Olimpiala Ludi en Saint Louis, 1904

L'Olimpiala Ludi en Saint Louis, 1904, od oficale la 3ma Olimpiala Ludi, esis internaciona plursporta konkurso qua eventis en 1904 en Saint Louis, Usa. Lore unesmafoye l'Olimpiala Ludi eventis exter Europa, en Usa.

Afisho pri la 3ma Olimpiala Ludi, en Saint Louis.

La Ludi komencis ye la 1ma di julio e finis ye la 23ma di novembro 1904. Partoprenis 651 atleti (645 viri e 6 mulieri) de 12 landi. Esis 91 eventi de 17 sporti.

Ol eventis dum la Mondala Ferio di 1904 en l'urbo, ed eventis la sama erori e desorganizuri kam dum l'Olimpiala Ludi en Paris, 1900. La plu bizar exemplo esis la maratono: ol eventis sub temperaturi extreme alta, en polvoza stradi e voyi, ube kavali ed automobili levis granda polvonubi kande li krucumis ol. Usana Frederick Lorz arivis kom "unesma", ma il vehis cirkum 10 milii per automobilo. La judicieri deskovris la fraudo ed ekpulsis ilu de la Ludi. L'ora medalio donesis a Thomas John Hicks, Britaniano qua habitis en Usa, quankam ilu recevis helpo da lua entreneri por ne falar sur la sulo dum la fino di la kurado.

Kelka fakti

Thomas John Hicks recevas helpo da lua entreneri.

• Le tensi di la milito Rusa-Japoniana afektis l'Olimpiala Ludi, e multa importanta atleti ne partoprenis ol. Mult altra atleti ne konkursis pro la desfacileso pri arivar en Saint Louis.
• Unesmafoye en la Ludi eventis konkursi pri boxo, lukto libera-stilo, haltero-levo e deklato.
• En multa eventi, pro la manko di stranjera atleti, lokala konkursi kombinesis kun l'Olimpiala konkurso. Exemple natado, quan partoprenis lokala natisti del organizuro YMCA.
• Germana Emil A. Rausch esis la maxim bona atleto ne naskinta en Usa. Ilu ganis tri medalii por natado, du ora ed 1 bronza.
• Thomas John Hicks, Britaniano qua habitis en Usa, deklaresis la vinkanto di la maratono en ta yaro, quankam ilu recevis helpo da lua entreneri, qui rianimis ilu per ovi, konyako e striknino. Lua entreneri tenis ilu por ke ilu ne falez sur la sulo dum la fino di kurado. Ilu arivis ebria e deliranta.
• Kubana letro-portisto Felix Carbajal arivis kom 4ma en la maratono, quankam il haltis dum kelka tempo por manjar pomi.

Medalii ganita

Landi partopreninta en l'Olimpiala Ludi en 1904. Blue, landi qui partoprenis unesmafoye.

L'inauguro-ceremonio en Saint Louis, 1904.

Yen la listo di landi qui recevis adminime 1 bronza medalio en 1904.

#	Lando	Ora	Arjenta	Bronza	Entote
1	Usa	78	82	79	239
2	Germania	4	4	5	13
3	Kuba	4	2	3	9
4	Kanada	4	1	1	6
5	Hungaria	2	1	1	4
6	Unionita Rejio	1	1	0	2
6	mixita esquado	1	1	0	2
8	Grekia	1	0	1	2
8	Suisia	1	0	1	2
10	Austria	0	0	1	1
Totali		96	92	92	280