From Wikipedia, the free encyclopedia
Ուիլյամ Էդվարդ Հեսլեմ (անգլ.՝ William Edward «Bill» Haslam, օգոստոսի 23, 1958, Նոքսվիլ, Թենեսի, ԱՄՆ), ԱՄՆ քաղաքական գործիչ, ԱՄՆ հանրապետական կուսակցության ներկայացուցիչ, Թենեսի նահանգի 49-րդ նահանգապետը (2011-2019)։
Ուիլյամ Հեսլեմ անգլ.՝ Bill Haslam | |
Կուսակցություն՝ | ԱՄՆ Հանրապետական կուսակցություն |
---|---|
Կրթություն՝ | Էմորիի համալսարան և Webb School of Knoxville? |
Մասնագիտություն՝ | քաղաքական գործիչ և ձեռնարկատեր |
Դավանանք | պրեսբիտերականներ |
Ծննդյան օր | օգոստոսի 23, 1958 (65 տարեկան) |
Ծննդավայր | Նոքսվիլ, Թենեսի, ԱՄՆ |
Քաղաքացիություն | ԱՄՆ |
Ի ծնե անուն | անգլ.՝ William Edward Haslam |
Հայր | Ջիմ Հասլեմ |
Մայր | Սինթիա Դեմինգ Հասլեմ[1] |
Ինքնագիր | |
Բիլ Հեսլեմը ծնվել է 1958 թվականին Նոքսվիլում։ Նա եղել է «Pilot» ընկերության հիմնադիր Ջիմ Հեսլեմի և նրա կնոջ՝ Սինտիի երրորդ երեխան։ Ջիմ Հեսլեմը գումար է հավաքել Հանրապետական կուսակցության համար, տասնամյակներ շարունակ եղել է Թենեսիի համալսարանի հովանավորը և վստահելի սեփականատերը[2]։
Նախնական կրթությունը ստացել է Նոքսվիլի մասնավոր համատեղ ուսուցման դպրոցում, որտեղ եղել է «Երիտասարդ կյանք» (անգլ.՝ Young Life) քրիստոնեական խմբի ակտիվիստ[3]։ 1980 թվականին նա ստացել է Էմորիի համալսարանում պատմության բակալավրի կրթություն, որտեղ եղել է «Beta Chi» եղբայրության անդամ[4]։
Դեռահասության շրջանում Հելսեմը կես դրույքով սկսել է աշխատել հոր ընկերությունում։ Նա ցանկացել է պատմություն դասավանդել և ապագայում նախարար դառնալ[4]։ Համալսարանն ավարտելուց հետո Հեսլեմը վերադարձել է Նոքսվիլ, որտեղ շարունակել է աշխատել «Pilot» ընկերությունում, որպեսզի ավելին իմանա բիզնեսի մասին նախքան դասընթացների գնալը, բայց արդյունքում որոշել է մնալ ընկերությունում[4]։ 1995 թվականին նա դարձել է ընկերության նախագահ, նրա եղբայրը՝ գլխավոր գործադիր տնօրեն, իսկ հայրը՝ վարչության նախագահ[4]։
1999 թվականին Հեսլեմը մտել է «Saks Fifth Avenue» ընկերություն՝ որպես էլեկտրոնային առևտրի բաժնի գլխավոր գործադիր տնօրեն[5]։ 2001 թվականին նա թողել է «Saks»-ը և ընդգրկվել «Harold Stores» հագուստի խանութների ցանցի տնօրենների խորհրդի կազմում[4]։
2002 թվականին Հեսլեմը հայտարարել է, որ առաջադրվելու է Նոքսվիլի քաղաքապետի պաշտոնում։ Անվանապես Հասլեմն առաջադրվել էր որպես անկուսակցական[6], սակայն այն ժամանակ նա արդեն Հանրապետական կուսակցության անդամ էր։ Նրա մրցակիցը՝ Մադելին Ռոջերոն, քննադատել է Հասլեմին՝ որպես նավթային ընկերության խամաճիկ։ 2003 թվականի սեպտեմբերի 30-ին համընդհանուր ընտրություններում Հասլեմը հաղթել է՝ հավաքելով ձայների 52%-ը՝ մրցակցի 46%-ի դիմաց[7][8]։ 2007 թվականին նա վերընտրվել է՝ հավաքելով ձայների 87%-ը[9]։
Քաղաքապետի պաշտոնում Հեսլեմն անցկացրել է պատմական և մշակութային հուշարձանների պաշտպանության միջոցառումների համալիր, պահպանել է քաղաքի կենտրոնում գտնվող «S&W Cafeteria» պատմական սրճարանը, քաղաքի կենտրոնում «Regal Riviera» նոր կինոթատրոն է կառուցել, ինչպես նաև վերականգնել է Բիժու թատրոնը։ 2008 թվականին նախագահ Ջորջ Բուշը նրան չորս տարի ժամկետով ընդգրկել է պատմական հուշարձանների պահպանության հարցերով խորհրդատվական խորհրդի կազմում[10]։ Հեսլեմը նաև օգնել է իրականացնել զարգացման գլխավոր ծրագիրը հարավային Նոքսվիլում։ Հեսլեմը հավասարակշռված բյուջետային քաղաքականություն է վարել, ինչը թույլ է տվել կրկնապատկել քաղաքի խնայողությունները նրա առաջին ժամկետի ընթացքում[9]։
2009 թվականի հունվարի 6-ին Հասլեմը հայտարարել է 2010 թվականին Թենեսիի նահանգի նահանգապետի պաշտոնում առաջադրվելու իր մտադրության մասին[11]։ 2010 թվականի օգոստոսի 5-ին կայացած բաց նախնական ընտրությունում նա հավաքել է ձայների 48%-ը և առաջ անցել իր մրցակիցներից՝ Զակ Վամպից (29%) և Ռոն Ռեմսիից (22%)[12]։ 2010 թվականի նոյեմբերի 2-ին կայացած համընդհանուր ընտրություններում Հասլեմը հաղթել է դեմոկրատական կուսակցության թեկնածու Մայք Մաքվիրթերին՝ հավաքելով ձայների 65%-ը՝ մրցակցի 35%-ի դիմաց։ Հանրապետականները նաև մեծացրել են իրենց թիվը նահանգի օրենսդիր ժողովի երկու պալատներում՝ 1869 թվականից ի վեր առաջին անգամ լիակատար վերահսկողություն ստանալով նահանգի իշխանության նկատմամբ։
Հեսլեմը հայտարարել է, որ աշխատատեղերի ստեղծումը և երկարաժամկետ տնտեսական աճը, ինչպես նաև կրթության բարեփոխումը և լրացուցիչ աշխատատեղերի ստեղծումն իր գլխավոր գերակայություններն են նահանգապետի պաշտոնում։ Նա հանդես է եկել ցածր հարկերի պահպանման օգտին՝ բիզնեսի համար բարենպաստ միջավայր ստեղծելու և պահպանելու նպատակով[13]։
Հեսլեմը աբորտների հակառակորդն է և դեմ է նույնասեռ ամուսնություններին, չնայած նա հայտարարել է, որ նախընտրում է, որ իր վարչակազմը ավելի շատ ուշադրություն դարձնի տնտեսությանն ու կրթությանը, այլ ոչ թե սուր սոցիալական հարցերին[14][15]։ Նա նաև հայտարարել է, որ կողմ է պատժամիջոցների կիրառմանը այն ձեռնարկությունների նկատմամբ, որոնք վարձում են անօրինական ներգաղթյալներին[14]։
2014 թվականի նոյեմբերի 4-ին Ռոն Ռեմսիի հետ նահանգապետի ընտրություններում կրկին հաղթել է՝ հավաքելով ձայների 70,3%-ը։ Նահանգապետի պաշտոնը ստանձնել է 2015 թվականի հունվարի 15-ին։
Բիլ Հեսլեմն իր ապագա կնոջ՝ Քրիսի Գարեթի հետ ծանոթացել է Էմորիի համալսարանում։ Նրանք ամուսնացել են 1981 թվականին, ունեն երկու աղջիկ և մեկ տղա։
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.