From Wikipedia, the free encyclopedia
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
De Witte Zieë (Russisch: Белое море, Béloje Móre; Karelisch en Fins: Vienanmeri; Nenets: Сэрако ямʼ, Serako yam) is 'n randzieë van de Barentszzieë binne de Naordelike Ieszieë mit 'n oppervlakde van 90.000 km². De zieë leet ingeklemp tösse de schiereilande Kola (det deil oetmak van Lapland) en Kanin (in 't oeëste). De baojem van de zieë leet gemiddeld 60 maeter ónder de zieëspegel mit 'n maximum van 314 maeter. De verbinding tösse de Witte Zieë en de Barentszzieë is óndeep, waodoor de wateroetwisseling tösse beide zieë beperk is. 't Verschil tösse eb en vlood is dan ouk rilletief klein. Dit is gemiddeld maar eine maeter. In de bóchte kint 't verschil tösse hoeëg en lieëg water aevel oploupe tot tieën maeter. De saliniteit van de zieë ligk tösse de 27 en de 30‰. Dit is geliek aan 27 of 30 gram zalt per liter water, maar dao wao de revere oetmónde is 't zaltgehalte lieëger.
De Witte Zieë vreert gewoeënlik van oktoeëber wies mei toe. 't Ies is meistal zo'n 40 centimaeter dik, maar in kalde periodes kint dit oploupe tot 150 centimaeter.
In de zieë guuef 't robbe en 57 vissaorte. Vuulveurkómmende saote zien d'n hiering, kabbeljauw, zalm, forel en mossele.
De stad Archangelsk is 'n wiechtige haveplaats. Ander groeëte staej zien Severodvinsk, Belomorsk, Kandalaksja, Kem en Onega.