From Wikipedia, the free encyclopedia
Krajny wokrjes Sakska Šwica (němsce Landkreis Sächsische Schweiz) běše wot 1994 do 2008 krajny wokrjes w Sakskej. Wot 1. awgusta 2008 twori hromadźe z něhdyšim krajnym wokrjesom Weißeritzkreis nowy wokrjes Sakska Šwica-Wuchodne Rudne hory.
| Wopon | Karta |
|---|---|
 |
 |
| daty z lěta 2008 | |
| Doba eksistency: | 1994–2008 |
| zwjazkowy kraj |  Sakska |
| knježerstwowy wobwod | Drježdźany |
| zarjadniske sydło | Pěrno |
| přestrjeń | 887,89 km² |
| wobydlerstwo | 137.200 (31. decembra 2007) |
| hustosć zasydlenja | 155 wob. na km² |
| awtowa značka | PIR |
| rozčłonkowanje | 25 gmejnow |
| adresa zarjadnistwa | Zehistaer Straße 9 01796 Pirna |
| krajny rada | Michael Geisler (CDU) |
| Połoženje wokrjesa Sakska Šwica w Sakskej | |
 | |
Krajny wokrjes Sakska Šwica ležeše juhowuchodnje krajneje stolicy Drježdźany. Susodne teritorije běchu Čěska na wuchod a na juh, wokrjes Weißeritzkreis na zapad, Drježdźany na sewjerozapadźe a na sewjer krajnej wokrjesaj Kamjenc a Budyšin. Jadrowy teritorij wokrjesa wobsahuje Saksku Šwicu, na sewjerowuchodźe wšak tež wuběžki Łužiskich hór a na zapad předběžki Rudnych hór. Prěki přez wokrjes běži Łobjo. Najniše městno wokrjesa je při łobjowym brjoze na mjez z Drježdźanami z 109 m, najwyše městno je wyšina Oelsener Höhe z 644 m pola Oelsena na juhozapadźe wokrjesa we wuchodnych Rudnych horach.
Prjedy bě we łobjowym dole wokoło Heidenauwa a Pěrna wjele industrije, na př. celulozowe zawody a wobručowa industrija. Tute zawody hižo njeeksistuja, přestrjenje su so saněrowali a do wobwody małopřemysłow přetworili. Pola Kralowca wukonješe SDAG Wismut uranowe hórnistwo. Tute je tohorunja zawrjene a wotpowědne podkopki so saněruja.
Dźensa je turizm wažna hospodarska hałuza z wjacorymi lěkowanišćemi, w Zebnicy je zhotowjenje kumštnych kwětkow kaž tež zhotowjer modelowych železničkow.
Region wupłodźi předewšěm w lěće 2004 přez nadpřerěznje wysoke wuslědki (hač k 25 %) prawicarskoekstremneje NPD pola sakskich komunalnych a krajnosejmowych wólbow negatiwne powěsće. Kameradstwo skinheadow „Skinheads Sächsische Schweiz“ (SSS) je so tu w lěće 1997 załožiło. Jeho mócnosć bu w lěće 2000 na 100 čłonow trochowana. Jeho namócneho razu dla je je sakski nutřkowny minister w aprylu 2001 zakazał. Neonacije su wšak přeco hišće aktiwni w regionje. Jeničce mjez 2002 a 2004 bě 930 prawicarskoekstremnych přesahow, předewšěm napřećo lěwim młodźencam a wukrajnikam a něhdźe 600 wozjewjenkow pola zarjadow.
A 17 mjez Drježdźanami a němsko-čěskej mjezu je wot decembra 2006 přezcyłnje wobjězdźomna. Na sewjeru tangěruje B 6 wokrjes, podłu Łobja přeběži B 172. Namjezny přechody do Čěskeje su w Bahratalu do Petrovic, Schmilka pola Žandowa do Hřenska a w Zebnicy do Dolního Poustevny. Nimo toho je wulka ličba mjezu překročacych turistiskich pućow a mjezu překročacy přewoz z Schöny do Hřenska. Podłu Łobja wjedźe so hłowna čara železnicy (z Drježdźan do Prahi) a pódlanska čara z Žandowa přez Zebnicu dale do Neustadta a Müglitztalbahn z Heidenau do Altenberga. Wobě čarje wuznamjenjatej so přez wuske křiwicy, nastupy, tunle a wiadukty, čara Žandow–Zebnica–Neustadt dósta tohodla tež mjeno Sakski Semmering, byrnjež so tute mjeno poprawom Windbergowej železnicy pola Freitala/Drježdźan přiličiło. Byrnjež dołha tradicija za wužiwanje mjena Sakski Semmering za čaru Žandow–Zebnica–Neustadt była, je sudnistwo rozsudźiło, zo njesmě čara hižo tute mjeno njesć.
Krajny wokrjes je přez wokrjesnu reformu 1. awgusta 1994 z wokrjesow Zebnica a Pěrno nastał. Při wulkej wodźe Łobja w lěću 2002, t. mj. lětstotkowa lijeńca bu wjele městow a gmejnow ćežko trjechiło, najprjedy přez přitoki Łobja a potom přez wulku wodu Łobja samoho.
Wot 1. awgusta 2008 płaći nowa wokrjesna reforma, po kotrejž dotalnej wokrjesaj Sakska Šwica a Weißeritzkreis stej ke krajnemu wokrjesej Sakska Šwica-Wuchodne Rudne hory fuzionowałoj. Nowe wokrjesne sydło je Pěrno.
|
Rozjasnjenje wopona: Na zelenym polu běłe (heraldisce: slěborne) polo wotlěwa horjeka doprawa deleka (heraldisce: wot horjeka prawo do deleka lěwo).
Symbol za krajinowu dominantu wokrjesa, Łobjo. Łobjo je kaž žadyn druhi krajinowy element region w jeho natwarje, w jeho stawiznach kaž tež w hospodarskim a kulturalnym wuwiću. Łobjo bě geografiska směrnica za prudy ludow a kulturow, wono bě wuchadźišćo za wobsydlenja a wobchad w našich kónčinach a tworješe zakład za wjele awtochtonych přemysłow. Łobjo je pak tež ze swojeje strony symbol za wšelakore zwiski krajneho wokrjesa won.
Z tym ma wysoki podźěl lěsa a jeho wuznam za wuwiće wobwoda zwuraznjeć; nimo toho wysoka wočerstwjenska hódnota krajiny a fakt, zo něhdźe 62 % wokrjesneho teritorija je škitana krajina.
Pokaz na wobaj wokrjesaj Pěrno a Zebnica, z kotrejuž so nowy wokrjes zestaješe. Barbna kombinacija běły/zeleny: Pokaz na saksej krajnej barbje.[1] |
(Ličby wobydlerjow wot 31. decembra 2006)
|
|
Zarjadniske zhromadźenstwa
K zajimawosćam liči Narodny park Sakska Šwica z horami, hrodami a wjele wočerstwjenskimi móžnosćemi.
Dalše wulětne cile su Barokna zahroda a barokny hród w Großsedlitzu, hród Stołpin, prawěkowy park w Zebnicy, hród Kuckuckstein w Liebstadće, hród Weesenstein a dalše.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
