Guayaquil

Guayaquil esas la maxim populoza urbo di Equador. En 2014 2 560 505 personi habitis ibe. Lua tota surfaco esas 344,5 km². Kune l'urbi Samborondón e Durán, ol formacas metropolala regiono qua havas plu kam 3 milion habitanti.

Guayaquil
Kelk imaji pri Guayaquil.
Standardo	Blazono
Lando:	Equador
Regiono:	Guayas
Informo:
Latitudo:	40°47' N
Longitudo:	73°58' W
Altitudo:	4 m
Surfaco:	344,5 km²
Habitanti:	2 560 505 (2014)
Denseso di habitantaro:	2473 hab./km²
Horala zono:	UTC-5
Urbestro:	Cynthia Viteri
Mapo:
Oficala retosituo:
www.guayaquil.gov.ec/

Malecón (ped-promeneyo) Simón Bolívar, proxim fluvio Guayas.

Fondita definitive en 1547, Guayaquil nun esas importanta financala, politikala, kulturala ed amuzala centro di la lando. Lua portuo esas un ek la maxim importanta de Equador che Pacifiko: cirkume 70% del exportaci e 83% del importaci facesas tra ol. L'urbo havas multa universitati e fakultati, di qui l'Universitato di Guayaquil esas la maxim importanta.

Historio

Francisco Pizarro fondis l'urbo unesmafoye en 1534, kun la nomo Ciudad de los Reyes. Tamen, ol destruktesis. Sebastián de Benalcázar fondis l'urbo itere sam yaro, ma ol anke destruktesis. Oficale, l'urbo judikesas kom fondita ye la 25ma di julio 1538, da Francisco de Orellana. En 1600 ol havis cirkume 2 000 habitanti ed en 1700 ol havis plu kam 10 000 habitanti.

Ye la 9ma di oktobro 1820 l'urbo deklaris nedependo de Hispanian imperio, ed esis l'unesma urbo di Equador libera de Hispana dominaco.

Geografio

Fluvio Guayas, vidita de la kolino Santa Ana.

La reliefo di Guayaquil esas grandaparte plana, kun kelka kolini, exemple Santa Rosa, Cerro del Carmen, San Eduardo e Cerro Azul. L'urbo jacas an l'estuario dil fluvio Guayas, qua recevas aqui de la fluvii Daule e Babahoyo norde del urbo.

Lua klimato esas varma, por jacar proxim l'Equatoro, ma kun influi de la kolda marofluo di Humboldt. Ol klasifikesas kom tropikalo de savano (Aw segun la klimatala klasifikuro da Köppen). La temperaturi varias poke dum la yaro: la mezavalora temperaturo en julio - la maxim kolda monato - esas 25°C, kontre ke la mezavalora temperaturo en aprilo - la maxim varma monato - esas 27,8°C.

La pluvoza sezono iras de januaro til aprilo. La mezavalora yarala pluvo-quanto esas 1273,2 mm, e la maxim pluvoza monato esas februaro, kun mezavalore 332 mm.