Rómversk-kaþólska kirkjan
From Wikipedia, the free encyclopedia
Rómversk-kaþólska kirkjan eða kaþólska kirkjan er stærsta trúfélag heims[1] og langstærsta kristna kirkjudeildin. Orðið kaþólska kemur úr gríska orðinu καθολικός kaþolikos sem þýðir „almenn“ eða „það sem gildir um alla tíma“ og vilja margar aðrar kirkjudeildir einnig eigna sér þetta hugtak
Samtals voru um 1,3 milljarður manna skírðir til kaþólskrar trúar í heiminum árið 2018 en það er um sjötti hluti íbúa jarðar.[2] Á Íslandi voru skráðir um 15.000 safnaðarfélagar árið 2023.[3] Rómversk-kaþólska kirkjan telur sig vera beinan erfingja fyrstu kristnu söfnuða postulanna tólf og sérlega heilags Péturs. Hún samanstendur af 23 kirkjudeildum, hver með sína helgisiði. Sú stærsta er hin latneska eða vestræna kirkja, og þá eru 22 austrænar kirkjudeildir sem allar líta á páfann í Róm sem leiðtoga og yfirmann sem og læriföður sinn í siðfræðilegum og andlegum efnum.[4] Páfinn er einnig þjóðhöfðingi minnsta ríkis í heimi, Vatíkansins.