![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/8/82/Worm-Roer.jpg/640px-Worm-Roer.jpg&w=640&q=50)
Roer (Maas)
From Wikipedia, the free encyclopedia
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
- Dit artikel geit euver de reveer die in de Maos oetmund. Veur de Pruusje reveer die in de Rien oetmund zuug Roer (Rien)
![Thumb image](http://upload.wikimedia.org/wikipedia/commons/thumb/8/82/Worm-Roer.jpg/640px-Worm-Roer.jpg)
![Thumb image](http://upload.wikimedia.org/wikipedia/commons/thumb/9/92/Rurtalsprerre.jpg/640px-Rurtalsprerre.jpg)
De Roer (Pruusj: Rur) is 'n rivier die euver 'n lingte van óngeveer 165 kilemaeter door drie lenj sjtruimp; Belsj, Pruses en Nederlandj. Same mit väöl anger sjtruimpkes óntsjprink de Roer op 't hoogste punt van Belsj, bie de Signal de Botrange in 't gehuch Sourbrodt in de gemeinde Waimes op de Hoge Vene. 't Is hiej Franstalig en de naam vanne rivier is hiej ouch (La) Roer, mèr 't waerd ouch waal gesjreve es Rour.
Bie Monschau sjtik ze de Pruusje grens euver en kump nao dees toeristische plaats oet biej de Rurtalsprerre, 't op ein nao grootste sjtuwmeer van 't landj. In noordelike richting sjtruimp ze wiejer door de Eifel nao de leger gelege industriegebiede van Düren en Jülich, wo de riviere de Inde en de Worm oetmonje inne Roer. (De Inde óntsjpringk ouch in de Eifel, de Worm biej Aoke en löp langse Nederlands Limburgse plaats Kirkraoj.)
In Pruusjes ligk ouch 'n rivier de Ruhr, wo 't Roergebeed haer vernump is. Dees Ruhr mót neet verward waere mitte Roer, al gebeurt det nag al te dök. (Rur).
Bie Vlórp bereik de rivier de Nederlandse grèns. Van hiejoet löp ze door de gemeinde Roerdale door de Roerstreek nao Remunj.
Väöl luuj meine det Remunj (Roermond in het Hollands) de beteikenis haet van mónjing van de Roer. Dit klop echter neet, ómdet de Maas ein paar hongerd jaor haer verlag is. Vreuger sjtruimde die namelik ein sjtök westeliker en de Roer sjtruimde dan ouch örges ten noorde van Remunj (biej Leeve) in de Maas, in 't landsjap vilt dit nog trök te zeen. De naam Remunj haet waal betrikking op Mundium (latien veur sjtad) aan de Roer. Dit klop ouch ómdet de sjtad ontsjtange is op 't 'boetenop', eine heuvel dae noe aafgegrave is in eine boch vanne Roer.
De Remunjse wiek Roer is verneump nao de reveer.