Unanimiteit
From Wikipedia, the free encyclopedia
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Unanimiteit, Einstömmegheid of Eingestömpheid (vaan 't Latien: unus en anima, ofwel "ein" en "weend/aosem/stöm") is e sociologisch en polletiek prinsiep boe-in alle deilnömmende dezelfde meining deile. In de polletiek hilt dat dus in tot ederein veur dezelfde optie stömp. 't Beveugelek naomwoord is unaniem of eingestömp.
Euveral boe 'ne gróp lui 'n gezaomde beslissing motte make speult unanimiteit 'ne rol. 't Kump evels neet dèks veur tot 't wèrkelek consensus gief (in aander wäörd, boe ederein 't mèt mekaar eins is). Wie groeter de gróp, wie minder consensus veur kump. In 'n situatie boe unanimiteit de vereiste oetkoms is hoof meh eine persoen get aanders te beslete um de dynamiek um te dreie. In vereiste unanimiteit heet edere mètstömmende deilnömmer dus e veto-rech.
In de praktiek weurt get meistes ouch es unanimiteit bestömpeld es alle aonwezege veur dezelfde optie gaon, wijl sommege bewös keze neet mèt te stömme. In zoe'n geval wille de aofwezege dèks de procedure neet tegehawwe mer wille ze oet eige euvertuiginge neet opelek hunne steun oete. Ouch weure blanco-stömme soms mètgetèld in unaniem stömminge.