Հիմա Դու Ինձ Տեսնում Ես From Wikipedia, the free encyclopedia
Հիմա դու տեսնում ես ինձ (անգլերեն՝ Now You See Me), ամերիկյան դետեկտիվային թրիլլեր ժանրի ֆիլմ իլյուզիոնիստների մասին։ Նկարահանել է ֆրանսիացի կինոռեժիսոր Լուի Լետերյեն[14]։ ԱՄՆ-ում ֆիլմի պրեմերիան տեղի է ունեցել 2013 թվականի մայիսի 31-ին, իսկ Ռուսաստանում՝ 2013 թվականի հուլիսի 12-ին[15]։ Ֆիլմն ունեցել է 75 միլիոն դոլլար բյուջե, համաշխարհային եկամուտը կազմել է 343 572 420 դոլար[16]։ 2016 թվականի հունիսի 9-ին թողարկվել է ֆիլմի 2-րդ մասը[17]։
Ինչ-որ մեկը հավաքում է չորս տաղանդավոր հրաշագործների՝ Դանիել Ատլասին (Ջեսսի Այզենբերգ), Հենլի Ռիվզին (Այլա Ֆիշեր), Մերիթ ՄաքՔինիին (Վուդի Հարելսոն) և Ջեք Ուայլդերին (Դեյվ Ֆրանկո)՝ յուրաքանչյուրին տալով Տարոյի քարտ։ Ավելի ուշ նրանք հավաքվում են մի բնակարանում, որտեղ գտնում են աֆերայի անտեսանելի գծագիր։ Մեկ տարի անց նրանք «Չորս հեծյալներ» մականունով ելույթ են ունենում Լաս-Վեգասում միլիարդատեր Արթուր Թրեսլերի (Մայքլ Քեյն) հովանավորությամբ։ Եզրափակիչ ելույթի ժամանակ նրանք դահլիճից հրավիրում են ֆրանսիական բանկի մի հաճախորդի և խոստանում նրան տեղափոխել ֆրանսիական բանկ։ Հնարքի հետևանքով բանկի հաճախորդն անհետանում է, իսկ հանդիսատեսը տեսնում է, որ նա հայտնվել է գումարի պահեստարանում։ Այնտեղ կար նաև օդատար անցք, որը քաշում է 3․2 միլիոն եվրոն և թափում հանդիսատեսի վրա։
ՀԴԲ-ի գործակալ Դիլան Րոուդսին (Մարկ Ռուֆալո) և Ինտերպոլի գործակալ Ալմա Դրեյին (Մելանի Լորեն) հանձնարարում են հետաքննել կողոպուտը։ Նրանք ձերբակալում են «Չորս հեծյալներին», բայց չեն կարողանում ապացուցել նրանց մեղքը։ Ավելի ուշ նրանք հանդիպում են նախկին իլյուզոնիստ Թադեուշ Բրեդլիին (Մորգան Ֆրիման), որը վարում էր իլյուզոնիստների բացահայտման շոու-ծրագիր։ Բրեդլին գործակալներին պատմում է, թե ինչպես են «Հեծյալները» հնարքի և մանիպուլյացիայի միջոցով կատարել այդ հանդուգն գողությունը։ Վերջինս հրաժարվում է նրանց օգնել իլյուզիոնիստների ստի մերկացման հարցում։
«Չորս հեծյալների» հաջորդ ելույթը տեղի է ունենում Նոր Օռլեանում։ Թրեսլերը փորձում է կաշառել Բրեդլիին, բայց ապարդյուն։ Եզրափակիչ ելույթում «Հեծյալները» ցուցադրում են, թե ինչպես են Թրեսլերի հաշվեհամարից գողացված գումարները փոխանցվում հանդիսատեսի հաշվեհամարին, քանի որ նրա ապահովագրական ընկերությունը հրաժարվել էր տուժողներին փոխհատուցում վճարել «Կատրինա փոթորկից» հասցրած վնասի համար։ Րոուդսը փորձում է ձերբակալել «Հեծյալներին», բայց նրանք փախչում են հիպնոսացված հանդիսատեսի շնորհիվ։ Ավելի ուշ Դրեյը պատմում է Րոուդսին իլյուզիոնիստների «Աչք» գաղտնի կազմակերպության մասին, որն օգտագործում է իլյուզոնիզմը հասարակ մարդկանց օգնելու համար։ Թրեսլերը, զայրանալով իր կարողության կորստի պատճառով, վարձում է Բրեդլիին, որպեսզի վերջինս բացահայտի և ստորացնի «Չորս հեծյալներին»։
ՀԴԲ-ն գտնում է «Հեծյալների» թաքստոցը Նյու Յորքում։ «Հեծյալների» բնակարանի վրա հարձակման ժամանակ Րոուդսը հանդիպում է Ուայլդերին, իսկ նրանց կռվից հետո վերջինս մեքենայով փախուստի է դիմում, բայց ճանապարհին նրա մեքենան վթարի է ենթարկվում, շրջվում և պայթում։ Պայթյունից առաջ Րոուդսը մեքենայից գտնում է փաստաթղթեր, որից և իմանում է «Հեծյալների» գլխավոր նպատակի մասին՝ սեյֆով պահեստի, որում պահպանվում են մի ընկերության 500 միլիոն դոլարի չափով չվճարված հարկեր, որին հետևում է ՀԴԲ-ի մեկ այլ խումբ։ ՀԴԲ-ին հաջողվում է վերցնել սեյֆը, ինչից հետո նրա գործակալները հայտնվում են «Հեծյալների» հաջորդ հանցագործության վայրում։ Բացելով սեյֆը՝ գործակալները տեսնում են, որ սեյֆում ոչ թե գումար է, այլ փուչիկներ։
Այն ժամանակ մնացած «Հեծյալները» կատարում են իրենց վերջին ելութը, բայց նրանց կրկին հետևում են ՀԴԲ-ի գործակալները։ «Հեծյալները» ցատկում են տանիքից և անհետանում, իսկ հանդիսատեսի վրա թափվում է ամբողջ գողացված գումարը։ Բայց պարզվում է, որ գումարները կեղծ են, նրանց վրա պատկերված են «Հեծյալների» դիմանկարները։ Բրեդլին վերադառնում է իր մեքենայի մոտ և տեսնում, որ այն ամբողջությամբ լցված է գողացված միլիոններով։ Նրան ձեռբակալում են որպես հանցագործության մասնակից։ Բանտում նրան այցելում է Րոուդսը և մնում նրա հետ փակ խցում։ Բրեդլին ասում է, որ իր հանդեպ դավադրություն են գործել։ Հույս ունենալով, որ պատիժը կմեղմեն՝ նա բացատրում է, թե ինչպես են «Հեծյալները» գողացել սեյֆը և կատարել մնացած բոլոր հնարքները։ Պատմում է նաև Ջեք Ուայլդերի կեղծ մահվան մասին։ Սակայն զարմանում է, թե ինչպես է «Հեծյալներին» հաջողվել խաբել ՀԴԲ-ին։ Նա հասկանում է, որ դրա համար նրանց մեկն էր պետք, ով կկարողանար հեռու պահել «Հեծյալներին» ՀԴԲ-ից։ «Օրինակ՝ լինել ներսում», - հուշում է Րոուդսը։ Բրեդլին շրջվում է և տեսնում, որ Րոուդսը խցից դուրս է կանգնած։ Հենց Րոուդսն էր հինգերորդ «Հեծյալը», որը գաղտնի վարձել էր քառյակին և հրամաններ էր տալիս՝ հսկելով, որ ՀԴԲ-ն չբացահայտնի նրանց։ Նա Բրեդլիին թողնում է խցում և հեռանում։ Այդ ժամանակ երեք «Հեծյալները» գնում են այգի, որտեղ նրանց սպասում է Ուայլդերը։ Նրանք գտնում են հուշարձան-ծառ՝ սրբագործված երբեմնի մեծ իլյուզիոնիստ Լայոնել Շրայքի կողմից։ «Հեծյալների» ստացած Տարո քարտերը դասավորվում են «Աչք» խորհրդանշով քարտի վրա, և դրա օգնությամբ միացնում մոտակա կարուսելը։ Մոտենալով կարուսելին՝ նրանք հանդիպում են Րոուդսին, որը նախաձեռնում է նրանց մուտքը դեպի «Աչք»։
Փարիզում եղած ժամաանակ, երբ Դրեյը թերթ է կարդում այգում, իր կողքին գտնում է Րոուդսին։ Նա կռահում է, որ Րոուդսը Շրայքի որդին է, որն այս տարիների ընթացքում ծրագրում էր վրեժ լուծել հոր մահվան համար։ Բրեդլին բացահայտում է Շրայքին՝ ստիպելով նրան անել այդ ռիսկային հնարքը։ Թրեսլերը և Փարիզի բանկը հրաժարվում են վճարել Շրայքի ապահովագրական վճարը։ Ընկերությունը, որից գողացել էին գումարով սեյֆը, Շրայքի հնարքի համար պատրաստել էր անհուսալի սեյֆ, ինչի պատճառով էլ մահացել էր Շրայքը։ Դրեյը որոշում է չմատնել Ռոդսին։
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
