ეპიფიტები

ეპიფიტები (ეპი... და ბერძნ. phyton — მცენარე) — ბალახოვანი ან მერქნიანი მცენარეები, რომლებიც სახლდებიან სხვა მცენარეებზე, ძირითადად ღეროებსა და ტოტებზე. ფოთლებზე დასახლებულ ეპიფიტებს ეპიფილებს უწოდებენ.

პარაზიტებისაგან განსხვავებით, ეპიფიტები საკვებს იმ მცენარიდან კი არ იღებენ, რომლებზეც სახლდებიან, არამედ გარემოდან. განსაკუთრებით მდიდარია ეპიფიტებით ტენიანი ტროპიკული ტყეები, სადაც ეპიფიტებიდან უფრო მეტად ყვავილოვანი მცენარეები გვხვდება. ტენიან, მაგრამ ნაკლებად თბილ ადგილებში კი (მათ შორის მთიან რაიონებში) ხშირია ხავსი, გვიმრა და ლიქენი. საქართველოში ეპიფიტებია ძირითადად ზოგიერთი წყალმცენარე, მღიერი და ხავსი. ისინი სახლდებიან ნაძვზე, სოჭზე, ფოთლოვან მცენარეებზე და სხვა. ეპიფიტებით მდიდარია კოლხეთის სოჭნარ-ნაძვნარი, ბზიანები (ბზიფის ხეობა), უთხოვრიანი (ბაწარას ხეობა), ღვიანები (კარსანი, სარკინეთი, ვაშლოვანის ნაკრძალი) და სხვა.

ლიტერატურა

• გაგნიძე რ., ქართული საბჭოთა ენციკლოპედია, ტ. 4, თბ., 1979. — გვ. 169-170.

რესურსები ინტერნეტში

ვიკისაწყობში არის გვერდი თემაზე:

ეპიფიტები

• Epiphytes on a Scot's Pine in Gorbie Glen, Scotland (ინგლისური)