Salome Þorkelsdóttir

Salome Þorkelsdóttir (f. 3. júlí 1927) er fyrrverandi alþingismaður og fyrrum forseti Alþingis. Salome sat á þingi fyrir Sjálfstæðisflokkinn í Reykjaneskjördæmi frá 1979-1995.

Salome fæddist í Reykjavík og foreldrar hennar voru hjónin Þorkell Sigurðsson vélstjóri og Anna Þorbjörg Sigurðardóttir húsmóðir. Eiginmaður Salome var Jóel Kristinn Jóelsson (1921-2007) garðyrkjubóndi í Mosfellsdal. Salome og Jóel eignuðust þrjú börn.

Nám og störf

Salome lauk námi frá Kvennaskólanum í Reykjavík árið 1945. Hún vann skrifstofustörf frá 1945-1967 og 1967-1979 og var t.d. aðalgjaldkeri Mosfellshrepps frá 1972-1979. Hún sat í hreppsnefnd Mosfellshrepps frá 1966-1982 og var oddviti hreppsins frá 1981-1982. Hún var formaður Samtaka sveitarfélaga í Reykjaneskjördæmi frá 1975-1979, formaður fulltrúarráðs sjálfstæðisfélaganna í Kjósarsýslu frá 1972-1980 og sat í miðstjórn Sjálfstæðisflokksins frá 1973-1987.

Salome var kosin á þing árið 1979 og sat á þingi til ársins 1995. Hún gegndi embætti forseta Alþingis frá 1991-1995.^[1] Eftir að Salóme lét af þingmennsku var hún m.a. formaður Félags eldri sjálstæðismanna.

Árið 1993 var Salome sæmd stórriddarakrossi Hinnar íslensku fálkaorðu fyrir störf í opinbera þágu^[2] og árið 2007 var hún útnefnd Heiðursborgari Mosfellsbæjar.^[3]

Tilvísanir

1. Alþingi, Æviágrip - Salome Þorkelsdóttir (skoðað 28. júní 2019)
2. Forseti.is, „Orðuhafaskrá“ Geymt 26 ágúst 2019 í Wayback Machine (skoðað 28. júní 2019)
3. Mosfellsbær.is, „Heiðursborgari Mosfellsbæjar“ (skoðað 28. júní 2019)