From Wikipedia, the free encyclopedia
Li solari sistema es un planetari sistema, designa un sistema composit de un o pluri stelles, to es, un astre del sam natura quam nor Sole, circumdat de un o pluri planetes. Por evitar confusion, on va usar li término planetari sistema quam generic término e solari sistema por nor planetari sistema.
Li solari sistema, constituet del Sole, del Terra, de ott altri planetes, de asteroides e de cometes restat li sol tal sistema conosset til li fine del 20esim secul.
Al centre se trova li Sole, un stelle relativmen micri, ma quel contene támen 99,86% del masse del tot sistema. Pro su masse, li interiore del Sole atinge un tal densitá e temperatura que reactiones de nucleari fusion posse producter se, emissent enorm quantitás de energie. Li max grand parte de ti energie es liberat ad-in spacie sub li forme de electromagnetic radiation, principalmen sub li forme de visibil lúmine. Li Sole emisse anc un flux de chargeat particules nominat li solari vente. Ti solari vente interacte fortmen con li magnetosfere del planetes e contribue al ejection de gases e polve ad-éxter li solari sistema.
Li planetes max proxim al Sole es li micri, roccosi e densi terrestri planetes. In direction forviageant del Sole, on trova Mercur, Venus (Vénere), li Terra e Mars.
It existe préter Mars un asteroidal cintura composit de milliardes de córpores, de quel li dimension varia de quelc centimetres til pluri decenes de kilometres.
Poy, it es li dominia del índensi, gasosi, gigant planetes: Jupiter, Saturn, Uran e Neptun. Pluto, li planete max lontan del Sole, micri e solid, con un órbite tre inclinat, es li max grand objecte de un duesim cintura de asteroides glaciosi, nominat li cintura de Kuiper. Ti cintura, populat de milles de asteroides, sembla esser li fonte de cometes de curt periode.
In fine, it existe, ancor plu lontan quam li cintura de Kuiper, e extendent til un distantie de du lúmine-annus del Sole, un enorm sferic nube nominat li nube de Oort, quel contene milliardes de cometari nucleos.
Omni ti caracteristicums es dat relativmen a tis del Terra.
*Traditionalmen, Pluto es considerat quam planete. Támen, su composition e su órbite fa it un objecte mult plu proxim al objectes de Kuiper quam al altri planetes. Cert scientistes pensa que it vell posser acter se pri un satelite de Neptun quel esset expulset de su órbite pos alqual violent colision.
Li evolution del solari sistema desde su nascentie til su morte ha esset tre lent e va extender se intot trans plu quam 10 milliardes de annus. On estima generalmen hodíe que li solari sistema nascet del contraction, sub li efecte de su propri masse, de un frigid e densi interstellari nube fat de gas, essentialmen de hidrogene e de helium, li atomes max comun al nascentie del Universe. In ti nube devet exister egalmen granules de polve, e aqua sub li forme de glacie. Ti nube, nominat li solari nebulose, pos har atinget un regulari forme, probabilmen un disc, con un movement de rotation, comensat diferentiar se ad-in pluri partes. Li max grand parte assemblat se al centre por formar un proto-stelle, li futuri Sole. Del altri látere, li granules de polve aglomerat se. Per li efecte de gravitation, plu e plu de materie vell har talmen format proto-planetes.
In li centre, tornante plu rapidmen quam li borde e essente plu compresset, li temperatura crescet. Pro que li central masse esset talmen densi e calid, reactiones de nucleari fusion esset accendet; quo dat nascentie al Sole, nor stelle. Li estimat date de ti fenomene es 4,56 milliardes de annus ante li presente.
Li plu grand proto-planetes atractet li plu micris e creat un vacuo círcum ili self; grandijante, ili devenit sferic. Adplu, li nucleari reactiones in li yun Sole creat un potent solari vente quel forportat li pluparte del reste del gas e polve. Talmen es que on ariva al solari sistema quam on observa in presente.
Pos circa 5 milliardes de annus, li Sole vell har exhaustet su reserves de hidrogene, quel va har esset transformat ad-in helium, e nor stelle va changear structura. Su nucleo va contracter se ma li Sole self va devenir mult plu voluminosi. It va transformar se in rubi gigante, cent vezes plu voluminosi quam in presente. Li max proxim planetes Mercur e Venus va esser destructet.
It va poy brular su helium suficent rapidmen, quo va augmentar ancor su volúmine e su temperatura. To va a ti témpor completmen cocinar li Terra.
Quande su reserves de nucleari energie va esser completmen consumptet, li Sole va cader in sur self e transformar se in blanc nan, tre densi e poc luminosi. It va frigidijar poc a poc e va finir per ne plu radiar ni lúmine ni calore. Tande it va har arivat al stadie de nigri nan.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.