P.C. Hooftpries
From Wikipedia, the free encyclopedia
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![Thumb image](http://upload.wikimedia.org/wikipedia/commons/thumb/f/f0/PCHooft.gif/220px-PCHooft.gif)
De P.C. Hooftpries is 'ne Nederlandse literatuurpries dee in princiep edersjaor weurt oetgereik aon 'ne Nederlander ziech jaorelaank in de literatuur verdeenstelek heet gemaak. Heer weurt umstebeurt touwgekind veur verhaolend proza, besjouwend proza (neet-fictioneel tekste) en poëzie. De pries is in 1947 ingestèld t'r gedachtenis aon d'n dreihoonderste sterfdaag vaan P.C. Hooft, 'ne Nederlandse sjriever dee ziech op alle drei de vlaker verdeenstelek heet gemaak. Tot en mèt 1955 waor 't geinen oeuvrepries, meh kaom heer touw aon sjrievers vaan individueel meisterwerke. Vreuger gebeurde de oetreiking in 't Muiderslot in Muiden, boe P.C. Hooft dros waor; sinds 1988 deit me dat miestens in 't Lètterkundeg Museum in D'n Haag. Aon de pries zien 'ne penning en 'n premie verboonde.
Vlaominge en aander neet-Nederlanders koume neet in aonmerking veur de pries. Lui mèt de Nederlandse nationaliteit die in aander taole sjrieve zien wel verkeesbaar. Dit lèste is totnogtouw eine kier gebäörd, wie in 1991 de Afrikaanstaolege Elisabeth Eybers de penning kraog.
De P.C. Hooftpries is diverse kiere midde vaan controverse gewees. De ergste waor wie in 1984 staotssecretair Elco Brinkman weigerde um de pries aon Hugo Brandt Corstius oet te reike. Es gevolg daovaan is de pries toen drei jaor achterein neet vergeve, tot 'r in 1987 esnog nao Brandt Corstius góng.