Korla Wyrgač

Korla Wyrgač (němsce Karl Wirgatsch; * 17. oktobra 1883 w Hornim Wunjowje, † 7. junija 1956 w Budyšinje) bě serbski ewangelski farar a redaktor.

Narodźi so jako syn ratarja-kowarja w tehdy hišće dospołnje serbskej wjesce Wunjowje pola Budyšina a wopytowaše Budyski gymnazij. Wot 1905 do 1909 studowaše při Lipšćanskej uniwersiće ewangelsku teologiju. Wot 1909 do 1913 bě z wučerjom a 1913 nastupi farske městno w Nosaćicach w narańšich Serbach, hdźež jako posledni serbski farar hač do lěta 1956 skutkowaše. W tutym lěće poda so na wuměnk a zemrě jenož někotre měsacy po tym w Budyšinje.

W młodych lětach dopisowaše pilnje do dźěćaceho časopisa Raj a spěchowaše serbske dźiwadłownistwo. Jako student wozjewi Serbski rukopis w přiwisku Worjechoweho katechizma (ČMS 1907). Wot 1917 hač do zakaza časopisa přez nacionalsocialistow w lěće 1937 redigowaše ewangelski tydźenik Pomhaj Bóh.

Wyrgač bě wot lěta 1905 čłon Maćicy Serbskeje.

Žórło

• Jan Meškank: Wyrgač, Korla. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 639