From Wikipedia, the free encyclopedia
Ճոու Ծիելուն (չինարեն՝ 周杰倫, փինյին Zhōu Jiélún, անգլ.՝ Jay Chou Chieh Lun, հունվարի 18, 1979[1], Linkou District, Taipei County, Թայվան և Թայբեյ, Թայվան[2]), թայվանցի չինարեն փոփ երաժշտության երգիչ, երաժիշտ, գործիքավորող, ձայնագրման պրոդյուսեր, աճպարար։
Ճոու Ծիելուն | |
---|---|
Ծնվել է | հունվարի 18, 1979[1] (45 տարեկան) |
Ծննդավայր | Linkou District, Taipei County, Թայվան կամ Թայբեյ, Թայվան[2] |
Քաղաքացիություն | Թայվան |
Կրոն | բողոքականություն |
Կրթություն | Tamkang High School? |
Մասնագիտություն | դերասան, երգիչ, երգերի հեղինակ, կոմպոզիտոր, ստուդիական երաժիշտ, կինոռեժիսոր, ռեփեր, երաժշտական պրոդյուսեր և ռեժիսոր |
Ամուսին | Հաննա Քվինգլիվան |
Պարգևներ և մրցանակներ | |
Jay Chou Վիքիպահեստում |
2000 թվականին Ճոու Ծիելունը թողարկեց իր առաջին՝ «Ջեյ» ալբոմը, որը պատկանում էր Ալֆա մյուզիք ձայնագրման ընկերությանը։ Այդ ժամանակից ի վեր նրա երաժշտությունը տարածվել է ամբողջ Ասիայում, հատկապես ասիական համայնքներում՝ Թայվանում, Չինաստանի մայրցամաքում, Մալայզիայում, Հոնկոնգում, Սինգապուրում, Ինդոնեզիայում, Հարավային Կորեայում, Ճապոնիայում և արևմտյան երկրներում, ինչպիսիք են ԱՄՆ-ը և Ավստրալիան։ Նա չինական երաժշտության պատմության ամենամեծ և ամենաազդեցիկ երաժիշտներից մեկն է ճանաչվել։ Ջեյ Չոուն Թայվանում վաճառել է ավելի քան 2,47 միլիոն ալբոմ և արժանացել բազմաթիվ երաժշտական մրցանակների, այդ թվում՝ Թայվանի 15 ոսկե մեղեդի և 2 MTV Ասիա մրցանակների։ Ջեյ Չոուն երգեր է գրել նաև այլ արտիստների համար։ 2003 թվականին նա հայտնվել է Time ամսագրի շապիկին (ասիական հրատարակություն), ապա իրականացրել է վեց համաշխարհային շրջագայություն։
Ջեյ Չոուն սկսել է իր կինոկարիերան «Սկզբնատառ Դ» (2005) ֆիլմում, ապա ներգրավվել է բազմաթիվ այլ կինոնախագծերում։ Ջեյ Չոուն նաև ղեկավարել է իր սեփական ձայնագրման և բրոքերային JVR Music ընկերությունը։ 2011 թվականին նա առաջին անգամ մտել է հոլիվուդյան ասպարեզ և մարմնավորել «Գրին Հորնեթ»-ի օգնական Կատոյին, ապա 2016 թվականին «Հիմա դու տեսնում ես ինձ 2» ֆիլմում խաղացել է Սիաո Լիի դերը։
Ջեյ Չոուն մեծացել է Թայպեյում (այժմ՝ Լինքոու շրջան, Նոր Թայպեյ քաղաք)[4]։ Նրա հայրը՝ Ճոու Յաոճոնը, այդ ժամանակ կենսաբանություն էր դասավանդում Լուճոուի ազգային դպրոցում[5], մայրը՝ Յե Հուեյմեյը, կերպարվեստի ուսուցչուհի էր Լինքոուի ազգային միջնակարգ դպրոցում։ Երբ նա տասնչորս տարեկան էր, ծնողներն ամուսնալուծվեցին, հայրը դարձավ խնամակալ։ Տասնութ տարեկան դառնալուց հետո Ջեյ Չոուն նախընտրեց ապրել իր մոր հետ[6]։ Մի անգամ Ջեյ Չոուն Հու Վանլինի վարած Թայվանի ժողովրդական հեռուստաալիքի «Թայվանական սիրավեպ» հաղորդաշարին տված բացառիկ հարցազրույցում պարզաբանել էր, որ «Հայրի՛կ, ես վերադարձել եմ»-ը միայն հասարակության մեջ ընտանեկան բռնության երևույթի ընկալումն էր և չէր վերաբերում ծնողների միջև տիրող իրավիճակին։ Հոր հարազատները ևս հարցրել էին նրան այդ մասին, նա պարզաբանել էր հարազատներին և ներողություն խնդրել թյուրիմացության համար[7]։
Ջեյ Չոուն մանկուց մեծ հետքրքրություն է ցուցաբերել երաժշտության նկատմամբ, սիրել է նմանակել երգիչներին, դերասաններին և կախարդական հնարքներ է կատարել։ Նա դաշնամուր է նվագել երեք տարեկանից։ Ջեյ Չոուն ապրել է Թայպեյ քաղաքի Կուանհուա առևտրի կենտրոնի մոտակայքում և սովորել է Ճոնսյաո հիմնական դպրոցում։ Երբ նա սովորում էր Ծինհուա ազգային միջնակարգ դպրոցում[8], ծնողները որոշեցին ամուսնալուծվել տարիներ շարունակ վեճերի պատճառով, ինչը մեծապես ազդեց Ջեյ Չոուի խառնվածքի վրա։ Երաժշտությունից բացի Ջեյ Չոուն շատ էր սիրում բասկետբոլ։ Միջնակարգ դպրոցում նա միանում է բասկետբոլի թիմին և ծանոթանում է բարձր դասարանի աշակերտ Չըն Ծիենճոուի հետ։
Ավագ դպրոցի հետ մեկտեղ սովորել է Թայպեյ շրջանի Տանծիան մասնավոր միջնակարգ դպրոցի երաժշտության առաջին բաժնում (ի սկզբանե ցանկանում էր դիմել Հուական արվեստի դպրոց, բայց բաց էր թողել գրանցման ժամանակահատվածը։ Բարեբախտաբար Տանծիան միջնակարգ դպրոցը ստեղծել էր նոր երաժշտական բաժին)։ Նա մասնագիտացավ դաշնամուրի և թավջութակի ոլորտներում՝ ամուր հիմքեր դնելով երաժշտության հետագա զարգացման վրա[5]։ Երբ Ջեյը դեռահաս էր, հաճախ էր ցույց տալիս դաշնամուրի իր հմտությունները՝ գրավելու աշակերտուհիների ուշադրությունը։ Այնուամենայնիվ, ակադեմիական առաջադիմությունն այդքան էլ լավ չէր, ուստի, երբ ավարտեց ավագ դպրոցը, ձախողեց քոլեջի ընդունելության քննությունները։ Ջեյը նաև տառապում է անկիլոզացնող սպոնդիլոարթրիտով և ազատվել է պարտադիր զինվորական ծառայությունից՝ համաձայն Թայվանի զորակոչային համակարգի[9]։
Ջեյ Չոուն մի անգամ ասել է, որ երիտասարդ ժամանակ իր վրա ազդել է Հոնկոնգի երաժշտական աշխարհի «Չորս Երկնային Արքաներից» մեկի՝ Ջեքի Չունի «Kiss Goodbye» ալբոմը, ուստի նա սկսել է կենտրոնանալ փոփ երաժշտության վրա[10]։ Նա նաև խոստովանել է, որ բացի Ջեքի Չունից, իր աճի և զարգացման վրա խորը հետք են թողել Շոպենը, Լի Շուցյուենը և Սթիվի Ուանդերը։ 2005 թվականի ալբոմի անվանումն էր «Շոպենը նոյեմբերին»։ 2007 թվականի «Գաղտնիք, որ չի կարելի ասել» ֆիլմում դաշնամուր նվագելու դրվագը մեծամասամբ վերաբերում էր Շոպենին՝ արտահայտելով նրա հանդեպ հարգանքը։ Ամեն անգամ, երբ Լի Շուցյուենը հայտվնում էր հեռուստատեսությամբ, Ջեյ Չոուն հեռուստացույցի առաջ կրկնօրինակում էր նրան։ Սթիվի Ուանդերի «I just call to say I love you» երգը Ջեյ Չոուի հորեղբոր կինը նվագել էր հորեղբոր հուղարկավորության ժամանակ։ Քանի որ Ջեյի երաժշտական հիմքն ամուր է, փոփ երաժշտության մեջ նա իրեն զգում է ինչպես ձուկը ջրում։
2001 թվականից տարածվել են խոսակցություններ, որ նա Ջոլին Ցայի հետ սիրային կապի մեջ է եղել[11]։ Մինչև 2005 թվականի չինական Նոր տարին Ջեյ Չոուն լուսանկարվել է հոնկոնգյան «Sudden Weekly» ամսագրում և Տոկիոյում ճանապարհորդել է Time TV-ի հեռուստահաղորդավարուհի Հոու Փեյցընի հետ, ում հետ էլ մտերմիկ հարաբերությունների մեջ է եղել[12]։ Ավելի ուշ Ջեյ Չոուն մամուլի ասուլիսում խոստովանել է, որ հետապնդել է Հոու Փեյցընին և հերքել է նախկինում Ջոլին Ցայի հետ իր սիրային կապի մասին լուրերը[13]։ Հետագայում լրագրողները հարցազրույց են վերցրել նրա ընկերներից՝ Ճան Լուոծյունից և Ջոլին Ցայի հորից։ Ընկերներն ասել են, որ նրանք միասին են եղել, բայց վաղուց բաժանվել են[14][15]։ Այնուամենայնիվ 2006 թվականին նրանք երկուսն էլ հերքեցին Հոու Փեյցընի հետ սիրային կապը[16][17]։ Մինչդեռ Ջոլին Ցայը 2010 թվականին Թաո Ծինինին տված բացառիկ հարցազրույցում խոստովանել է, որ այդ ժամանակ լրատվամիջոցներից Ճոու Հոուլիենի մասին լուրն իմանալուց հետո, ատելությամբ է լցվել Ջեյի նկատմամբ մի ամբողջ տարի և միայն 2008 թվականին աստիճանաբար սկսել է հանգստանալ[18]։
2006 թվականին Ջեյ Չոուն նկարահանվել է «Գաղտնիք, որ չի կարելի ասել» ֆիլմում, որից հետո լուրեր են տարածվել Ցըն Քայսյուենի հետ սիրավեպ ունենալու մասին, և բացի այդ Ցըն Քայսյուենը նաև նկարահանվել է Ջեյ Չոուի «Ես արժանի չեմ» տեսահոլովակում։
2006 թվականին նա մեկնել է Մեծ Բրիտանիա՝ նկարահանելու «Գլուխ յոթերորդ» նոր երգը, որը թողարկվել է սովորելու նպատակով Անգլիա մեկնած Հիբիի ծննդյան օրը, նրանք միասին շրջագայել են Լոնդոնով։
«Ամենաերկար ֆիլմը» երաժշտական տեսահոլովակում Ծյան Յուչընի գլխավոր հերոսուհի դառնալուց հետո 2008 թվականին նրանց միջև սիրավեպ սկսվեց։
Քուըն Լինը ճանաչել է Ջեյ Չոուին դեռ տասնչորս տարեկանում (2007թ.), երբ նրան ներկայացրին աշխատելու Ջեյ Չոուի ներդրած հագուստի և աքսեսուարների խանութում։ 2010 թվականի «Ինչպե՞ս ես» տեսահոլովակի նկարահանումների ժամանակ Քուըն Լինը ընտրվեց գլխավոր հերոսուհի։ Այդ ժամանակ նրանք սիրային կապի մեջ էին։ 2011 թվականի օգոստոսին շաբաթաթերթը լուսանկարել է նրանց միասին ճանապարհորդելիս և ընթրելիս Եվրոպայում, որը բացահայտել է իրենց միջև եղած հարաբերությունները, սակայն Ջեյ Չոուն բոլորովին չի ընդունել այդ հարաբերությունները[19]։ Այնուամենայնիվ, որպեսզի Քուըն Լինի հետ հարաբերությունները պահպաներ, Ճոուն տեսահոլովակից ամբողջությամբ ջնջեց նրան և գտավ նոր գլխավոր հերոսուհու նորից նկարահանելու համար[20]։ Ջեյ Չոուն գովել է Քուըն Լինին որպես շատ բարի և սրտացավ անձնավորություն։ Նա խելացի էր և գիշերային ակումբներ չէր այցելում, ուտելիք էր պատրաստում Ջեյ Չոուի և իր մոր համար։ Հատկապես, երբ Ջեյը անկիլոզացնող սպոնդիլիտի նոպաներ էր ունենում, Քուըն Լինը ուղեկցում և ուշադիր խնամում էր նրան, ուստի Ջեյ Չոուն որոշեց ամուսնանալ նրա հետ[21]։
2014 թվականի հոկտեմբերին նա Քուըն Լինի և լուսանկարչական անձնակազմի հետ մեկնեց Գերմանիա, Պրահա և Փարիզ՝ հարսանեկան լուսանկարներ անելու[22][23]։ Նույն թվականի նոյեմբերի 17-ին գիշերվա ժամը երեքին Ջեյ Չոուն պաշտոնապես հայտարարեց իր և Քուըն Լինի միջև եղած սերը «MRJ Taiwan Official» պաշտոնական միկրոբլոգի միջոցով և հրապարակեց վեց ամիս առաջ Քուըն Լինի հետ իր երջանիկ ճանապարհորդության լուսանկարները։ Սա առաջին դեպքն է, երբ Ջեյ Չոուն պաշտոնապես խոստովանել է իր սերը[24]։ Դեկտեմբերի քսանհինգին Ջեյ Չոուն խոստովանեց, որ Մեծ Բրիտանիայում ամուսնության առաջարկություն է արել իր սիրելիին՝ Քուըն Լինին[25]։ Ամուսնության առաջարկության ժամանակ հրավառություն է եղել, և Քուըն Լինը հուզվել է[26][27]։ Ջեյ Չոուն և Քուըն Լինը ամուսնացել են 2015 թվականի հունվարի 17-ին Անգլիայի Յորքշիր շրջանում, 2015 թվականի փետրվարի 9-ին Թայպեյում[28] և 2015 թվականի մարտի 9-ին Ավստրալիայում[29]։ Ջեյ Չոուի երեք հարսանիքներին էլ չէր հրավիրվել Ու Ծոնսյանը՝ Ջեյի դեբյուտի նշանավոր անձնավորությունը, ինչը Ու Ծոնսյանին վիրավորել էր[30]։ Javier Music բրոքերային ընկերությունը հայտնել է, որ Ջեյ Չոուի մայրը չի ցանկացել հրավիրել Ու Ծոնսյանին[31]։
2015 թվականի հունվարի 17-ի հարսանիքի նախօրեին Ջեյ Չոուն իր պաշտոնական ֆեյսբուքյան էջում «周杰倫Jay Chou(Արխիվացված 2021-02-03 Wayback Machine)» ծանուցել է, որ նա և Քուըն Լինը 2014 թվականին գրանցել են իրենց ամուսնությունը, և հրապարակել է հարսանեկան լուսանկարներ։ Նրանք երկուսն էլ քրիստոնյաներ են[32][33][34]։ Ջեյ Չոուն և Քուըն Լինը քրիստոնեական հարսանիք են արել Թայվանի ժամանակով հունվարի 18-ի կեսգիշերին (Մեծ Բրիտանիայի ժամանակով հունվարի 17-ին ցերեկվա ժամը երեքին) և Անգլիայի Յորքշիր շրջանի Սելբի ծխական եկեղեցում պաշտոնապես դարձել են կին և ամուսին[35][36]։ Հարսանիքը կայացել է Ջեյ Չոուի գրած հարսանեկան երգի ներքո (2 րոպե) քսան նվագախմբի նվագակցությամբ, և երկու կողմի ծնողները ներկա են եղել արարողությանը[37]։ Խաչեղբայրներից Ջեյի մտերիմ ընկերներ դերասան Ցյո Քայվեյը և ֆիթնեսի մարզիչ Հաո Քըն էին, իսկ հարսնաքույրերը կնոջ լավ ընկերներ Ֆան Ճըյոուն և Սուն Րուեյն էին[38][39]։ 2015 թվականի ապրիլի 2-ին Ջեյ Չոուն լուսանկարներ է հրապարակել իր ֆեյսբուքյան էջում հաստատելով, որ իր կինը՝ Քուըն Լինը, հղի է։ Ավագ դուստրը ծնվել է 2015 թվականի հուլիսի 10-ին[40][41][42][43], որդին՝ Ռոմեոն, ծնվել է 2017 թվականին, իսկ 2022 թվականի հունվարի 18-ին Ջեյ Չոուն և Քուըն Լինը ինստագրամում հայտնեցին իրենց երրորդ երեխա ունենալու ուրախ լուրը։ Նույն թվականի մայիսի 6-ին նրանք հայտնեցին իրենց փոքր դստեր՝ Ջասինդայի ծննդյան լուրը։ Մինչ օրս նրանք ունեն մեկ տղա և երկու դուստր։
Ջեյ Չոուն առաջին անգամ հայտնվեց էկրանին 1997 թվականի օգոստոսին, երբ ավագ դպրոցի աշակերտները մասնակցում էին TVBS-G-ի «Super New Talent King» տաղանդների շոուին։ Նա նվագում էր դաշնամուր։ Թեև ուսանողները երգարվեստում մրցանակ չշահեցին, հաղորդավար Ու Ծոնսյանը խորապես տպավորված էր Ջեյ Չոուի կատարմամբ և համարում էր, որ նա ունի հեռանկարներ մուտք գործելու երաժշտական աշխարհ։ Ու Ծոնսյանը չափազանց վստահ էր Ջեյ Չոուի վրա և խորհուրդ էր տվել նրան կենտրոնանալ երգեր գրելու վրա։ Թեև Ջեյ Չոուն շատ երգեր է գրել սկզբնական շրջանում, այնուամենայնիվ դեռևս կան երգեր, որոնք այլոց կողմից չեն ընդունվել և մերժվել են։ Օրինակ՝ Էնդի Լաուի «Արցունքները գիտեն (眼泪知道)» և Ճան Հուեյմեյի «Նինջա (忍者)» երգերը։ Ու Ծոնսյանը ամեն կերպ աջակցել է Ջեյ Չոուին։ Ու Ծոնսյանի ընկերությունում (Ալֆա մյուզիք) ամենաշատը Ջեյ Չոուի ձայնագրություններն են եղել, և Ջեյը հայտնվել է նրա բոլոր ծրագրերում։ Այդ ժամանակ Ջեյ Չոուի երգերը մեծ տարածում են գտել և նա դարձել է իսկական ասիական գերաստղ։ Ջեյը մի անգամ «Ոսկե մեղեդի» մրցանակաբաշխության ժամանակ ասել է, որ առանց Ու Ծոնսյանի չէր լինի նաև Ջեյ Չոու։
1998 թվականին Ջեյ Չոուն հրապարակեց իր գրած առաջին երգը՝ «Երեք գիշեր և երեք օր (三暝三日)», որը կատարեց Ու Ծոնսյանը։
1999 թվականին «Անձրևի ձայնը (落雨聲)» Ջեյ Չոուի գրած առաջին վաճառված և հայտնի ստեղծագործությունն է, որը կատարել է Ծիան Հուեյը։ Ինչպես նաև Ջեյն առաջին անգամ համագործակցել է սցենարիստ Վինսենթ Ֆանի հետ։ Ալֆա մյուզիքում միայն Ջեյ Չոուի և Վինսենթ Ֆանի (գնահատված Ու Ծոնսյանի կողմից) գրած ստեղծագործություններն են ամենահայտնին։ Նրանց միջև համագործակցությունը անտեսանելիորեն հաղթական հիանալի «օրենք» է ձևավորել[5]։
Ալֆայի գործադիր տնօրեն Յան Ծյունրոնը այն նշանավոր մարդն է, որն ստիպել է Ջեյ Չոուին դուրս գալ հեռուստատեսություն։ Մի անգամ Յան Ծյունրոնը պատահաբար լսում է Ջեյի «Հմայիչ կին (可愛女人)» երգի ձայնագրությունը և գալիս է այն եզրակացության,որ Ջեյ Չոուն թողարկի այդ երգի տեսահոլովակը,ապա համոզում է նրա ղեկավար Ու Ծոնսյանին։ Ի վերջո հավանություն ստանալուց հետո 2000 թվականին Ջեյ Չոուն պայմանագրի բովանդակության համաձայն գրում է հիսուն երգ, ապա Ու Ծոնսյանն ընտրում է տասը երգ և սկսում զբաղվել Ջեյի առաջին ալբոմով։ Ու Ծոնսյանը տրամադրում է նոր թայվանական քառասուն միլիոն դոլլար՝ որպես ալբոմի ստեղծման ֆոնդի մի մաս։ Ջեյ Չոուի առաջին երաժշտական ալբոմը, որը կոչվում է «Ջեյ», թողարկվեց նույն տարվա նոյեմբերին։ Այդ ալբոմն ունի տարբերվող, շուկայականին գերազանցող երաժշտական ոճ, որի ժանրը միավորում է Ռիթմ ընդ բլյուզ, Հիփ Հոփ, դասական և «չինական ոճը»[5],և նախ և առաջ ձևավորում է Ջեյ Չոուի «Ճոու ոճ» երաժշտական կերպարը[5]։ Բացի իր համար երաժշտական ալբոմներ ստեղծելուց, խմբագրելուց և տպագրելուց, Ջեյ Չոուն նաև երաժշտություն է գրել այլ երգիչների համար, ինչպիսիք են հայտնի երգիչներ S.H.E-ն, Չըն Սյաոչունը, Էնդի Լաուն և այլն։
2001 թվականի սեպտեմբերին նա թողարկեց իր երկրորդ «Երևակայություն (范特西, Fàn tè xī)» ալբոմը, որի անունը գալիս է անգլերեն «Fantasy» բառի տառադարձությունից[44]։ Այս ալբոմով 2002 թվականին Թայվանի 13-րդ «Ոսկե մեղեդի» մրցանակաբաշխության ժամանակ Ջեյ Չոուն արժանացել է «Լավագույն կոմպոզիտոր», «Լավագույն ալբոմի պրոդյուսեր», «Լավագույն փոփ երաժշտության երգիչ» և այլ հինգ մեծ մրցանակների[45]։
2002 թվականի հուլիսին նա թողարկեց իր երրորդ ալբոմը՝ «Օկտավայի տարածք (八度空间)»: Սեպտեմբերի 28-ին Թայպեյի եռաչափ մարզադաշտում մեկնարկեց «THE ONE» անհատական առաջին համաշխարհային շրջագայությունը։
2003 թվականի հուլիսին Ասիայի ավելի քան 50 ռադիոկայաններ հուլիսի 16-ը սահմանեցին որպես «Ջեյ Չոուի օր» և հեռարձակեցին նրա չորրորդ նոր ալբոմի՝ «Yeh Hui-Mei»-ի գլխավոր հիթը՝ «Հոր անունով (以父之名)»-ը[46]։ Հետագայում յուրաքանչյուր ալբոմ պետք է ունենար մի չինական ոճի երգ։
2004 թվականի հուլիսին նա թողարկեց իր հինգերորդ «Անուշաբույր օսմանթուս (七里香)» ալբոմը և առաջին անգամ արժանացավ Համաշխարհային երաժշտական մրցանակաբաշխության «Լավագույն հանրաճանաչ երգիչը Մեծ Չինաստանում» մրցանակի[47]։ Միևնույն ժամանակ, ըստ Ֆոնոգրամ արտադրողների միջազգային ֆեդերացիայի վիճակագրության, «Անուշաբույր օսմանթուս» ալբոմի վաճառքի ծավալը աշխարհում 42-րդն է[48]։ Նույն թվականին ալբոմն առաջին անգամ հայտնվեց Չինաստանի ամանորյա գալա-համերգում՝ «Լոն Ցյուեն (Dragon Fist)» երգով։
2005 թվականի նոյեմբերին նա թողարկեց իր վեցերորդ երաժշտական ալբոմը՝ «Շոպենը նոյեմբերին»։ Այս ալբոմից հետո Ջեյ Չոուն դարձավ ձայնագրման պրոդյուսեր և փորձեց նկարահանել իր երգերից մի քանի տեսահոլովակներ։
2006 թվականի սեպտեմբերին թողարկվեց իր «Երևակայություն ինչպես նախկինում (依然范特西)» յոթերորդ երաժշտական ալբոմը։ Ալբոմում չինական ոճի «Հազարավոր մղոններ հեռավորության վրա» երգը Ջեյ Չոուն կատարել է երգիչ Ֆեյ Յուցինի հետ։
2007 թվականի ապրիլին ստեղծվել է Javier Music (JVR) ընկերությունը, որը համատեղ հիմնադրվել է Ջեյ Չոուի և նրա երկարամյա գործընկերներ Վինսենթ Ֆանի և Յան Ծյունրոնի կողմից։ Նոյեմբերի 2-ին նա թողարկեց իր ութերորդ երաժշտական ալբոմը՝ «Ես շատ զբաղված եմ (我很忙)»: 2007 թվականի նոյեմբերի 24-ին Ջեյ Չոուն անցկացրեց իր համաշխարհային շրջագայության համերգը Չինաստանի Շանհայ քաղաքի ութսուն հազար տեղերի հասնող մարզադաշտում։ Միևնույն ժամանակ Ջեյ Չոուի երկու համաշխարհային շրջագայության «THE ONE» և «Unmatched (Բացառիկ)» համերգները տեղի են ունեցել Կոնեկտիկուտում, Լոս Անջելեսում, Լաս Վեգասում, Կանադայում, Ավստրալիայում, Տոկիոյում, Սինգապուրում, Կուալա Լումպուրում, Մալայզիայում, Բանգկոկում, Հոնկոնգում, Թայվանում, մայրցամաքային Չինաստանում և այլ երկրներում ու տարածաշրջաններում։
2008 թվականին նա թողարկեց իր իններորդ «Այծեղջյուր» ալբոմը։ Փետրվարի 16-ին նա երկու անգամ անընդմեջ համերգ անցկացրեց Ճապոնիայի Նիպպոն Բուդոկան կոչվող արենայում՝ դառնալով երկրորդ չինացի երգիչը, որը երգում է այնտեղ Վան Ֆեյից հետո։ Սեպտեմբերին արտիստներ Վան Ֆեյից, Վան Լիհոնից, Ճան Հուեյմեյից, Ծինչըն Ուից և F4-ից հետո, նա դարձավ CNN-ին բացառիկ հարցազրույց տված վեցերորդ չինացի աստղը[49]։ Նոյեմբերին Մոնակոյում կայացած Համաշխարհային երաժշտական մրցանակաբաշխությունում «Ես զբաղված եմ» ալբոմով նա արժանացել է «Լավագույն արտիստը Մեծ Չինաստանում» մրցանակին և գերազանցել է երգի աստված Ջեքի Չունին՝ նվաճելով երկու տիտղոս։ Բացի այդ 2004 թվականին Ջեյ Չոուն չորս անգամ արժանացել է Համաշխարհային երաժշտական մրցանակաբաշխության «Լավագույն արտիստը Մեծ Չինաստանում» մրցանակին[50]։
2009 թվականի հուլիսին ավարտվեց «2007 համաշխարհային շրջագայությունը», և Ավստրալիայում կայացած Սիդնեյի համերգը զբաղեցրեց երկրորդ տեղը ԱՄՆ-ի գովազդային վահանակում։
2010 թվականին նա թողարկեց իր տասներորդ «Cross The Era» ալբոմը և անցկացրեց իր «Լավագույն դարաշրջան» համերգը Թայպեյում 2010 թվականի հունիսի 11-ին։
2011 թվականի փետրվարին Ջեյ Չոուն և ԱՄՆ-ի Բասկետբոլի ազգային ասոցացիայի գերաստղ Կոբի Բրայանտը միևնույն ժամանակ նկարահանեցին Սփրայթ խմիչքների գովազդը և «Spark (天地一鬥)» գովազդային տեսահոլովակը։ Երգի պրեմիերան տեղի է ունեցել Կալիֆոռնիայի Լոս Անջելես քաղաքում 2011 թվականի փետրվարի 21-ին[51]։
2012 թվականի սեպտեմբերի 22-ին Ջեյ Չոուն երգեց Սինգապուրի F1 (Ֆորմուլա 1-ի աշխարհի առաջնություն) մրցաշարում։ Դեկտեմբերի 28-ին Ջեյ Չոուն թողարկեց իր 12-րդ նոր ալբոմը՝ «Տասներկու նոր աշխատանքներ»։
2013 թվականի մայիսի 17-ին Չինաստանի Շանհայ քաղաքի Mercedes-Benz մշակութային կենտրոնում մեկնարկեց Ջեյ Չոուի չորրորդ համաշխարհային շրջագայության «Մո Թիենլուն» համերգը։
2014 թվականի դեկտեմբերի 26-ին նա թողարկեց իր 13-րդ երաժշտական ալբոմը՝ «Aiyo, Not Bad»։
2015 թվականի հունվարի 29-ին նորապսակ Ջեյ Չոուն իր միկրոբլոգում հայտնել է, որ դարձել է «Չինաստանի ձայնը» երաժշտական հեռարձակման չորրորդ եթերաշրջանի ժյուրի[52]։ Հունիսի 2-ին տեղի ունեցավ «Չինաստանի ձայնը 4»-ի մամուլի ասուլիսը, որում Ջեյ Չոուն բացահայտեց, որ իր գլխավորած թիմի մասնակիցներից մեկին պաշտոնապես որոշել է առաջին տեղը հատկացնել նախապատրաստվող երաժշտական-պարային համարին մասնակցելու համար, և Ջեյ Չոուն էլ կլինի բեմադրողը։
2016 թվականի հունիսի 24-ին նա թողարկեց իր 14-րդ երաժշտական ալբոմը՝ «Jay Chou's Bedside Story»-ին։
2018 թվականի հունվարի 18-ին 39-ամյակը նշելու համար նա յոթ օր ծախսեց «Սպասում եմ դասի ավարտին (等你下課)» վերնագրով սինգլը ձայնագրելու համար, որն էլ նվեր էր երկրպագուների համար։ 2018 թվականի մայիսի 15-ին տեղի ունեցավ «Մի՛ սիրիր ինձ ու հետո կործանիր (不爱我就拉倒)» սինգլի պաշտոնական պրեմիերան։
2019 թվականի սեպտեմբերի 16-ին թողարկվեց նոր երգ՝ «Մի՛ լացիր (说好不哭)» վերնագրով, որը Ջեյ Չոուն երգում էր Ասինի հետ։ YouTube-ում դիտողների թիվը երկու օրվա ընթացքում գերազանցեց տասը միլիոնը։
2019 թվականի դեկտեմբերի 12-ին թողարկվեց նոր սինգլ «Ես այդպես եմ կարծում (我是如此相信)» վերնագրով, որը «Թիենհուո» ֆիլմի գլխավոր երգն է։
2020 թվականի փետրվարի 23-ին նա օգնեց իր կուռքին՝ Ջեքի Չունին (փոփ երաժշտությամբ զբաղվելու հիմնական պատճառը), գրել երաժշտություն, իսկ նրա լավ ընկերը՝ Վինսենթ Ֆանը, գրեց երգի բառերը՝ հույս ունենալով մխիթարել մարդկանց սրտերն ու համատեղ պայքարել քովիդ-19-ի դեմ։
2020 թվականի հունիսի 12-ին թողարկվեց նոր սինգլ «Մոհիտո» վերնագրով։
2022 թվականի հունիսի 19-ին YouTube-ում թողարկվեց վավերագրական ֆիլմ նրա՝ Փարիզ մեկնելու և նոր ալբոմ ստեղծելու մասին։ Վավերագրական ֆիլմի վերջում ֆրանսերեն նշվել է, որ նոր ալբոմը կթողարկվի հուլիսի 15-ին[53]։ Միևնույն ժամանակ լրատվամիջոցները բացահայտել են, որ նոր ալբոմը ստացել է «Լավագույն ստեղծագործություն» անվանումը[54]։
2022 թվականի հուլիսի 6-ին YouTube-ում և Bilibili-ում թողարկվեց «Լավագույն ստեղծագործություն» ալբոմի առաջին տեսահոլովակը[55][56]։ Ինը օր անց թողարկվեց երկրորդ երգը՝ «Դեռ թափառում է (还在流浪)»-ը[57][58]։
Ջեյ Չոուի՝ կինոինդուստրիա մուտք գործելն անսպասելի էր[59], քանի որ իր ավագ դպրոցի անգլերենի ուսուցիչը կարծում էր, որ նա չունի դեմքի համապատասխան միմիկաներ։ Դրանից հետո նա նկարահանվել է վեց ֆիլմերում։ Ջեյ Չոուն մի անգամ ասել է, որ ապրում է երաժշտության շնորհիվ[60]։ Նա մտավ կինեմատոգրաֆիա, քանի որ զգում էր, որ իրեն պետք են նոր մարտահրավերներ։ Երկրպագուներին անհանգստացրել էր այն, որ կինոկարիերան ազդեցություն կունենար նրա երաժշտական կարիերայի վրա։ Ջեյ Չոուն բազմիցս վստահեցրել է, որ ֆիլմը միայն ոգեշնչման աղբյուր է և նա չի շեղվի։ Միաժամանակ նա նաև գիտակցում էր կարիերայում հավասարակշռություն պահելու անհրաժեշտությունը[59][61][62]։
2003 թվականին Ճոու Ծիելունի «Փնտրում եմ Ջեյ Չոուին» ֆիլմի ռեժիսորն ասել է, որ նրա ուժեղ անհատականությունն իրեն լավ դերասան չի դարձնի[63]։
2005 թվականի հունիսի 23-ին Ջեյ Չոուն իր առաջին կինոնկարում՝ «Սկզբնատառ Դ»-ում, գլխավոր դերակատար էր։ Նա որպես լավագույն դերասան պաշտոնապես մուտք գործեց կինեմատոգրաֆիա և արժանացավ Հոնկոնգի կինոմրցանակին և Թայվանի «Ոսկե ձի» կինոմրցանակին[64][65]։ Սա թույլ է տալիս նրան սկսել իր առաջին աշխատանքը և շփվել ճապոնացի հանդիսատեսի հետ[66]։ Այս ֆիլմը ճապոնական կոմիքսների հիման վրա է նկարահանվել։ Ջեյ Չոուն խաղացել է վարորդ Ֆուջիվարայի դերը, որը լուռ էր և հազվադեպ էր խոսում իր տաղանդների մասին։ Որոշ քննադատներ համարում էին նրա դերն անճաշակություն[67], իսկ մյուսները կարծում էին, որ նրա դերը բնական է, քանի որ կերպարը նման է Ջեյ Չոուին[68][69]։ Նա «Սկզբնատառ Դ» ֆիլմում արժանացել է Հոնկոնգի կինոմրցանակաբաշխության ամենահեղինակավոր մրցանակին և «Ոսկե ձի» մրցանակին[70][71]։
2006 թվականին Ջեյ Չոուն իր երկրորդ «Ոսկե ծաղիկի անեծքը» ֆիլմում մարմնավորել է արքայազն Յուան Ծիեին։ Ֆիլմում նա փորձել է ցույց տալ Չինաստանի ավանդական արժեքներից «որդիական բարեպաշտությունը»։ Հյուսիսային Ամերիկայի հանդիսատեսը միջազգային ասպարեզ դուրս եկած այս ֆիլմով ճանաչեց Ճոու Ծիելունին։ Չինացի կինոքննադատները մեկնաբանել են նրա խաղը «հաջորդականության և լարվածության բացակայությունից»[72] մինչև «չափանիշը չկորցնելը»[73], մինչդեռ Արևմուտքի կինոքննադատները նրա խաղը շատ սովորական են համարել[74][75][76][77][78]։ Ճոու Ծիելունը «Ոսկե ծաղիկի անեծքը» ֆիլմի համար 2007 թվականին Հոնկոնգի 26-րդ կինոմրցանակաբաշխության ժամանակ համարվել է լավագույն դերասան[79]։
2007 թվականին էկրաններ դուրս եկավ Ջեյ Չոուի առաջին սցենարիստական և ռեժիսորական «Գաղտնիք, որը չի կարելի ասել» ֆիլմը։ Ֆիլմի երաժշտության մեծ մասը նույնպես գրել է Ջեյ Չոուն։ Ֆիլմը դուրս է եկել էկրաններ Հարավային Կորեայում 2008 թվականի հունվարի 10-ին։
2008 թվականին Ջեյ Չոուն «Կունգ ֆու սլեմ դանկ» ֆիլմում խաղացել է շնորհալի ուսանողի դեր։ 2009 թվականին Ջեյ Չոուն և այդ ժամանակների թայվանցի սուպերմոդել Լին Չիլինը համատեղ նկարահանեցին «Գանձերի դամբարան» ֆիլմը և այնտեղ հանդես եկան որպես գլխավոր դերասաններ[80]։
2011 թվականին ԱՄՆ-ում Ջեյ Չոուն «Գրին Հորնեթ» 3D ֆիլմում մարմնավորել է օգնական Կատոյին։ Սա նրա դեբյուտն էր Հոլիվուդում։ Ֆիլմը պաշտոնապես էկրաններ է բարձրացել ԱՄՆ-ում հունվարի 14-ին, իսկ Թայվանում՝ հունվարի 28-ին[81][82]:Բացի այդ իր երկրորդ «Երևակայություն» ալբոմի դասական «Նունչակի» երգը դարձավ «Գրին Հորնեթ» ֆիլմի վերջնական երգ և հեռարձակվեց ամբողջ աշխարհում[83]։
2013 թվականի հուլիսի 11-ին «Տանիք» ֆիլմը միաժամանակ թողարկվել է Թայվանում, մայրցամաքային Չինաստանում և Սինգապուրում, որը Ջեյ Չոուի երկրորդ ստեղծած և նկարահանած ֆիլմն է 2007 թվականի «Գաղտնիք, որը չի կարելի ասել» ֆիլմից հետո։ Գլխավոր հերոսուհին Լի Սինայն է։ Միևնույն ժամանակ ֆիլմում խաղացել են մոտ ընկերներ Էրիկ Ցանը, Ճոն Ճընթաոն, Քը Յոլունը և այլն[84]։ Ֆիլմը բարձր է գնահատել նաև չինացի ռեժիսոր Ճան Իմոուն։
2014 թվականի նոյեմբերի 5-ին պաշտոնական կայքերում հրապարակվեց հոլիվուդյան «Հիմա դու տեսնում ես ինձ 2» ֆիլմի դերասանական կազմը։ Ճոու Ծիելունը «Գրին Հորնեթ» ֆիլմից հետո նորից խաղաց հոլիվուդյան ֆիլմում, որը թողարկվեց 2016 թվականի հունիսին։ Ֆիլմի հիմնական երգը Ջեյ Չոուի «Հիմա դու տեսնում ես ինձ» երգն էր, որն էլ ներառեց իր անձնական ալբոմում։ Միաժամանակ նրա «Գլխացավով ներքինի» և «Շատ մեծ կոշիկներ» երգերը նույնպես եղել են ֆիլմում[85]։
2015 թվականի մայիսի 11-ին Թայպեյում տեղի ունեցած մամուլի ասուլիսում հայտարարվեց, որ «Տասը հազար կիլոմետր» ֆիլմի պրոդյուսերը Ջեյ Չոուն է, իսկ ռեժիսորը՝ Կաննի կինոփառատոնում ճանաչում ստացած ծագումով չինացի հոլիվուդյան նոր ռեժիսոր Հոն Շընյանը։ Նախնական տվյալներով ֆիլմը պետք է թողարկվեր Թայվանում, Մայրցամաքային Չինաստանում և Հոնկոնգում 2016 թվականի դեկտեմբերից մինչև հաջորդ տարվա հունվար։
2015 թվականի սեպտեմբերի 22-ին Ջեյ Չոուն հաստատեց, որ միանում է «Կունգ Ֆու Պանդա 3»-ի կրկնօրինակմանը։ Նա մարմնավորելու էր ոսկե կապիկին՝ կունգ ֆուի հինգ վարպետներից մեկին։ Սա երկրորդ անգամն է, որ Ջեյ Չոուն մասնակցել է կրկնօրինակմանը (առաջին կրկնօրինակումը՝ «Հարյուր հազար անհաջող կատակներ»-ն էր)։ Ըստ տեղեկությունների ֆիլմը թողարկվել է 2016թվականին։
2017 թվականին Ջեյ Չոուն հայտարարեց, որ թողարկվելու է «Հուսալի եղբայրներ» ֆիլմը, իսկ գլխավոր դերակատար ընտրել է թայվանցի հայտնի երգիչ Սյաո Ծինթընին։ Սյաո Ծինթընը իր մասնակցությունը ֆիլմում հաստատել է մայիսին, իսկ հունիսին անցել է վերապատրաստման։ Նախապես ծրագրված էր նկարահանումներն սկսել ամսվա վերջին։ Տեսարանների ութսուն տոկոսը նկարահանվել է Մալայզիայում։ Ցավոք ֆիլմն ի վերջո ժամանակավորապես դադարեցվեց ֆինանսական խնդիրների պատճառով։
2018 թվականին «Chuang Yin Picture Entertainment»-ի գործադիր տնօրեն Լյու Ծինհոնը, որն աշխատել է Ջեյ Չոուի հետ իր երկրորդ «Տանիք» գեղարվեստական ֆիլմի վրա, և «Լյան Նըն» մշակութային և կրեատիվ ընկերության գործադիր տնօրեն Փըն Քանյուն հայտարարեցին իրենց համագործակցության մասին։ Ներդրումներ արվեց «Քամին և ամպը» մրցարշավային ֆիլմի նկարահանման համար։ Նախնական տվյալներով գլխավոր դերում Րուան Ծինթիենն էր։ Ջեյ Չոուն խոստովանել է, որ ֆիլմը «Սկզբնատառ Դ» ֆիլմի շարունակության գաղափարն է։ Նաև նշել է, որ սկսել է «Հիմա դու տեսնում ես ինձ 2» ֆիլմի նկարահանումները։
Թայվանի էլեկտրոնային առևտրի «J Concept Star Collection» հարթակի ստեղծումը, որը զբաղվում է նորաձև հագուստներով, աքսեսուարներով և անիմացիոն արտադրանքներով, Ջեյ Չոուի օրիգինալ ապրանքանիշի՝ MRJ-ի, պաշտոնական միակ վաճառքի կազմակերպությունն է։
2006 թվականին Ջեյ Չոուն և իր ավագ դպրոցի լավ ընկեր Րիքը համատեղ ստեղծել են «PHANTACI» անունով նորաձևության ապրանքանիշը։ Բրենդի անվանումը «Phantom»-ի և «Fantasy»-ի համադրությունն է, որը խորհրդանշում է Ջեյ Չոուի դասական «Fantasy» ալբոմը։ Հիմնականում վաճառվում են նորաձև հագուստներ, կոշիկներ, աքսեսուարներ։ Ներկայումս խանութներ կան Թայպեյում, Թայճոնում, Շանհայում և Մալայզիայում։ «PHANTACI»-ին հանդիսանում է Թայվանի նորաձևության կարևոր ապրանքանիշերից մեկը[86][87]։
2011 թվականին Ջեյ Չոուն դարձել է խաղային սոցիալական հարթակի՝ Ucan-ի բաժնետեր։
2012 թվականին The Taipei Assassins (TPA) անունով սպորտային թիմը Լեգենդների լիգայի S2 եթերաշրջանի աշխարհի չեմպիոնն էր։ 2016 թվականին Ջեյ Չոուն ստացել է իրավունք այն վերանվանել «J Team»։ Ջեյ Չոուն դարձել է խորհրդի նախագահ և պատվավոր առաջնորդ։
2015 թվականին Ջեյ Չոուն հայտարարեց, որ կհամագործակցի կիբեռսպորտի մի շարք նախկին խաղացողների հետ «Mr. Jay» թիմը ստեղծելու համար, և նույնիսկ ծախսեց 90 միլիոն չինական յուան Շընճընում շքեղ ինտերնետ-սրճարան կառուցելու համար, որի մակերեսը 1700 քառակուսի մետր էր և իր մեջ ընդգրկում էր ուղիղ հեռարձակման, սեղանի խաղերի, սնվելու և խմելու տարածքներ։
2016 թվականի ապրիլին, երբ Ճոու Ծիելունը դարձավ China Digital Culture Group-ի բաժնետեր, նա նաև China Digital Culture-ին իր նկարով ու անունով տվեց բացառիկ իրավունք՝ մտնելու կիբեռսպորտի ոլորտ։
2017 թվականի ապրիլի 9-ին Ճոու Ծիելունը հայտարարեց IDG-ի հետ «Magic E-sports» ապրանքանիշի համատեղ ստեղծման մասին և Շընճընում բացեց ապրանքանիշի առաջին խանութը՝ «Magic E-sports Hall» ինտերնետ-սրճարանն ու դարձավ «Ինտերնետ-սրճարանի սեփականատեր Ջեյը»։ Ինչպես նաև Ջեյը և իր կինը՝ Քուըն Լինը, համատեղ ստեղծել են խելացի կարողություններով ուսումնական ռոբոտին՝ Սյաո Մածիին։
2011 թվականին Ճոու Ծիելունը ներդրումներ է կատարել DejaVu Music Magic ռեստորանում։
2012 թվականի սկզբին համագործակցել է Xi'an True Love Investment Group-ի հետ և Սիան քաղաքում բացել է «True Love Fantasy» կարաոկեն (KTV), ընդհանուր ներդրել է ավելի քան 150 միլիոն։
2007 թվականին Ջեյ Չոուն ներդրեց վեց միլիոն յուան և բացեց իտալական «Mr.J Yifa Kitchen» ռեստորանը, որտեղ կային «Գաղտնիք, որը չի կարելի ասել» ֆիլմից դրվագներ։ Ռեստորանի նպատակն էր ընկերներին հավաքել մի վայրում։ 2013 թվականին նա հայտնեց ռեստորանի փակման լուրը։ Վերջերս բացվել է «Mr.J Yifa Kitchen 2» ռեստորանը։
Ճապոնիայում «Fujiwara Tofu» խանութի փակման պատճառով Ճոու Ծիելունը որոշեց բացել այն Թայվանում 2011 թվականին՝ բացելով «Mr.J Fujiwara Tofu» խանութը՝ փորձելով որքան հնարավոր է ընդօրինակել ֆիլմում «Fujiwara Tofu» խանութի նախկին տեսարանին, որպեսզի խանութ մուտք գործող հաճախորդներն իրենց զգան ինչպես ֆիլմում։ Խանութը փակվել է 2015 թվականի սեպտեմբերի 30-ին։
Ի սկզբանե խանութը Քուըն Լինի կողմից բացված «Machi doggie» սրճարանն է եղել, բայց այն փակվել է 2019 թվականի փետրվարի 28-ին։ Խանութը նրա մոր՝ Յե Հուեյմեյի անունով էր, իսկ ավելի ուշ փոխվել է «machi machi» ըմպելիքների խանութի։ Ճոու Ծիելունը նաև հաճախակի իր ինստագրամյան էջում խորհուրդ է տալիս իր կաթով թեյը։ «Մի՛ լացիր» տեսահոլովակի դրվագները ընտրվել են Ճապոնիայի Հարուջուկու շրջանի խանութից, որը նույնպես մեծ հերթ է առաջացրել Շանհայում խանութի բացման ժամանակ։
Ջեյ Չոուի և իր ընկերների կողմից համատեղ բացված «J POT HOTPOT» երաժշտական թեմատիկայով ռեստորանը գտնվում է Հոնկոնգի Քոզվեյ Բեյ թաղամասում։ Նա նշեց, որ հրավիրելու է իր նկարիչ ընկերոջը՝ ռեստորանում նկարներ անելու։ Ջեյը նաև ասաց, որ խանութն իրականում լի է երաժշտական տարրերով, օրինակ՝ դաշնամուրի նոտաներով ձևավորված աթոռներով, թմբուկներով և այլն։ Նա հույս ունի, որ հաջորդ անգամ ալբոմ թողարկելիս իր հեղինակային մակագրությունը կանցկացնի այս ռեստորանում։ 2019 թվականին կորոնավիրուսային հիվանդության պատճառով Ջեյը հայտարարեց, որ փետրվարի կեսերին կդադարեցնի իր բիզնես գործունեությունը։
Ջեյ Չոուն Պեկինում և Սյամենում բացել է «J Daxia» չինական ռեստորանը, ինչպես նաև անձամբ մասնակցել է բացման արարողությանը։ Հատուկ ուտեստները Ջեյ Չոուի երգերի անուններով են կոչվում։
«J-tea of Magic»-ը բացվել է Շանհայում 2019 թվականի դեկտեմբերի 19-ին։ Իր մեջ ներառում է թեյ խմելու, կիբեռսպորտի և թեթև ժամանցային գոտիներ։
Ջեյ Չոուն, նրա ընկեր Լյու Ծինհոնը և սուպերմոդել Հոն Սյաոլեյի նախկին ամուսին Վան Շըծյունը համատեղ բացում են «Tiantai Food Culture» բաժնետիրական ընկերությունը։ Ֆինանսական հսկայական ճեղքվածքի պատճառով Ջեյ Չոուն և Լյու Ծինհոնը հրաժարվում են ներդրումներից, բայց Վան Շըծյունը շարունակում է ներդրողներ փնտրել Ջեյ Չոուի անունով և ի վերջո դատարանի որոշման համաձայն՝ որպես տույժ Վան Շըծյունը 3 միլիոն չինական յուան է վճարում։ Այս առնչությամբ Ջեյ Չոուի երաժշտական ընկերությունը՝ Javier Music-ը, թյուրիմացությունից խուսափելու համար պարզաբանել է, որ այն ժամանակ «Tiantai Food Culture» ռեստորանի բաժնետեր էր Ջեյ Չոուն, բայց քանի որ նրա մայրը դեմ էր, նա հրաժարվեց։ Ռեստորանի բաժնետերերի հետ կապված համապատասխան հարցերը պաշտոնապես ավարտվեցին մինչև 2014 թվականի ապրիլը, և կառավարման իրավունքները փոխանցվեցին[88]։
2004 թվականին նա և ռեժիսոր Քուան Շընը համատեղ բացեցին «Omni by JFK» հնաոճ խանութը։ Ջեյ Չուն սիրում է հնաոճ իրեր։
Ջեյ Չոուն դարձել է «China Digital Culture» ընկերության բաժնետեր և հիմք է դրել մշակութային և ստեղծագործական գործունեությանը։
Քանի որ Ջեյ Չոուն սիրում էր Ֆիթնես, նա իր ընկերոջ՝ Լյու Ծինհոնի հետ տնօրինում էր «300 հերոս» մարզասրահը՝ հուսալով իր աստղային ազդեցությամբ խթանել ավելի շատ երկրպագուների՝ միանալու իրենց շարքերը։
2016 թվականին Ջեյ Չոուն «1MORE Magic» ականջակալների մեջ ներառեց իր սեփական «TiinLab Ear No. 1» ապրանքանիշը և դարձավ բաժնետեր։ Ընկերության պաշտոնական կայքի հարցման տվյալների համաձայն՝ որպես Xiaomi էկոհամակարգի ձեռնարկություն, ընդհանուր վաճառվել է 65 միլիոն ականջակալ[89]։
Ջեյ Չոուն իր կարիերան սկսելուց ի վեր անցկացրել է ավելի քան 300 համերգ։
Հրապարակման ամսաթիվը | Գրքի անվանումը | Հեղինակ | Հրատարակչություն | ISBN |
---|---|---|---|---|
2002 թվական, փետրվարի 25 | «Թերակղզու երկաթյա տուփ» | Տեքստ՝ Վինսենթ Ֆան, կատարում՝ Ջեյ Չոու | Չինական հրատարակչություն | ISBN 978-986-80167-0-5 |
2004 թվական, նոյեմբերի 22 | «Grandeur de D major» | Ջեյ Չոու | Չինական հրատարակչություն | ISBN 7-80679-674-6 |
2004 թվական, փետրվարի 21 | «Զգայական սեր» | Տեքստ՝ Ճըն Ծըլին, կատարում՝ Ջեյ Չոու | Չինական հրատարակչություն | ISBN 9-57293-711-1 |
2005 թվական, հուլիսի 15 | «Initial D» | Ջեյ Չոու | Չինական հրատարակչություն | ISBN 9-57293-716-2 |
2007 թվական, սեպտեմբերի 21 | ««Գաղտնիք, որ չի կարելի ասել» ֆիլմի երաժշտության նոտաները» | Ջեյ Չոու | Չինական հրատարակչություն | ISBN 978-986-82194-6-5 |
2007 թվական, սեպտեմբերի 21 | ««Գաղտնիք, որ չի կարելի ասել» ֆիլմի կինոադապտացիան» | Սցենար՝ Ջեյ Չոու | Չինական հրատարակչություն | ISBN 978-986-82194-7-2 |
2011 թվական, հունվարի 26 | «Երաժշտություն = Պատկեր ≠ Երաժշտություն» | Ջեյ Չոու | Չինական հրատարակչություն | ISBN 978-957-29371-2-9 |
2013 թվական, հուլիսի 1 | ««Տանիք» ֆիլմի բնագիր վեպը» | Ջեյ Չոու | Չինական հրատարակչություն | ISBN 978-7-5502-1569-6 |
2013 թվական, հուլիսի1 | «Ջեյ Չոուի «Տանիք» ֆիլմի ձեռնարկը» | Ջեյ Չոու | Չինական հրատարակչություն | ISBN 978-7-5502-1570-2 |
Տարեթիվ | Վայր | Ֆիլմի անվանումը | Ռեժիսոր | Դեր | Նշումներ | Գրած երաժշտություն |
---|---|---|---|---|---|---|
2003 թվական | Հոնկոնգ | «Փնտրում եմ Ջեյ Չոուին» | Լին Այհուա | Ճոու Ծիելուն | Առաջին ֆիլմը։ | «Հետքեր», «Կտրված լարեր»։ |
2005 թվական | Հոնկոնգ | «Գնա քո ճանապարհով» | Ջոնի Տո | Ա Լուն (Ալեն) | Առաջին ֆիլմը Հոնկոնգի 29-րդ միջազգային կինոփառատոնի ժամանակ։ | |
Հոնկոնգ | «Սկզբնատառ Դ» | Լյու Վեյցիան, Մայ Ճաո Հուեյ | Ֆուջիվարա | Առաջին գլխավոր դերը։ | «Դրեյֆ», «Ճանապարհ դեպի հյուսիս»։ | |
2006 թվական | Մայրցամաքային Չինաստան | «Ոսկե ծաղիկի անեծքը» | Ճան Իմոու | Յուեն Ծիե | «Ոսկե զրահ», «Քրիզանթեմի աշխարհ»։ | |
2007 թվական | Թայվան | «Գաղտնիք, որ չի կարելի ասել» | Ճոու Ծիելուն | Յե Սիանլուն | Առաջին ֆիլմը, որ բեմադրել և խաղացել է։ | «Գաղտնիք, որ չի կարելի ասել» և այլն։ |
2008 թվական | Հոնկոնգ | «Կունգ ֆու սլեմ դանկ» | Ճու Յենփին | Ֆան Շըծիե | «Մեծ ասպետ Ճոու»։ | |
2009 թվական | Մայրցամաքային Չինաստան | «Գանձերի դամբարան» | Ճու Յենփին | Ցիաո Ֆեյ | Այս ֆիլմը Թայվանում վերջին տարիներին չափազանց ցածր վարկանիշ ունեցող եզակի ֆիլմերից է։ 500 միլիոն թայվանական դոլարի արտադրության համեմատ տոմսարկղը կորցրել է 136 միլիոն թայվանական դոլար։ | «Թռի՛ր ինձ հետ» (Երգում է Լին Չիլինը)։ |
2010 թվական | Մայրցամաքային Չինաստան | «Իրական լեգենդ» | Յուեն Հըփին | Ու Շըն, Ծյո Սիեն | ||
2011 թվական | ԱՄՆ | «Գրին Հորնեթ» | Միսիե Կոնտըլի | Կատո | Առաջին հոլիվուդյան ֆիլմը։ | «Նունչակի» (Ֆիլմի ավարտ)։ |
2012 թվական | Հոնկոնգ | «Հակամարտություն» | Լին Չաո Սիեն | Վան Ֆեյ | ||
2013 թվական | Թայվան | «Տանիք» | Ճոու Ծիելուն | Լան Ծըկաո | Երկրորդ ֆիլմը, որ բեմադրել և խաղացել է։ | «Ամենուր դու ես» և այլն; |
2016 թվական | ԱՄՆ, Մայրցամաքային Չինաստան | «Կունգ Ֆու Պանդա 3 | Ջենիֆեր Նելսոն | Վարպետ կապիկ (Հոու Վան) | Կրկնօրինակվել է Թայվանում և մայրցամաքային Չինաստանում։
Առաջին անիմացիոն գեղարվեստական ֆիլմի կրկնօրինակումն է։ |
«TRY» (Երգում է Փայ Վեյծյունը, համաշխարհային երգ)։ |
ԱՄՆ Մեծ Բրիտանիա | «Հիմա դու տեսնում ես ինձ 2» | Ճու Հաովեյ | Լի | Երկրորդ հոլիվուդյան ֆիլմը։
Առաջին հոլիվուդյան ֆիլմը, որի հիմնական երգը չինարենն է։ |
«Now You See Me» (Համաշխարհային երգ)
«Գլխացավով ներքինի», «Շատ մեծ կոշիկներ» (Երաժշտական համար)։ | |
Թայվան | «Տասը հազար կիլոմետր» | Հոն Շընյան | Սյաո Լուն | Առաջին ֆիլմը, որի պրոդյուսերն է։ | «Խխունջներ», «Երազանքի սկիզբ»։ | |
2020 թվական | Թայվան | «Սիրել» | Լին Վեյհըն | Ճոու Ծիելուն | Ընկերական սիրային խաղ։ | |
2021 թվական | Թայվան | «Մեծ ուժ» | Չըն Իսյեն | Երկրորդ ֆիլմը, որի պրոդյուսերն է։
Թայվանի առաջին պրոֆեսիոնալ մրցարշավային ֆիլմը։ |
«Մեծ ուժ» (Երգում են Ֆան Իչընը և Քը Յոուլունը)։ | |
Հրապարակված | ԱՄՆ | «Արգելափակված ոստիկանություն 4» | Քը Լուսուո | Երրորդ հոլիվուդյան ֆիլմը։
Հաստատել է մասնակցությունը։ |
||
Հրապարակված | Թայվան | »Վստահելի ընկեր» | Սի Յուելոն | Գործադիր պրոդյուսեր
Սյաո Ծինթընի գլխավոր դերում։ Նկարահանումները դադարեցվել են։ |
||
Տարեթիվ | Վայր | Հեռուստաալիք | Սերիալի անվանումը | Ռեժիսոր | Դեր |
---|---|---|---|---|---|
1999 թվական | Թայվան | Հանրային հեռուստատեսություն | «Ուրցով տապակած ձուկ» | Կուո Ճընթի | Փողոցային երաժիշտ |
2000 թվական | Թայվան | Min TV | «Աստղային սիրո այգի, Ջեյ Չոուի երաժշտական սիրո պատմությունը» | Ցայ Յուեսյուն | Ճոու Ծիելուն |
2001 թվական | Թայվան | Min TV | «Կապույտ աստղ» | Ճըն Աննին | Կամեո |
2002 թվական | Թայվան | Չինական հեռուստատեսություն (CTV) | «Օկտավայի ինտերվալ» | Նյո Չընծը | Ճոու Ծիելուն |
2010 թվական | Թայվան, Մայրցամաքային Չինաստան | Չինական հեռուստատեսային համակարգ (CTS, Թայվանի հեռուստաընկերություն) | «Պանդա մարդ» | Ճոու Ծիելուն
Յու Հուաքուըն Ջեննիֆեր (Ճըննիֆու) |
Առյուծ |
Տարեթիվ | Վայր | Ձայնագրման հարթակ | Ֆիլմի անվանումը | Դեր | Ռեժիսոր | Նշումներ |
---|---|---|---|---|---|---|
2013 թվական | Մայրցամաքային Չինաստան | iQiyi | «Հարյուր հազար անհաջող կատակներ» | Թայ Ի՝ մեծատառով մարդ | Լու Հընյու, Լի Շուծիե | Առաջին եթերաշրջան սերիա 10 |
2016 թվական | ԱՄՆ, Մայրցամաքային Չինաստան | Յուենսիեն | «Կունգ Ֆու Պանդա 3» | Ոսկե կապիկ | Ջեննիֆեր Նելսոն | Մայրցամաքային Չինաստանի տարբերակը,
Թայվանի չինական տարբերակը |
Տարեթիվ | Վայր | Հեռուստաալիք | Ծրագրի անվանումը | Ներկայացնող | Դրվագներ |
---|---|---|---|---|---|
2015 թվական | Մայրցամաքային Չինաստան | Ճըծյան արբանյակային հեռուստատեսություն | «Չինաստանի ձայնը» (4-րդ եթերաշրջան) | Մաեստրո | Բոլոր 15 թողարկումները |
2016 թվական | Մայրցամաքային Չինաստան | Ճըծյան արբանյակային հեռուստատեսություն | «Չինաստանի ձայնը» (1-ին եթերաշրջան)
«Չինաստանի ձայնը» (5-րդ եթերաշրջան) |
Մաեստրո | Բոլոր 15 թողարկումները |
2017 թվական | Մայրցամաքային Չինաստան | Ճըծյան արբանյակային հեռուստատեսություն | «Չինաստանի ձայնը» (2-րդ եթերաշրջան) | Մաեստրո | Բոլոր 15 թողարկումները |
2018 թվական | Մայրցամաքային Չինաստան | Ճըծյան արբանյակային հեռուստատեսություն | «Չինաստանի ձայնը»
«Չինաստամի ձայնը» (3-րդ եթերաշրջան) |
Մաեստրո | Բոլոր 15 թողարկումները |
Մայրցամաքային Չինաստան | Ճըծյան արբանյակային հեռուստատեսություն | «Սլեմ դանկ» | Թիմի առաջնորդ | Բոլոր 12 թողարկումները | |
Տարեթիվ | Հեռարձակման հարթակ | Ծրագրի անվանումը | Ներկայացնող |
---|---|---|---|
2007 թվական | Օնլայն հարթակ «Teen Power» | «Teen Power ամառային թատրոն, Ճոու Ծիելուն «Գաղտնիք, որ չի կարելի ասել»» | Դերասաններ՝ Ճոու Ծիելուն, Կուեյ Լուն-Մեյ, Էնթոնի Վոն, Angela、Fion, Zimon, Lu
Սցենարիստներ՝ Նանալին, Kelvin Lee Ռեժիսոր՝ HoSiu Օպերատոր՝ Jimmy@Studio K Նկարահանող անձնակազմ՝ Kwok, On Արհեստական լուսավորություն՝ Kelvin Cheng Ձայնագրություն՝ Steward Պրոդյուսերական անձնակազմ՝ Morle、ChiuB、Kelvin Lee Գործադիր պրոդյուսեր՝ Նանալին |
2013-2014 թվականներ | «J Concept» բրենդային ասոցացիա | ««Mr.J Life» թատրոն, Ազատ կյանք»» | Գլխավոր դերեր՝ Ճոու Ծիելուն, Մայ Ճընվեյ, Տու Կուոճան
Բովանդակությունը՝ բասկետբոլ, անհատական ծրագիր, կախարդություն |
Տարեթիվ | Վայր | Ստեղծագործության անվանումը | ՌԵժիսոր | Ներկայացնող |
---|---|---|---|---|
2016 թվական | ԱՄՆ Թայվան | «Գաղտնիք, որ չի կարելի ասել» | John Rando | Հարմարեցված է Ջեյ Չոուի նույնանուն ֆիլմին, որը նկարահանվել է Չինաստանի և Միացյալ Նահանգների «Բրոդվեյ» կազմակերպության կողմից։ Այն տարիների ընթացքում անցնում է Ջեյ Չոուի դասական երգերի միջով՝ սկսելով համաշխարհային շրջագայություն Պեկինի «Թիենցյաո» արվեստի կենտրոնում 2016 թվականի դեկտեմբերին։ |
Տարեթիվ | Վայր | Հեռուստաընկերություն | Ծրագրի անվանումը | Ներկայացնող | Դրվագ |
---|---|---|---|---|---|
2010 թվական | Թայվան | «Ճոնթիեն» ժամանցային չինական հեռուստատեսություն | «Mr. J ալիք» | Հաղորդավար | Բոլոր 13 դրվագները |
2020 թվական | Հեռարձակվել է 190 երկրներում | Netflix, Ճըծյան արբանյակային հեռուստատեսություն | «J-style trip» | Հաղորդավար | Բոլոր 12 դրվագները |
Տարեթիվ | Վայր | Ռադիոկայան | Ծրագրի անվանումը | Ներկայացնող |
---|---|---|---|---|
2013 թվական | Թայվան | Hit FM | «Ouch DJ» | Հաղորդավար |
Ֆիլմերի/հեռուստասերիալների ցանկ | |||
---|---|---|---|
Տարեթիվ | Տեսակ | Անվանում | Նշումներ |
2007 թվական | Ֆիլմ | «Գաղտնիք, որ չի կարելի ասել» | |
2010 թվական | Հեռուստասերիալ | «Պանդա մարդ» | |
2013 թվական | Ֆիլմ | «Տանիք» |
Երաժշտական տեսահոլովակների ցանկ | |||
---|---|---|---|
Տարեթիվ | Երգիչ/Երգչուհի | Երգի անվանումը | Նշումներ |
1998 թվական | SBDW | «Սկզբնակետ» | Վարում է մեծ մոտոցիկլետ։ |
2004 թվական | Նան Ցյուեն Մամա | «Ընտանիք» | |
2005 թվական | «Անհետացում» | ||
«Նարնջի հյութ» | |||
Ճոու Ծիելուն | «Կապույտ փոթորիկ» | ||
«Ձյան պես մազեր» | |||
«Թխկի» | |||
«Մալթոզ» | |||
S.H.E | «Չեմ լինի քո ընկերը» | ||
Լյո Ծինհոն | «Ծիածան» | ||
2006 թվական | Ճոու Ծիելուն | «Անվախ» | |
«Գլուխ յոթերորդ» | |||
«Լսի՛ր մայրիկին» | |||
«Հազարավոր մղոններ հեռավորության վրա» | |||
«Chinese Herbal Manual» | |||
«Նահանջել» | |||
«Moulin Rouge» | |||
«Անձրևային տրամադրություն» | |||
«Սպիտակ հողմաղաց» | |||
«Հազրեվարդ» | |||
«Քրիզանթեմ» | |||
«Ոսկյա զրահ» | |||
2007 թվական | «Կովբոյները շատ զբաղված են» | ||
«Ծիածան» | |||
«Sunshine Nerd» | |||
«Ես արժանի չեմ» | |||
«Ամենաերկար ֆիլմը» | |||
2008 թվական | Սիաո Հոնրըն | «Նայիր ներքև» | |
Նան Ցյուեն Մամա | «Դու նրան նման չես» | ||
Ճոու Ծիելուն | «Dragon Rider» | ||
«Ինձ ժամանակ տուր երգի համար» | |||
«Օձերի պար» | |||
«Կախարդ» | |||
«Խոստացված երջանկություն» | |||
«Անօթևան բանաստեղծ» | |||
«Ժամանակի մեքենա» | |||
«Հորեղբայր Ջոկեր» | |||
«Բրնձի հասկերի բույրը» | |||
2009 թվական | Alan Kuo | «Մի՛ անհանգստացիր» | |
«Sugar Lady» | |||
2010 թվական | Ճոու Ծիելուն | «Դարաշրջան» | |
«Անվճար ուսուցողական տեսաերիզ» | |||
«Վաղուց չենք տեսնվել» | Համագործակցել է Յե Յաոհոնի հետ։ | ||
«Անձրևում է ամբողջ գիշեր» | |||
«Self-directed Act» | |||
«Սուպերմենը չի կարող թռչել» | |||
2011 թվական | «Spark» | ||
«Բացականչական նշան» | Համագործակցել է Լին Ճըմինի և Coolcat-ի հետ։ | ||
«Հիասքանչ մեղեդի» | |||
«Mine Mine» | |||
«Ինչպե՞ս ես» | |||
«Բուժիչ բրնձով պելմենիներ» | Համագործակցել է Չըն ԻՆճըի հետ։ | ||
«Piano of Sorrow» | |||
«Հիդրոֆոբ նավաստի» | |||
«Աշխարհի վերջը» | |||
«Ստվերային խաղ» | |||
«Սպորտային մեքենաների աստվածուհի» | |||
2012 թվական | «Ժեստերի լեզու» | ||
«Գլխացավով ներքինի» | |||
«Ming Ming Jiu» | |||
«Հիմար ծիծաղ» | |||
«Մեծ թավջութակ» | |||
«Սիրում եմ քեզ անկախ ամեն ինչից» | |||
«Hong-Chen-Ke-Zhan» | |||
«Երազանքի սկիզբ» | |||
«Բիգ Բեն» | |||
«Ուկուլելե» | |||
2014 թվական | «Յանմին լեռ» | ||
«Գաղտնի սեր» | |||
«What Kind of Man» | |||
«Ի՞նչ է պատահել» | |||
«Մեկ շնչով» | |||
«Ամառ եմ ուզում» | |||
«Հին ձեռագիր» | |||
«Շատ մեծ կոշիկներ» | |||
«Լսի՛ր անձրևի ձայնը» | Համագործակցել է Ջեննիֆերի հետ։ | ||
2016 թվական | «Նախկին սեր» | ||
«Now You See Me» | |||
«Պատմություններ քնելուց առաջ» | |||
«Հեռանալ առանց վարանելու» | |||
«Թուրքական պաղպաղակ» | |||
«Սիրո մեջ անհաջողակ» | |||
2018 թվական | «If You Don't Love Me, It's Fine» | ||
2020 թվական | «Մոհիտո» |
Տարվա մեկնարկ | Տարեվերջ | Վայր | Ապրանքանիշ | Համապատասխան երգ | Նշումներ |
---|---|---|---|---|---|
2001 թվական | 2005 թվական | Թայվան | Պանասոնիկ | «Արևոտ օր»
«Պապիկի պատրաստած թեյը» |
GD75 Jay մոդելի բջջային հեռախոսը թողարկվել է դեկտեմբերի 8-ին։ |
2003 թվական | 2005 թվական | Թայվան | Warcraft | Հիմնական երգ «Կիսամարդ» | Երգն այդ ժամանակ քննադատության է ենթարկվել։ |
2006 թվական | 2008 թվական | Թայվան | Motorola手機 | «Արքայադուստրն ամբողջ գիշեր չի քնել» չինարեն արիա | Հավաքվել է 20 միլիոն թայվանական դոլար։
Թողարկվել է «Chinese Herbal Manual» տեսահոլովակը։ |
2007 թվական | 2008 թվական | Թայվան | Dynasty Warriors Online | Հիմնական երգ «Անկրկնելի» | |
2009 թվական | 2018 թվական | Մայրցամաքային Չինաստան | Yili Group | «Բրնձի հասկերի բույր»
«Մեկ շնչով» |
Թողարկվել է «Նախկին ձեռագիր» տեսահոլովակը։
Համագործակցել է Արիել Լինի հետ։ |
2011 թվական | 2015 թվական | Թայվան | Aeon Motor | Ապրանքանիշը լայնորեն ճանաչվել է։ Հաղթել է «Սանյան» և «Կուանյան» ապրանքանիշներին։ | |
2012 թվական | 2015 թվական | Ասիա-խաղաղօվկիանոսյան տարածաշրջան | Kaspersky | ||
2015 թվական | Մինչ օրս | ԱՄՆ | League of Legends | Հիմնական երգ «Հերոս» | Հունիսի 20-ին պաշտոնապես հայտարարվեց, որ դարձել է ապրանքանիշի դեսպան։ |
Մինչ օրս | Ճապոնիա | Sony Mobile | Սեպտեմբերի 30-ին պաշտոնապես հայտարարվեց, որ դարձել է Xperia Z5 շարքի ներկայացուցիչ։ | ||
2016 թվական | Մինչ օրս | Մայրցամաքային Չինաստան | Pechoin | «Լսիր մայրիկին» և այլն | Դարձել է «Pechoin» ապրանքանիշի ներկայացուցիչը և գլխավոր տնօրենը։ |
2018 թվական | Մինչ օրս | Շվեյցարիա | Montres Tudor SA | Լեդի Գագայի և Դևիդ Բեքեմի հետ որպես համաշխարհային ներկայացուցիչ։ | |
2019 թվական | Մինչ օրս | Ճապոնիա | Յոհջի Յամամոտոյի «S'YTE» ապրանքանիշը | Մայրը՝ Յե Հուեյմեյը, նույնպես շատ է սիրում Յոհջի Յամամոտոյի հագուստները։ | |
2020 թվական | Մինչ օրս | Մայրցամաքային Չինաստան | Call of Duty: Mobile | Հոկտեմբերի 19-ին պաշտոնապես հայտարարվեց, որ դարձել է ապրանքանիշի ներկայացուցիչ և ներկայացուցչական ժողովի աշխատակից։ |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.