Hawaii je US-ameriski zwjazkowy stat, kotryž wobsteji z 2400 kilometrow dołheho rjećaza kupow wosrjedź Ćicheho oceana, něhdźe 6000 kilometrow wot kaliforniskeho pobrjoha. Ma něhdźe 1,4 miliony wobydlerjow na přestrjeni wot 28.000 kwadratnych kilometrow. Stolica a z 337.000 wobydlerjemi zdobom najwjetše město je Honolulu na třećej najwjetšej kupje Oʻahu. Hawaii słuša do kulturneho ruma Polyneziskeje a hawaiišćina je polyneziska rěč a jako tajka přiwuzna na přikład z maorišćinu.