Kernewegor hag ilewydh o Brian Webb. (8 Hwevror 1941 – 27 Du 1986)
Genys veu Brian Webb yn 1941 yn Stret Pydar, Truru, mab dhe Ernest H Webb (1911-1975), glanheor fenestri, ha Maud Duff (1913-1985). Avel wardhegor, ev a formyas bagas 'skiffle' gans nebes kowetha ha kana yn lies tyller yn Kernow. Wosa gasa Skol Ramasek Aberfala ev a omjunyas an Servis Civil hag yn 1965 mos dhe driga yn Bristol le may teuth ha bos rann a'n bys kana gwerin y'n cita na. Hag ev yn Bristol ev a vetyas ha demedhi y gynsa wreg, Carole Edna Bird, yn 1970. Wosa dehweles dhe Gernow, ev a avonsyas dhe vos dyghtyer sodhva gober dilavur Aberfala.
Ev a dhallathas dyski Kernewek y’n 1970ow ynwedh hag yn skon dos ha bos pur freth, owth oberi a-barth yeth a gonisogeth Kernow heb lett. Ev a veu berdhys gans Gorsedh Kernow yn 1978 gans an hanow bardhek Brythennek hag esel o a Gonsel an Orsedh ha Gwithyas an Myghternolyon a-dhia 1982.
Brian Webb o den jolif, bras y golon ha leun a hwarth. Meur o y hanow y’n 1980ow rag bos kaner gallosek ha didhanus. Ev a skrifas meur a ganow yn Kernewek ha Sowsnek, gans nebes anedha kuntellys avel cidi gelwys ‘Brythennek’ wosa y vernans ha dyllys yn 2006. Konsidrys yw nebes a'y ganow kepar ha Tan y'n Golon ha Farwel genes Wella avel klassygyon lemmyn. Komprehendys veu Tan y'n golonn war an blasenn Keltia Rok, ha usys veu Farwel genes Wella y'n dowlen bellwolok How to be Celtic yn 1983. An tir yw ow bro yw versyon ganso a'n klassek This land is your land gans Woody Guthrie.
Den diwysyk o ynwedh a-barth an yeth. Ev o skrifennyas Kowethas an Yeth Kernewek a'n fondyans yn 1979 bys yn y vernans. Hembrenkyas krev yn hwarvosow an yeth ova. Ev a skrifas meur rag paper termyn An Gannas, keffrys ha lyvrynnow ha daffar rag dyskoryon.
Wosa mernans y wreg gynsa, Edna, yn 1983, yn 1985 ev a dhemedhis Loveday Jenkin, myrgh Bardh Meur Kernow, Richard Jenkin, yn gonis Kernewek y yeth yn pluw Egloskrewen. Yn skon wosa kavos avonsyans dhe vos dyghtyer sodhva gober dilavur Truru, ev a gavas shora kolon. Wosa nebes misyow, ev a dhehwelas dhe’y ober, mes seythennow awosa, ev a verwis war gors yn Bristol yn mis Du, 1986.
Rol a lyvrow
- Kemysk Sen Perran (1981) Dyller - Koweth an Yeth Kernewek, dastyllys (1982) Dyller - Dyllansow Truran
- An Anwan ha'n Gurun (1981) Dyller – Kowethas an Yeth Kernewek, - Kernewek Unys, dastyllys (1994), - Kernewek Kemmyn
- Dornlyver Ydhyn (1984) Dyller - Kowethas an Yeth Kernewek
- Dres an Vledhen (1985) (lyver ha sonskrif) Dyller - Kowethas an Yeth Kernewek
- Hen Mewek (1993) Dyller - Kowethas an Yeth Kernewek - Kernewek Kemmyn
- Ydhyn (lyver liwa rag fleghes) (2006) Dyller - Kowethas an Yeth Kernewek
Rol a ganow war an cidi 'Brythennek'
- Ow avon splann
- Pasty Song
- An tir yw ow bro
- Talking emmet blues
- Daskorr
- If it wasn’t for the Cornish
- Farwel genes Wella
- George the Magic Chough
- Frutys ha bleujennow
- Deck of cards
- Yth esov vy lemmyn spyrys yn-dan dhor
- St Michaels
- Goslowyn orth nowodhow trist
- We don’ sell pasties
- Warnas mutations
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
