Канберра

Канберра — Австралиянын борбору (1927-жылдан) шаар.

Австралиянын түштүк-чыгышында, дөңсөөлүү түздүктө, деңиз деңгээлинен 600 м бийикте, Берли-Гриффин жасалма көлүнүн жээгинде жайгашкан. Калкы 329,2 миң (2008). Канберра шаар айланасы мн өз алдынча административдик бирдикти түзөт. Өлкөнүн илимий, ишкер жана маданий борбору. Темир жол аркылуу Сидней шаары менен туташат. Шаар америкалык архитектор У. Б. жана М. М. Гриффиндердин долбоору боюнча (эл аралык конкурста жеңген) 1913-жылдан курула баштаган. Эл аралык аэропорту бар. Шаардын экономикасынын негизин тейлөө чөйрөсү түзөт. Коомдук, мамлекеттик жана саясий уюмдардын штаб-квартиралары, улуттук ири банктардын өкүлчүлүктөрү жайгашкан. Тамак-аш, жеңил, полиграфия өнөр жай ишканалары иштейт. ИА, Улуттук CSIRO агентчилигинин штаб-квартирасы, Австралия аборигендерин жана Торрес кысыгындагы аралдардын жашоочуларын изилдөөчү институт, университеттер, китепканалар, улуттук галерея, илим жана техника улуттук борбору, музейлер (анын ичинен динозаврлар), театрлар (анын ичинен опера), Австралия аскер мемориалы жана башка бар. Бардык курулуштары неоклассика стилинде салынып, 11—12 кабаттуу үйлөрдү курууга тыюу салынган. Ботаникалык бак, зоопарк жана аквариум уюштурулган. Жыл сайын улуттук фольклор жана гүлдөр фестивалдары өткөрүлүп турат.

Колдонулган адабияттар

“Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9