From Wikipedia, the free encyclopedia
Alþjóðafriðarskrifstofan (en. International Peace Bureau; fr. Bureau international de la paix), stofnuð árið 1891,[1] er ein elsta alþjóðlega friðarstofnun í heimi.
Alþjóðafriðarskrifstofan International Peace Bureau Bureau international de la paix | |
---|---|
Skammstöfun | IPB (enska); BIP (franska) |
Stofnun | 1891 |
Höfuðstöðvar | Berlín, Þýskalandi |
Hnit | 52.522454°N 13.383641°A |
Forsetar | Reiner Braun og Lisa Clark |
Vefsíða | www.ipb.org |
Alþjóðafriðarskrifstofan var stofnuð sem Fasta alþjóðlega friðarskrifstofan (fr. Bureau International Permanent de la Paix). Frá og með árinu 1912 hefur hún gengið undir nafninu Alþjóðafriðarskrifstofan. Frá 1946 til 1961 var hún kölluð Alþjóðlega tengslanefndin fyrir friðarsamtök (fr. Comité de liaison international des organisations de paix).
Stofnunin hlaut friðarverðlaun Nóbels árið 1910 fyrir að starfa sem „milliliður á milli friðarsamtaka ýmissa ríkja“.[2][3] Árið 1913 hlaut Henri La Fontaine einnig verðlaunin fyrir störf sín við Alþjóðafriðarskrifstofuna.[4][5] Ellefu aðrir friðarverðlaunahafar Nóbels hafa einnig verið meðlimir í Alþjóðafriðarskrifstofunni.[6]
Alþjóðlega herferðin gegn hernaðarútgjöldum er varanleg ársherferð sem Alþjóðafriðarskrifstofan hleypti af stokkunum í desember árið 2014 til að takast á við óhófleg hernaðarútgjöld ríkja á heimsvísu.[7]
Markmið herferðarinnar er að þrýsta á stjórnvöld heimsins að fjárfesta í heilsu-, mennta-, atvinnu og loftslagsgeirunum frekar en í hernaði. Herferðin kallar einnig á eftir árlegri endurúthlutun að lágmarki 10% hernaðarríkisútgjalda til annarra verkefna. Herferðin beitir sér einnig fyrir minnkun á alþjóðlegri vopnaframleiðslu og vopnasölu.[8]
Herferðin stendur einnig fyrir alþjóðlegum aðgerðadegi gegn hernaðarútgjöldum til þess að vekja athygli almennings, fjölmiðla og stjórnvalda á kostnaði hernaðarútgjalda og hvetja til nýrrar forgangsröðunar.[9]
Frá árinu 1992 hefur Alþjóðafriðarskrifstofan úthlutað Seán MacBride-friðarverðlaununum til einstaklinga eða stofnana sem hafa „unnið framúrskarandi störf í þágu friðar, afvopnunar og/eða mannréttinda.“[10][11] Verðlaunin eru nefnd eftir Seán MacBride, handhafa friðarverðlauna Nóbels sem var formaður Alþjóðafriðarskrifstofunnar frá 1968–74 og forseti hennar frá 1974-1985.[12][13]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.