Ислам

Ислам (аьрабнал маз لإسلام‎‎‎‎ , al-Islām, «вихшал шаву») ягу Бусурманнал дин — Аллагь цари тӀисса дин, дунияллий цайминнущал аьрхӀал яла чӀяруну кьамул дурсса дин.

Thumb — Дурсса чичру **Аллагь** Аьрабнал мазрай.

Лакрал буттахъал дин. МухӀаммад Аллагьнал идавсри ва Мунал илчири цинявппагу инсантурачӀан тӀисса. Ислам щаллу дуллайминнайн учайссар бусурман куну (< аьрабнал маз مسلمون муслимуна, «вихшал хьусса»).

Гьанусса яла чанми буржру, хIакьсса бусурманчувнал чара бакъа биттур бан аьркинсса.

Ислам — биттур баву Аллагьнал биттур бан ккаккан бувмур ва уруччаву Аллагьнал уруччин ккаккан бувмуния. Исламрал дуссар ххюра ттарцӀ. Мигу хъанахъиссар бусурмачувнал яла агьамсса, яла гьанусса буржруну.

Аллагьнал луттирду

Исламрал лу — Кьуран. Му бакъа Аллагьнал гьан бувсса ккалли байссар Тора (Таврат), Псалтырь (Забур) ва Евангелие (Инжил). Мунияту жугьутӀигу кашишталгу Аллагьнайн бакъа цайми затиттайн икрам буллайминнавх ккалли къабайссарча, а байссар ккалли «Луттирал агьлукунма».

Исламрал шурутӀру

чак

МухӀаммад-идавслул куну бур ислам дарцӀуну дуссар ххюра зарай:

Шагьадат (الشهادة) (мазралгу дакӀнилгу кьамул даву): акъассар цучӀав икрам банма, ца Аллагь личӀаннин (Ля иляhа илля Ллаhу) ва МухӀаммад Мунал гьан увсса идавсри [щалавагу инсантурал агьлулучӀан] (ва Мухаммадун расуль уль-Ллаhи);
Салат (صلاة‎) — чак;
Савм (صوم‎‎‎‎‎‎) — зума дугьаву Рамазан-зурив;
Закят (زكاة‎) — закат; мисккинминнан хъус дачӀаву;
Хадж (حج‎) — хIаж; каши духьурча, Маккалийн хӀажлийн лагаву.

Иман, шивун духлай дуссар:

Вих шаву Аллагь ца ушив (таухид);
Вих шаву малаиктал бушив;
Вих шаву Аллагьнал луттирдайн;
Вих шаву идавстурайн ва илчитурайн;
Вих шаву кьияматсса кьини дучӀаншив;
Вих шаву гьарца затрайт Аллагьнал кьадар душив.
Вих шаву ивчӀайххту кӀилчинмур оьрмугу бикӀаншив.

Исламравсса низамру

Исламрал цинярдарагу низамирттайн учайссар шариаьт куну, ва ми дуссар дарцӀуну Кьурандалий, МухӀаммад-идавсил сунналий ва цинявппагу бусурманнал аьлимтал бавцӀумуний (иджма).

Инсантурал тӀуллу ххюра журалул дикӀайссар: хӀарам (къабучӀимур), карагьат (къахъинмур), мубах (бучӀимур), мандуб (хъинмур) ва фард (чара бакъамур).

Исламравсса къяртри

СуннитӀтал
ШиитӀтал

Исламрал элмурду

ЛитератӀура: Исламрал гьану

Ислам дарцӀусса луттирду:

1. Аллагьнал лу — Кьуран;
2. МухӀаммад-идавслул сунна (ссалам мунан ва Аллагьнайту ссалават), хавардайну бусласисса цимивагу луттирдаву. Ми луттирдавату яла кӀулми:

а) «Аль-Джами ас-Сахих» (тӀайласса хӀадисру цачӀун бувсса лу) имам Бухарийнал,
б) «Аль-Джами ас-Сахих» (тӀайласса хӀадисру цачӀун бувсса лу) имам Муслимлул,
в) «Китаб ас-Сунан» (суннатрал лу) имам Абу Давудлул,
г) «Китаб ас-Сунан» (суннатрал лу) имам ибн Маджилул,
д) «Аль-Джами аль-Кабир» (хъунмасса хӀадисру цӀачӀун бувсса лу) имам ат-Тирмизилул,
е) «Китаб ас-Сунан аль-Кубра» (суннатрал хъунмасса лу) имам Насаилул.