is e dörpke in de gemeinte Kraonendónk, in de Nederlandse provincie Noord-Braobant. 't Dörp had in 2017 1.775 inwoeners. Zurrik ligk oongeveer tösse Buul (Budel) en Maares (Maarheeze) in. Zjus wie in die twie plaotse weurt hei e Limbörgs dialek gesproke.

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Buuls, es te dit dialek sjpriks.

---

Zurrik (Soerendonk) c.a. Gewaeze gemeinte in Nederlandj
Gevörmp	1810, 1821
Opgehaeve	1925
Opgegange in	Maares
Provincie	Noord-Braobant
Hoofplaats	Zurrik
Opperflaakde (bie opluffing)	33,42 km²
– daovan water:	km²
Inwoeners (kort veur opluffing)	1.229 (1920)[1]
– deechde:	36,4/km²
Lies van börgemeisters

Historie

Allewel tot Zurrik 't kleinste vaan de drei Kraonendoonkse dörper is, waor 't vreuger zjus 't veurnaomste. Hei waor naomelek 't kestiel Kraonendónk, de residentie vaan de gelieknaomege hierlekheid. Zurrik waor 'n hoeg hierlekheid, die aonvenkelek woersjijnelek sameveel mèt Kraonendónk. Later waor 't 'n hierlekheid nog weer binne Kraonendoonk, neve Buul en Maares. Nog versjèllende aander gebeedswisselinge höbbe plaotsgevoonde.^[2]

In 1810 woort de gemeinte Zurrik en Sterksel gevörmp. Heibij woorte Maares en Gastel, die tot daan oonder Zurrik vele, aofgesjeie. Gevolg daovaan waor tot de gemeinte oet twie losse deile bestoont: Zurrik in 't zuie, Sterksel in 't noorde, mèt de gemeinte Maares detösse. Dit veraanderde ouch neet wie in 1821 Gastel weer debij kaom en de gemeinte wijer góng es Zurrik, Sterksel en Gastel. Dees gemeinte bleef tot 1925 bestoon; toen kaom 't zuielek deil (Zurrik en Gastel) bij Maares en 't noordelek deil (Sterksel) bij Heeze en Leende. In 1997 kaom Zurrik mèt de res vaan Maares bij de gemeinte Buul, die al gaw woort umgeduip tot Kraonendónk.

Historische inwoenertalle

Jaor	Aontal	Greuj
1830	?	n.v.t.
1840	811[3]	n.b.
1849	916[4]	+12,9%
1859	873[5]	-4,7%
1869	868[6]	-0,6%
1879	923[7]	+6,3%
1889	976[8]	+5,7%
1899	962[9]	-1,4%
1909	965[10]	+0,3%
1920	1.229[1]	+27,4%

Opmerking

• Veur 1830 zien gein ciefers vaan de Noord-Braobantse plattelandgemeintes besjikbaar.

Rillatief oontwikkeling vaan 1840 tot en mèt 1920

(x₁₈₃₀=100)

Beziensweerdeghede

In en um Zurrik kin me 'n aontal monuminte vinde. 't Kestiel Kraonendónk is door de iewe heer diverse kiere aofgebroke en nui opgebouwd. 't Huieg 'kestiel' is feitelek 'ne kestielechtege villa (umtot de bouwer geinen edele waor). In 't dörp vint me de Kèrk Sint-Jans Oonthoofding, 'n negentienden-iewse waterstaotkèrk mèt 'n neoromaanse touwveuging oet de jaore daarteg. Wijer vint me in en um 't dörp diverse Kempische laankgevelboerderije. De umgeving bevat väöl sjoen natuur.

Waope

't Waope wat in 1818 woort touwgekind aon Zurrik en Sterksel liet ziech wie volg umsjrieve:

Vaan lazuur (blauw), mèt 'ne kroenekraan in natuurleke kleur.

Ouch nao de annexatie vaan Gastel is dit waope in gebruuk gebleve. De kroenekraan is sprekend veur de hierlekheid Kraonendónk, boe Zurrik de hoofplaots vaan waor.^[11] Natuurleke kleur op blauw is strik genome 'n breuk vaan de tinctuurregel.

Rifferenties

1. Volkstèlling 1920
2. Geschiedenis Cranendonck - Gebied Soerendonk
3. Volkstèlling 1840 - Noord-Braobant
4. Volkstèlling 1849
5. Volkstèlling 1859
6. Volkstèlling 1869
7. Volkstèlling 1879 - Noord-Braobant
8. Volkstèlling 1889 - Noord-Braobant
9. Volkstèlling 1899 - Noord-Braobant
10. Volkstèlling 1909
11. Heraldry of the World - Soerendonk, Sterksel en Gastel