Հուստինոս Բ

Հուստինոս Բ, Բյուզանդական կայսրության կայսր։ Կառավարել է 565 – 578 թթ.։ Գահակալության սկզբնական շրջանում թեթևացրել է ժողովրդի ծանր կացությունը՝ մարելով պետությանը տրվելիք պարտքերի մի մասը։ Անհաջող փորձ է կատարել հարթելու երկաբնակների ու միաբնակների հակամարտությունը։ Նրա օրոք լանգոբարդները նվաճել են Իտալիայի զգալի մասը։ Պարսիկների դեմ 572-ին Հայաստանում բռնկած Վարդան Մամիկոնյանի (Կարմիր) ապստամբությունը և Կովկասի լեռնանցքների պահպանության համար Պարսկաստանին տրվելիք տարեկան 36000 դահեկանը վճարելուց կայսրության հրաժարվելը առիթ հանդիսացան բյուզանդա–պարսկական նոր պատերազմի։ Պարսիկները 573-ին Մծբինի մոտ ջարդեցին բյուզանդական զորքերը, գրավեցին Դարա սահմանամերձ կարևոր ամրոցը։ Բյուզանդական բանակը զգալի հաջողություններ ունեցավ, երբ այն գլխավորեցին «կեսար» (կայսերակից) Տիբերիոսը, ապա՝ զորավար Մավրիկիոսը (ապագա կայսրը) և նրա օգնական հայազգի զորավար Նարսեսը։ 575-ին Խոսրով I Անուշիրվանը ծանր պարտություն կրեց Մելիտենեում, բյուզանդական զորքերը մտան Հայաստան և Աղվանք, որը 576-ին հպատակություն հայտնեց կայսրությանը։ Գահակալման օրոք կորցրել է Հուստինիանոս Ա-ի նվաճումների մեծ մասը։

Վիքիպահեստն ունի նյութեր, որոնք վերաբերում են «Հուստինոս Բ» հոդվածին։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 6, էջ 683)։

Հուստինոս Բ
Բյուզանդական կայսրության կայսր
Իշխանություն	565-578
Հունարեն	Ιουστίνος Β'
Լատիներեն	Flavius Iustinus Iunior Augustus
Ծնվել է՝	մոտ 520
Ծննդավայր	Կոստանդնուպոլիս, Բյուզանդական կայսրություն
Մահացել է՝	հոկտեմբերի 4, 578 կամ հոկտեմբերի 5, 578
Վախճանի վայր	Կոստանդնուպոլիս, Բյուզանդական կայսրություն
Երկիր	Բյուզանդական կայսրություն
Հարստություն	Հուստինիանոսներ
Նախորդ	Հուստինոս Ա
Հաջորդող	Տիբերիոս Բ
Տոհմ	Հուստինիանոսների հարստություն
քաղաքական գործիչ
Մայր	Vigilantia?
Երեխաներ	Արաբիա և Տիբերիոս Բ
Հավատք	ուղղափառություն
Առողջական վիճակ	խելագարություն