Hannes Smárason

Hannes Þór Smárason (f. 25. nóvember 1967) er íslenskur ríkisborgari og fyrrverandi forstjóri FL Group. Hannes var nokkuð atkvæðamikill er hann leiddi fjárfestingastarf FL Group en sú vegferð endaði með miklu tapi. Sem slíkur var hann gjarnan settur í flokk íslenskra útrásarvíkinga, menn sem fjárfestu mikið erlendis. Hann varð vellauðugur en tapaði miklu í bankahruninu haustið 2008.^[1]

Ævi

Hannes lauk B.Sc.-gráðu í vélaverkfræði og stjórnun við MIT háskólann í Massachusetts og lauk síðan M.B.A.-gráðu frá MIT Sloan School of Management.^[2]

Hannes sat í stjórn Flugleiða frá árinu 2004^[3] og starfaði sem stjórnarformaður þar til í október 2005 þegar hann var ráðinn forstjóri FL Group.^[4] Undir hans stjórn urðu Flugleiðir að alþjóðlegu fjárfestingafyrirtæki.^[5] Áður gegndi hann stöðu aðstoðarforstjóra Íslenskrar erfðagreiningar og var kjörinn í aðalstjórn Kers hf. þann 27. nóvember 2002.^[6] Hann vann hjá McKinsey & Co. í Boston frá 1992 og út 1996 sem ráðgjafi.^[7]

Sem forstjóri FL Group stóð Hannes að einni hagstæðustu fjárfestingu íslenskra viðskipta að mati viðskiptablaðs Morgunblaðsins en árið 2006 skilaði fjárfesting félagsins í easyJet lággjalda flugfélaginu 12 milljarða króna í innleystum hagnaði.^[8] Hannes lét af starfi forstjóra FL Group hinn 4. desember 2007^[9] eftir viðamiklar breytingar á eignarhaldi félagsins í kjölfar lækkandi gengi skráðra félaga, sem fjárfestingarfélagið hafði tekið stöðu í. Sérstaklega var þar horft til fjárfestingar i AMR, eignarhaldsfélagi bandaríska flugfélagsins American Airlines, sem mjög hafði fjarað undan, en FL Group tapaði um 15 milljörðum króna á henni.^[10] Þá kom einnig fram gagnrýni í fjölmiðlum á rekstrarkostnað félagsins, en undir þann lið var meðal annars bókfærður kostnaður við starfslokasamninga og lífeyrisgreiðslur til fyrrverandi lykilstjórnenda félagsins og fyrirrennara þess, Flugleiða. Á árinu 2007 nam launakostnaður fyrirtækisins 701 milljón króna sem deildist á 40 starfsmenn.^[11] Laun Hannesar á árinu 2007 voru 139,5 milljónir króna en starfslokasamingur hans nam 90 milljónum króna.^[12][13] Stærstur hlutur rekstrarkostnaðarins var þó útskýrður sem sérfræðikostnaður vegna yfirtökutilrauna og annara verkefna sem ekki komust til framkvæmda.^[14]

Hannes hefur síðar sagt að hann sæi eftir ákvörðunum sem teknar voru í stjórnartíð hans, til dæmis að FL Group hafi vaxið of hratt og minnkað of hægt.^[15]

Málsókn Glitnis banka

Þann 11. maí 2010 var málsókn Glitnis banka á hendur Jóni Ásgeiri Jóhannessyni, Þorsteini Jónssyni, Jóni Sigurðssyni, Lárusi Welding, Pálma Haraldssyni, Hannesi Smárasyni og Ingibjörgu Stefaníu Pálmadóttur þingfest fyrir rétti í New York-fylki, þar sem þau voru ákærð fyrir meint fjársvik af bankanum sem nam meira en tveimur milljörðum dala.^[16]. Það mál var síðar fellt niður þann 4. janúar 2012 með tveimur skilyrðum. Í fyrsta lagi að allir einstaklingarnir viðurkenndu lögsögu íslensks dómstóls og í öðru lagi að þeir myndu ekki mótmæla því að dómur á Íslandi yrði aðfararhæfur í New York. Hinir stefndu hyggjast sækja skaðabætur á hendi Glitni banka.^[17]

Neðanmálsgreinar

1. Lúxusíbúð Hannesar Smárasonar í London til sölu -
2. „Viðskipta- og hagfræðideild > Fréttir“^{[óvirkur tengill]} á vef Háskóla Íslands (Skoðað 30. mars 2009).
3. „Aðstoðarforstjóri Íslenskrar erfðagreiningar hættir“ á Mbl.is (Skoðað 30. mars 2009).
4. „Hannes ráðinn forstjóri FL Group í stað Ragnhildar“ á Mbl.is (Skoðað 30. mars 2009).
5. „Flugleiðir verði útrásarfyrirtæki“ á Mbl.is (Skoðað 30. mars 2009).
6. „Hannes Þór Smárason í stjórn Kers“ á Mbl.is (Skoðað 30. mars 2009).
7. „Viðskipta- og hagfræðideild > Fréttir“^{[óvirkur tengill]} á vef Háskóla Íslands (Skoðað 30. mars 2009).
8. „FL Group selur eignahlut sinn í easyJet“ á Mbl.is (Skoðað 31. mars 2009)
9. „Hannes: Eðlilegt að víkja“ á Mbl.is (Skoðað 30. mars 2009).
10. „FL Group selur bréf sín í AMR“ á Mbl.is (Skoðað 30. mars 2009).
11. „FL Group hreinsar út fortíðardrauga fyrir framtíðina“ á visir.is (Skoðað 30. mars 2009).
12. „Laun forstjóra FL Group samtals 172 milljónir“ á Mbl.is (Skoðað 30. mars 2009).
13. „FL Group hreinsar út fortíðardrauga fyrir framtíðina“ á visir.is (Skoðað 30. mars 2009).
14. „FL Group hreinsar út fortíðardrauga fyrir framtíðina“ á visir.is (Skoðað 31. mars 2009).
15. „Varpa Þarf ljós á ýmislegt sem gerðist í aðdraganda hrunsins“ á Mbl.is (Skoðað 31.mars 2009).
16. „Glitnir banki stefnir Jóni Ásgeiri Jóhannessyni og fleirum fyrir meint fjársvik og krefst bóta að jafnvirði 258 milljarða króna Jafnframt er endurskoðunarfyrirtækinu PricewaterhouseCoopers stefnt fyrir afglöp í trúnaðarstarfi og vítaverða vanrækslu“. Sótt 13. október 2010.
17. Glitnir áfrýjar ekki, MBL 4. janúar 2012.

  Þetta æviágrip sem tengist Íslandi er stubbur. Þú getur hjálpað til með því að bæta við greinina.