Park Kenedhlek
From Wikipedia, the free encyclopedia
Park Kenedhlek yw ranndir apoyntys gan governans dhe witha tirwedh naturel po gwrys gans den. An park kynsa o Yellowstone y'n Statys Unys yn 1872.
An parkow kenedhlek kynsa y'n Statys Unys o ranndiryow gwylvos. Mes nyns esa gwylvos yn Breten Veur. Yn neb fordh, erbynn an 1930ow yth esa moy ha moy a bobel ow kara hedhas dhe'n powdir. Yn 1931 kessedhek an governans a brofyas dewis ranndiryow rag gul parkow kenedhlek, mes etholans 1931 a lettyas displegyansow pella. Wortiwedh governans an Parti Lavur a dhewisas ranndiryow yn 1947, ow passya akt an senedh yn 1949. Park kenedhlek kynsa Breten Veur o Ranndir an Bleynyow yn mis Ebrel 1951. Erbynn lemmyn yma 15 park kenedhlek yn Pow Sows, Kembra hag Alban. Nyns eus onan vytholl yn Wordhen Gledh. Kost Kernow a veu konsidrys rag bos park kenedhlek, mes ervirys veu dh'y apoyntya avel Ranndir a Dekter Naturek a Vri, hemm yw, apoyntyans hevelep mes heb gallasow towlennans.