Rösrod

Dä Lemma-Titel he es jeschrieve un bochstabeet en de Sproch vum Oot.

Hee die Sigg es op Kölsch
(mih kölsche Sigge)
un jeschrevve wie beim Wrede oder bei der Akademie för uns kölsche Sproch
(mih Sigge jeschrevve wie beim Wrede oder bei der Akademie för uns kölsche Sproch)

Schablon:Clear

Mih Aanjahbe Wappe, Kaat ...

Wappe	Kaat

Üvversich
Bundesland:	Noordrhing-Wääßfaale
Rejierungsbezirk:	Kölle
Landkreis:	Rheinisch-Berjischer Kreis
Wie jrooß es dat?	38,8 km²
Wievill Lück wonne do?	27.102 (31. Dezember 2009)
Lück pro Kwadraatkilometer:	698 Minsche pro km²
Wie huh litt dat?	71–260 m ü. NN
Postleitzahl:	51503
Telefonvüürwahl:	02205
Wo es dat jenau?	50 54' n. Br., 7 11' ö. L.
Autokennzeeche:	`GL`
Jemeijndeschlüssel:	05 3 78 028
Veedel:	4 Veedel
Ripuarische Dialäkk:	Kölsch
Adreß vun de Stadtverwaltung:	Hauptstr. 229 51503 Rösrath
Offizielle Websigg:	www.roesrath.de
Politik
Bürjermeister:	Marcus Mombauer (CDU) zick 2008

Zohmaache

Rösrod (amplisch: Rösrath) es e Städtche tirektemang nevve Kölle. Et litt esu öm die fuffzehn Kilometer südösslich vum Dom op de Schäl Sick.

Jeografie

Wat fingk mer do?

Halv Rösrod es ene jruuße Bösch. Em Köönichsfors un en de Waaner Heed kammer et sunndaachs un de Woch üvver wandere, loofe, mem Rädche fahre un sujar rigge. Nor Pilze plöcke es em Naturschutzjebiet verbodde. Dr hüchste Berch es dä Lüderich. 260 Meter jeiht et do erop. Fröher han se om Lüderich Berchbou bedrivve. Bes 1978 woodt hee Zink-Ääz avjebout. Och de ahl Römer han allt om Lüderich en dr Ääd jebuddelt. Durch Rösrod flüüß de Sülz

Nevvenaan

Bänsberch litt em Norde. Dan kütt em Uhrzeijersenn Ovverod, Luumer, Trooßdorf un Kölle.

Veedel

Voaschbich (Forsbach)
Hoffnungsthal
Kleeneeche (Kleineichen)
Rösrod meddendren (Rösrath Mitte)

Vekier

Rösrod hät ene eije Autobahnanschluss an de A3. Ävver et jitt nor en Opfaht noh Kölle un en Avfaht us Richtung Kölle. För die Op- un Avfaht noh un us Richtung Frankfurt wor kei Jeld mieh do. Die Op- un Avfaht Richtung Frankfurt fingk mer doför em Nohberstädtche Luumer (Lohmar). Och en Luumer woren se kniestich. He han se de Op- un Avfaht Richtung Kölle enjespart.

Rösrod selver un Hoffnungsthal han_ene Bahnhoff un lije aan dä Linnich vun Kölle erop noh Engelskirsche, wo etwa jede Stund ene Zoch wigger, üvver Diringhause un Jummersbach bes noh Marienheed un zoröck jeiht, un en dä halve Stunde dozwesche blos bes_un vun Ovverod.

De Iesebahn zwesche Bänsberch un Rösrod jitt et nit mieh. Dä letzte Zoch es 1961 durch dr Köönichsfors jebimmelt. Aan der Stell, wo die Bahn üvver de Stroß (L170) fuhr, jov et keen Schranke. Ene Kääl met en Fahn sprong vun der Lokomotiev erav un heelt de Vekier op, sulang bes dä Zoch verbei wor. Hückzedaach triff mer op dä ahle Bahntrass Minsche, die hee wandere, loofe udder mem Rädche fahre. Schablon:Clear

Ne jruuße Laade

Ne jruuße Laade es et Möbelzentrum. Vill Lück kummen vun wigg her, öm sich hee e neu Schaaf ze koofe.

Wohrzeeche

Die Pooz vum Schloss Eulenbroich es quasi dat Wohrzeeche vun Rösrod. Wann de Rösroder Bürjermeister ene Bref schriev, dan es en demm Brefkopp dat Logo vun dä Pooz avjebild. Die Pooz fingk mer och allewähs op Plakate udder Fessschreffde. Och op de Websigg vum Städtche es die Pooz ze sinn. Schablon:Clear

Fründschaffte met andere Städtche

Veurne (Belgien), zick 1974
Chavenay (Frankreich, Yvelines), zick 1998
Crespières (Frankreich, Yvelines), zick 1998
Feucherolles (Frankreich, Yvelines), zick 1998
Saint-Nom-La-Bretèche (Frankreich, Yvelines), zick 1998

Fastelovend

Nit nor de Kölsche sin an Ruusemoondaach jeck. Och en Rösrod jitt et ene Ruusemoondaachszoch. En Voaschbich un Hoffnungsthal jonn die Veedelszöch allt am Karnevalssunndaach. Un wie soll et anders sin, natörlich wor och die Pooz vum Schloss Eulenbroich em Karnevalszoch allt dobei, wie ehr an demm Beld nevvenaan sinn künnt. Schablon:Clear

Schörreskaarerenne

Fröher han die Buure met de Schörreskaar schwer Körv, Kessde udder Knolle noh'm Maat jebraat. Hückzedaach fingk mer die ahl Holzkaare nor noch beim Schörreskaarerenne. Alle naslang jitt et em Berjische Land en Kirmes met enem Schörreskaarerenne. Dobei jeiht et nit nor dodröm, se flöcks de Stroß erav ze schörje. Die Kaare weede staats erusjeputz un löstije Fijure un Spröch draan- un dropjebaut. Am Engk vun demm Spektakel kritt die schönste Kaar ene Pries. Schablon:Clear

Veraanstaltunge en Mundaat

Kölsch en Wööt un Tön - Allemolde em Janewar jitt et en Rösrod ene Kölsch-Wörkshop. Dann weed em Schloss Eulenbroich an enem Wochenengk vun morjens bes ovends kölsch jeschwaad un jesunge. Orjaniseet weed der Kölsch-Unterrich vum Monika Kampmann. Dat Monika kennt sich us met de kölsche Sproch. Et es en Kölle un dröm eröm bekannt för sing Jesangsinterpretatione en kölsche Mundaat.
Mess op Kölsch - En de Fastelovendszigg jitt et en Voaschbich en de Kirch en Hillije Mess op Kölsch. Do deit dä Pastuur op kölsch prädije.

Lück, die jet met Rösrod ze dun han

Karl Otto Conrady, Literaturhistoriker, wonnt en Rösrod.
Monika Kampmann, mäht un singk kölsche Leeder, wonnt en Stöcken un luurt vun do us jään op dr Kölner Dom.
Alfred Neven DuMont, Zeitungsverleger, hät en Rösrod e Huus.
Anke Engelke hät 1984 an de Freiherr-vom-Stein-Schull en Rösrod et Abitur jemaat. Die Quatschschnüss es bekannt jewoode mem Schullchor "Die Sonntagskinder".
Chris Howland, Entertääner, wonnt en Rösrod.
Babrak Wassa, kütt us Afjaanistaan un es dä Komponiss vun dä neu afjaanische Nationalhymne. He wonnt allt zick 1981 en Rösrod.

För et Böcherschaaf

Klaus-Dieter Gernert, Helmut Wolff u. a. (Hrsg.): Chronik der Gemeinde Rösrath. Rösrath 1993:
1. Band: Volberg - Von den Anfängen bis zum Ende des 18. Jahrhunderts. ISBN 3-922413-35-8
2. Band: Rösrath - Von der Franzosenzeit bis zum Ende des Zweiten Weltkrieges. ISBN 3-922413-36-6

Websigge

Commons: Rösrath – Sammlung von Bilder, Filemche un Tön op Wikimedia Commons

Städt un Jemeinde em Rheinisch-Berjische Kreis