Մարսալֆորն, բնակավայր Մալթայի Հանրապետությունում։ Գտնվում է Մալթայի կղզեխմբի մեծությամբ երկրորդ կղզու՝ Գոցոյի հյուսիսային մասում, Քբաջար ոչ մեծ ծովածոցի ափին։ Մտնում է Զաբուջ քաղաքային համայնքի կազմի մեջ։ Համարվում է Գոցո կղզու և ընդհանրապես Մալթայի Հանրապետության առավել սիրված հանգստավայրերից մեկը, որն իր ավազե լողափով, հյուրանոցների, սննդի և սպասարկման այլ օբյեկտների լայն ցանցով ու բարձրակարգ սպասարկմամբ գրավում է բազմահազար զբոսաշրջիկների ու հանգստացողների։