Zuzana Čaputová

Zuzana Čaputová (rodź. Strapáková; * 21. junija 1973 w Bratisławje) je słowakska juristka, přirodna aktiwistka a socialnoliberalna politikarka. Něhdyša zastupowaca předsydka hibanja Progresívne Slovensko doby prezidentowe wólby lěta 2019 a bě wot junija 2019 hač do 15. junija 2024 amtěrowaca prezidentka Słowakskeje.

Zuzana Čaputová (2019)

Po zakónčenju studija prawnistwa při uniwersiće Komenskeho w Bratisławje w lěće 1996 dźěłaše Čaputová někotre lěta w regionalnym zarjedźe městačka Pezinok, najprjedy w prawniskim wotrjedźe a pozdźišo we wodźacej skupinje měšćanskeho zarjadnistwa. W lěće 2010 załoži prawiznisku kencliju. W Pezinoku angažowaše so wona přećiwo strowoće škodźacemu smjećišću. Nimo toho wojowaše přećiwo wot ministerskeho prezidenta Vladimíra Mečiara přesadźenym amnestijam.

Jako politikarka zasadźowaše so za prawa mjeńšinow kaž Romow abo Madźarow kaž tež za prawo na adopciju za jenakosplažne poriki. Do jeje programa słušeše tež bój přećiwo korupciji. Nimo toho angažowaše so za wujasnjenje mordarstwa žurnalista Jána Kuciaka a jeho partnerki w lěće 2018. Čaputová zastupowaše jasne pro-europske pozicije, tež nastupajo ruski nadběh přećiwo Ukrainje a europsku reakciju.

Wotkaz

 Commons: Zuzana Čaputová – Zběrka wobrazow, widejow a awdiodatajow

• Webstrona Zuzany Čaputoveje (słowaksce, madźarsce)