Pingstelnakel
From Wikipedia, the free encyclopedia
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Pingstelnakel, pinksternakel of pastinaak (Pastinaca sativa subsp. sativa) is 'n plantj oete sjermbloomsfemielje (Apiaceae). De plantj is e zoeaget 20 cm lank wortelgewasj mit 'ne zeuten, aniesechtige smaak en 'n kraemsige kluuer. Dore lingdje vanne paolroot is de greundje neet gesjik veur te waere verboedj op kleigrunj. De pingstelnakel wuuertj meistes gezejdj inne twieëdje helf van april. Bie ieëre zejje geit de plantj al in 't ieëste jaor bleuje. Tródsdet de pingstelnakel al inne zomer kan waere geougs wuuertj t'r meistes betrach es 'n wintjergreundje. Döks wach me mit roeaje toet 'n kaaj periood is gewaes, wovan me zaet det 't de smaak good duit. Ougste kan me de ganse wintjer door doon, ómdet de root neet kepót vruus inne gróndj.
De pingstelnakel kump ouch veur in 't wildj en bleutj es 'n twieëjäörige plantj van julie toet september mit 'nen 60 toet 90 lange stengel in e gaelsig sjerm. De 4 toet 8 mm lang en 3 toet 6 mm brei, leechbroen vröch is 'n dóbbel doepvröch. De wilje pingstelnakel kump in Nederlandj en op 't Belsj veur in waeggrave, uterwaerd, op dieken en ouch op aope plaatsen inne dune. Me vindj 'm dökker op plaatse wo brandjnetele greuje.