From Wikipedia, the free encyclopedia
Kubana revoluciono esis armizita revolto komandita da Fidel Castro kontre la diktatoreso di Fulgencio Batista en Kuba. L'armizita revolto duris de la 26ma di julio 1953 til la 1ma di januaro 1959, kande la revolucioneri kaptis povo.
Ol esis l'unesma sucesoza sinistrana revolto en Latin-Amerika, ed inspiris kelka sinistrana movadi en la regiono ed en altra loki del mondo. Pos la revolto instalesis komunista rejimo en Kuba, e la fratuli Castro restis en povo til la 18ma di aprilo 2018, kande Miguel Díaz-Canel asumis la povo.
La revoluciono komencis kun sensucesa atako a la kazerno Moncada, en Santiago de Cuba. Segun Fidel Castro, kin revolucioneri mortigesis dum l'atako ed 56 plusa homi mortigesis pose. La transvivanti enkarcerigesis, inkluzite la fratuli Fidel e Raúl Castro, ma en 1955 omni liberigesis. Raúl e Fidel exilis su en Mexikia, ube li recevis aprentiteso pri militeto de Alberto Bayo, ex-kombatanto di Hispana interna milito, e komencis preparar revoluciono kontre Batista. Dum lia aprentiteso, li konocis e developis amikeso kun Ernesto Che Guevara.
Ye la 2ma di decembro 1956 la yakto Granma arivis en Kuba kun la fratuli Castro ed altra 80 homi. La revolucioneri desembarkis e translojis a la montaro Sierra Maestra, sude del insulo. La grupo komencis sucesoza ataki kontre Kubana armeo, dum ke la rejimo di Batista subisis armeala embargo de Usa pos la 14ma di marto 1958. Ta embargo febligis lua rejimo, malgre Kuban armeo havis de 30 mil til 40 mil soldati. Fine, revolucioneri kaptis la povo ye la 1ma di januaro 1959.