![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/6/68/Joe_Biden_presidential_portrait.jpg/640px-Joe_Biden_presidential_portrait.jpg&w=640&q=50)
Joe Biden
From Wikipedia, the free encyclopedia
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![Thumb image](http://upload.wikimedia.org/wikipedia/commons/thumb/6/68/Joe_Biden_presidential_portrait.jpg/640px-Joe_Biden_presidential_portrait.jpg)
Joseph Robinette (Joe) Biden Jr. (Scranton, Pennsylvania, 20 november 1942) is 'nen Amerikaanse politicus. Sinds 20 jannewarie 2021 regeert heer 't land es de 46e president. Heer zit bij de Democratische Partij.
Biden greujde op in Scranton en in de umgeving vaan Wilmington (Delaware). Heer studeerde aon de universiteit vaan Delaware en aon de New Yorkse Syracuse University, boe heer in 1968 aofstudeerde in de rechte. Al in 1972 woort heer veur Delaware gekoze tot senateur; heer is nog ummer eine vaan de joonkste lui die dat amb lendelek bekleide. In de Senaot specialiseerde heer ziech in boetelands beleid; oetindelek brach 'r 't tot veurzitter vaan 't Comité veur Boetelandse Relaties. In 1988 deeg heer veur 't iers mèt aon de Democratische kandidaotsverkezing veur 't presidentsjap. Heer verloor die verkezing, en ouch in 2008 lökden 't 'm neet veur de nominatie te behole. Heer sloot ziech toen es kandidaot-vice-president aon bij Barack Obama, dee daonao de verkezinge won. Vaan 2009 tot 2017 waor Biden zoedoende vice-president vaan de Vereinegde Staote.
Nao aofluip vaan zien twiede termijn góng Biden trök de Senaot in. Bij de veurverkezinge vaan 2020 stèlde heer ziech evels weer kandidaot. Heer waor al vreug favoriet veur de nominatie, zoetot zien opponente (oonder wee Bernie Sanders) veurtijeg opgaove. Es running mate koos heer Kamala Harris. In november vaan dat jaor won heer de presidentsverkezinge vaan Donald Trump. In 2024 stèlde heer ziech same mèt ziene rivaal Trump obbenuits kandidaat veur de prizzedentsverkezinge. Biden trok ziech evels in juli dat jaor trök umtot 't twiefels goof euver zien gezoondheid in combinatie mèt ziene hoege leeftied.