![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/0/0e/P%25C3%25B6ttering%252C_Hans-Gert-9757.jpg/640px-P%25C3%25B6ttering%252C_Hans-Gert-9757.jpg&w=640&q=50)
Hans-Gert Pöttering
däitsche Politiker / From Wikipedia, the free encyclopedia
Den Hans-Gert Pöttering, gebuer de 15. September 1945 zu Bersenbrück an Niedersachsen, ass en däitsche Politiker (CDU). Hie war vu Januar 2007 bis Juni 2009 President vum Europaparlament. Hien ass zanter der éischter Direktwal 1979 Member vum Europaparlament a war vun 1999 bis 2007 Fraktiounschef vun der EVP-ED. Bei der Wal zum Europaparlament 2004 war hie Spëtzekandidat vun der däitscher CDU. Opgrond vun enger Ofmachung mat der sozialistischer Fraktioun huet hien de Josep Borrell an der zweeter Hallschent vun der Legislaturperiod, vum 16. Januar 2007 un, als Parlamentspresident ofgeléist. Den Hans-Gert Pöttering ass ee vun de sechs Europadeputéierten déi dem Europaparlament zanter der éischter Direktwal am Joer 1979 ouni Ënnerbriechung ugehéieren.
Hans-Gert Pöttering | |
---|---|
![]() | |
Gebuer | 15. September 1945 |
Nationalitéit | Däitschland |
Educatioun |
Universitéit Bonn, Columbia University, Universitéit vu Genf |
Aktivitéit | Politiker, Universitéitsprofesser |
Partei | CDU |
![]() |
Den Hans-Gert Pöttering war vun 1997 bis 1999 President vun der iwwerparteilecher Europa-Union Däitschland. Hien ass Member vum CDU-Presidium a Comiteesmember vun der Konrad-Adenauer-Stiftung. E wunnt zu Bad Iburg bei Osnabrück, ass kathoulesch an huet zwéi Jongen.
Als Europadeputéierten an als President vun der EVP-ED-Fraktioun hat den Hans-Gert Pöttering ëmmer eng enk Bezéiung zu Lëtzebuerg. Dofir huet hien och den 18. Januar 2007 säin éischten Auslandsbesuch a senger neier Funktioun op Lëtzebuerg gemaach. Net ze vergiessen, datt hien den 22. Juni 2005 am Europaparlament zu Bréissel, a Presenz vum Premierminister Jean-Claude Juncker, de Bäitrag vun der Lëtzebuerger Presidence mat Luef ervirgestrach hat.