Globaliséierung

D'Wuert Globaliséierung entsprécht dem eegene franséischen Ausdrock Mondialisation a gouf eréischt zanter den 1990er Joren zu engem Begrëff. Dorënner versteet een déi international Verflechtung a ville Beräicher, haaptsächlech, mä net nëmmen, an der Wirtschaftspolitik, der Léier iwwer d'Gesellschaft (Soziologie), der Kommunikatiounstechnik an a Verbindung mat der Ëmweltproblematik. Mat där internationaler Verflechtung, déi ëmmer méi grouss gëtt, stelle sech der Wëssenschaft nei Ufuerderunge bei ville Problemer, déi net méi eleng op lokalem oder nationalem Niveau gesinn oder geléist kënne ginn.

Begrëff a Bedeitungen

De Begrëff Globaliséierung gouf fir d'éischt an de Sozialwëssenschafte gebraucht an ass 1961 ënner der englescher Bezeechnung Globalization eng éischt Kéier an engem engleschsproochege Lexikon kommentéiert ginn.

Wat d'Wirtschaftspolitik betrëfft, do huet den Theodore Levitt (1925-2006), een däitschen Emigrant a fréiere Professer vun der Harvard Business School 1983 mat sengem Artikel "The Globalization of Markets" an der Harvard Business Review de Begrëff vun der Globaliséierung ëmrass. Dëse wirtschaftspolitesche Begrëff ass du vun 1990 un an d'öffentlech Debatt gehäit ginn.

Den Ausdrock Mondialiséierung, dee vum franséischen Ausdrock mondialisation ofgeleet ass, huet eng änlech wann och keng identesch Bedeitung. Hie leet méi d'Schwéiergewiicht op d'Entnationliséierung vun de verschiddene Phenomeener an op den Zoustännegkeetsverloscht vun de Nationalstaaten.

Globaliséierung vun der Wirtschaft

D'Ursaachen

Besonnesch an der Wirtschaft fënnt haut e Globaliséierungsprozess statt, dee sech zanter dem Enn vum Zweete Weltkrich staark acceleréiert huet. Dat huet verschidden Ursaachen:

• Bei den Entreprisë mécht sech d'Noutwendegkeet bemierkbar, fir hir Produktiounen auszebauen an doduerch Käschten ze spueren (engl: large scale economies)
• D'Wirtschaftsraim hunn hiren nationale Charakter verluer an hu sech iwwer d'Grenze vun de Nationalstaten ausgebreet.
• An Europa zum Beispill ass e grousse Maart ënner der Form vun der Europäescher Unioun entstanen, deen op Prinzipien opgebaut ass, déi de Globaliséierungstrend onweigerlech verstäerken:
  • Fräie Persouneverkéier
  • Fräie Wuerenaustausch
  • Fräie Verkéier vun den Dengschtleeschtungen
  • Harmonisatioun vun de Wettbewerbsbedingungen an Ofschafe vun allen Diskriminatiounen, an domat Verschäerfung vun der internationaler Konkurrenz
  • Liberalisatioun vun de Kapitalmouvementer

D'Konsequenzen

• Verlagerung vun der Produktioun vu groussen Entreprisen a multinational Gesellschaften no Länner mat méi déiwe Käschten a besonnesch no Länner mat niddrege Léin
• Den Undeel vun de Beneficer aus dem internationale Geschäft an och d'Profiter, absolut gesinn, hunn Tendez ze klammen, wärend an den traditionellen Industrielänner mat héije Léin, sech en Drock dorop bemierkbar mécht.

Literatur

• Ulrich Beck: Was ist Globalisierung? ISBN 3-51840-944-1
• Jagdish Bhagwati: In Defense of Globalization. Oxford University Press, Oxford 2004, ISBN 0195170253
• Jacques Brasseul: Un monde meilleur?: Pour une nouvelle approche de la mondialisation. Armand Colin, Paris 2005, ISBN 2200265751
• Daniel Cohen: La mondialisation et ses ennemis. Grasset, Paris 2004
• Claus-Heinrich Daub: Globale Wirtschaft - globale Verantwortung. Basel 2005, ISBN 3-906129-23-3
• Fair Future - Ein Report des Wuppertal Instituts. Begrenzte Ressourcen und globale Gerechtigkeit. Verlag C. H. Beck, München 2005,
• Jacques Fontanel: La globalisation en "analyse" - Géoéconomie et stratégie des acteurs. L'Harmattan, 2005, ISBN 3-406-52788-4
• Tausch, Arno, Globalisierung und die Zukunft der Eu-2020-Strategie (Globalization and the Future of the EU-2020 Strategy) (November 1, 2011). Available at SSRN: http://ssrn.com/abstract=1998081 or http://dx.doi.org/10.2139/ssrn.1998081
• Thomas L. Friedman: Globalisierung verstehen. Zwischen Marktplatz und Weltmarkt. ISBN 3612267957

Um Spaweck

Commons: Globaliséierung – Biller, Videoen oder Audiodateien