Remove ads
Шаблон:Серпасыс абу
| Колегов Егор Васильевич | |
| Чужан лун: |
1895-ӧд вося косму тӧлысь 21-ӧд лун |
|---|---|
| Чужанін: |
|
| Кулан кад: |
1937-ӧд вося йирым тӧлысь 19-ӧд лун (42 арӧс) |
| Куланін: | |
| Мыйся уджыс: | |
Ёгор Колегов чужӧма 1895-ӧд вося косму тӧлысь 21-ӧд лунӧ Вӧлӧгда губерняысь Усть-Сысольск уездса (ӧні Сыктывдін районса) Ыб вӧлӧсьтын гӧль кресьтянин семьяын. Батьыс — Василий Архипович, мамыс — Соломония Александровна. Семьяас вӧлӧма квайт челядь: Константин, Иван, Ольга, Татьяна, Ида. Ёгор вӧлӧма медыджыдӧн.[1]
1909 воын помалӧма Ыбса начальнӧй земскӧй училишӧ бур баллъясӧн. 1909–1912 воясын уджалӧма отсасьысьӧн Павел Савельевич Колегов дядь ордас, коді вӧлӧма вӧлӧсьтса писарӧн. 1912 воын Усть-Сысольск карын босьтчӧма уджавны земскӧй начальникса письмоводительлӧн отсасьысьӧн, а сідзжӧ землеустройство кузя делопроизводительӧн. Медасьлӧма уджавны Дырнӧсса кирпич вӧчан кустарнӧй заводӧ сёй талявны, грузчикалӧма карса пристаньын, тэчлӧма пачьяс.
1914 воын бура уджалӧмысь Ёгорӧс мӧдӧдӧны Маджаӧ вӧлӧсьтса писарӧн. Тані сійӧ гӧтрасьӧ Анна Артемьевна Елфимова вылӧ, коді 1917 вося косму тӧлысь 3 (16) лунӧ чужтӧма Елизавета нылӧс. 1917 вося ода-кора тӧлысь 1-ӧд лунӧ овмӧдчӧмаӧсь семьянас Зеленечӧ (ӧні Сыктывдін районса Зеленеч сикт), олӧмаӧсь 1919 воӧдз.
1919 вося тӧвшӧр тӧлысь 1 лунсягь 1919 вося кӧч тӧлысьӧдз служитӧма Краснӧй армияын, сэсся комиссуйтӧмаӧсь. 1919 вося кӧч тӧлысьсянь служба бӧрын Е.Колегов семьянас локтӧма Ыбӧ, босьтчӧма писаравны. 1920 вося ӧшым тӧлысьсянь семьянас Егор Колегов вуджӧма овны Усть-Сысольскӧ. Гӧтырыслӧн батьыс, Сергей Степанович, тшӧктӧма керка кыпӧдны да отсалӧма. Ӧні тайӧ керкаыс сулалӧ Киров улича вылын (57 №-а керка).
1920-ӧд воясӧ Ёгор Колегов вӧлӧма Коми (Зыряна) асвеськӧдлан обласьтын Вылыс Ёрдса веськӧдлысьӧн. 1920-ӧд вояс помын — 1930-ӧд вояс пансигӧн сійӧ уджалӧма зырянизация нуӧдӧм кузя инструкторӧн. 1933–1934 воясын уджалӧма Коми небӧг лэдзанінын литературнӧй сотрудникӧн.
1930-ӧд воясӧ Егор Колегов мӧдысь гӧтрасьӧма Визябӧж сиктса Анна Алексеевна Старцева вылӧ, 1933 воын чужӧма Социалина ныв. Олӧмыс абу ладмӧма, и Егор бӧр бергӧдчӧма медводдза гӧтыр дорас. Чорыда висьмӧм бӧрын овмӧдчӧма чужан сиктас.
Кулӧма 1937 вося йирым тӧлысь 19-ӧд лунӧ Сыктывдін районса Ыб сиктын. Дзебӧма Ыб улӧ пырысь Шорйыв грездса шойнаын.
Remove ads
Водз босьтчӧма гижны кывбуръяс. Но найӧс вӧлі йӧзӧдӧма сӧмын Октябрса революция бӧрын, кор лоӧма нарсудын секретарӧн. 1921 восянь сійӧ йӧзӧдчӧ «Удж», а сэсся «Югыд туй» газетъясын да «Ордым» журналын. Ёнджыкасӧ тайӧ политическӧй да антирелигиознӧй темаа кывбуръяс. 1921 вося косму тӧлысь 7-ӧд лунӧ «Удж» газетын петӧ «Коми му босьтчас» кывбур.
1925—1927 воясӧ Егор Колегов гижӧма челядьлы лыддьӧм вылӧ «Шор», «Ичӧтдырся олӧм», «Посни челядьлы сьыланкыв», «Йи чойӧд ислалӧм» кывбуръяс да мукӧд.
Ёнджыкасӧ гижӧма серамбана нырвизьын. Гижлӧма фельетонъяс: «Ловъя гира» (1933), висьтъяс. Босьтчылӧма гижны пьеса, но абу помалӧма. Зэв паськыда нимавлӧма сылӧн «Пӧсь пывсян» кывбур, кӧні шмонитӧмпырысь серпасалӧма сиктса нывбабаясӧс да налысь сёрнисӧ.
Коми небӧг лэдзанінын уджалігӧн Егор Колегов мӧвпалӧма йӧзӧдны аслас бӧрйӧм гижӧдъяслысь сборник. Ставнас сылӧн матӧ 100 кывбур да фельетон, но ни ӧти торъя небӧг олӧм дырйиыс эз петавлы. Медводдза асшӧр небӧгыс петӧма 2010 воын.
Вуджӧдлӧма А.П. Чеховлысь, В.В. Маяковскийлысь, Д. Бедныйлысь, М.А. Светловлысь да мукӧдлысь гижӧдъяссӧ. Комиӧдлӧма роч сьыланкывъяс. Вӧлі ёна тӧдӧны сылысь сэтшӧм сьыланкывъяс, кыдзи «Ылын-ылын роч Кавказын», «Колльӧдӧм».
Егор Колеговлӧн гуся нимъясыс — Василей Ёгор, Сизь.
Remove ads
- Колегов Егор
- Кузнецова Т.Л. Егор Колеговлӧн серамбана гижӧдъяс // Известия Общества изучения Коми края: научно-популярный краеведческий журнал. — Сыктывкар, 2010. — Вып. 13. — С. 64-69.
- Сьӧлӧмын и лолын: материалы II районных Колеговских чтений (24 октября 2013 года) / МБУК «Сыктывдинская ЦБС», Центральная библиотека; сост. Л.Н. Муравьёва. — Выльгорт, 2014. — 47 с.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
Remove ads