serbski politikar, čłon Sakskeho krajneho sejma From Wikipedia, the free encyclopedia
Ludwig Nowak (němsce Ludwig Noack; * 22. februara 1947 we Worklecach, † 26. awgusta 1996) bě serbski politikar strony CDU a čłon sakskeho krajneho sejma.
Po wopyće zakładneju šulow we Worklecach a Chrósćicach chodźeše Ludwig Nowak do Serbskeje rozšěrjeneje šule w Małym Wjelkowje, hdźež złoži swoju maturu. Wot 1965 do 1970 studowaše w Lipsku slawistiku a zakónči studij jako diplomowy wučer za rušćinu a serbšćinu. Po diplomje bě wot 1970 do 1980 z wučerjom na Worklečanskej serbskej wyšej šuli a potom hač do měrca 1990 ze zastupowacym direktorom šule.
Nowak běše katolski, ženjeny a měješe tři dźěći.
Ludwig Nowak bě wot lěta 1982 z čłonom strony CDU w NDR. Wot decembra 1989 do septembra 1990 bě sobustaw stronskeho předsydstwa wuchodneje CDU a wot januara 1990 z předsydu Kamjenskeho wokrjesneho zwjazka. Wot měrca do oktobra 1990 bě z čłonom poslednjeje Ludoweje komory, nawoda dźěłoweje skupiny za kubłanje frakcije CDU a zastupowacy předsyda kubłanskeho wuběrka.
W oktobrje 1990 wuzwoli so Nowak jako direktny kandidat wólbneho wokrjesa 24 (Kamjenc) do Sakskeho krajneho sejma, kotremuž hač do lěta 1994 přisłuša. Tam bě čłon wuběrka za zwjazkowe a europske naležnosće kaž tež wuběrka za šulstwo, młodźinu a sport.