![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/8/82/Roskilde_ratusz_mpazdziora.jpg/640px-Roskilde_ratusz_mpazdziora.jpg&w=640&q=50)
Roskilde
From Wikipedia, the free encyclopedia
Roskilde, situita 30 km weste de København sur la dana insulo Sjælland, esas la chefa urbo en Municipo Roskilde.
![Thumb image](http://upload.wikimedia.org/wikipedia/commons/thumb/8/82/Roskilde_ratusz_mpazdziora.jpg/640px-Roskilde_ratusz_mpazdziora.jpg)
Kun habitantaro 50.046 (ye 1ma januaro 2016), l'urbo esas komercala ed edukala centro por la regiono, e la 10ma maxim granda urbo en Dania. Roskilde guvernesas dal administrala konsilistaro di Municipo Roskilde.
Roskilde havas longa historio, de la pre-kristana Vikingo-Epoko. Olua UNESCO-listizita Gotika katedralo, qua nun kontenas 39 tombi di dana monarki, kompletigesis en 1275, diveninta foko di religiala influo til la Reformo.
Pro developo dil fervoyo-reto en la 19ma yarcento, Roskilde divenis importanta nabo por trafiko kun København, e ye la fino di ta yarcento, esis tabako-fabrikerii, fero-giserii e mashinerii. Inter la granda privata-sektora employeri hodie esas IT-firmo BEC (Bankernes EDB Central) e GPI (Glim Plastic Industri), qua fabrikas plastiki. La Risø-resercherio anke divenas granda employero, extensante intereso pri sustenebla energio al sfero di neta teknologio. La lokala universitato, fondita en 1972, la historiala Katedralo-Skolo, e la Dana Karno-Komerco-Kolegio, establisita en 1964, esas edukala institucuri notinda.
Roskilde havas granda lokala hospitalo expandita e modernigita depos ol apertesis en 1855. Ol esas nun aktiva en la resercho-sfero.
La katedralo e la Vikingo-Navo-Muzeo, qua kontenas la bone-prezervita restaji de kin 11ma-yarcenta navi, atraktas plu kam 100.000 vizitanti yarale. Ultre lua internacione agnoskata turist-atraktivi e yarala muziko-festivalo, Roskilde esas populara por butikumo danke du centrale situita pediranto-stradi kun restorerii, kafeerii, e diversa butiki.
L'urbo esas hemo dil futbalo-klubo FC Roskilde, rugbio-klubo Roskilde Vikings RK , e remo-klubo, Roskilde Roklub. Dum la 1970a yari, l'urbo profitis pro aperto di universitato, e pro kompletigo dil Holbæk-autovoyo qua konektas ol a København.
Roskilde havas la max anciena operacanta fervoyo-staciono en Dania, kun konekti trans Sjælland ultre kun Falster, Lolland, e Jylland. La lokala aeroportuo apertesis en 1973, e precipue servas lejera avioni por komercal uzo e flugo-instrukto.
Inter la notinda civitani esas Absalon, episkopo qua fondis København en la 12ma yarcento; L. A. Ring, simbolista piktisto qua famozeskis en la 1880a yari; skribisto Lise Nørgaard qua skribis la populara dana TV-serio Matador en 1978; e remisto Thomas Ebert qua ganis Olimpiala ora medalio en 2004.