Pětr Ponich

Pětr Ponich (němsce Petrus Pannach; * 13. januara 1716 na Židowje, † 5. junija 1785 w Malešecach) bě serbski ewangelski farar a cyrkwinski stawiznar.

Wón narodźi so jako syn Židowskeho dźěłaćerja a wopyta gymnazij w Budyšinje. Wot lěta 1737 studowaše teologiju w Lipsku, hdźež bě ze sobustawom Serbskeho prědarskeho towarstwa. Po studiju dźěłaše někotre lěta jako domjacy wučer pola pastora primariusa Jana Krystofa Langi w Budyšinje a wot 1743 skutkowaše jako farar, najprjedy hač do lěta 1747 w Budyšinku, 1747–59 w Němskich Jenkecach a wot 1759 hač do swojeje smjerće w lěće 1785 w Malešecach.

Jako cyrkwinski stawiznar wuslědźi a spisa stawizny wšěch hornjołužiskich serbskich a tež někotrych němskich cyrkwjow. Na zakładźe jeho stawiznarskich rukopisow napisa so pod nawodom Jana Bjedricha Langi kniha Kurzer Entwurf einer Oberlausitz-wendischen Kirchenhistorie (Budissin 1767).

Pětr Ponich bě nan Samuela Bohuwěra (* 1748) a Bohačesća Bjedricha Ponicha (* 1761).

Žórło

• Marja Kubašec: Ponich, Pětr. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 451