Herman Božidar Kilian (němsce Hermann Theodor Kilian; * 26. decembra 1859 w Serbinje, † 21. januara 1920 runje tam) bě serbski farar w texaskim sydlišću Serbin.
Narodźi so hižo po wupućowanju ewangelskich Serbow do Texasa jako najmłódši syn fararja Jana Kiliana a jeho mandźelskeje Marje a wotrosće w skromnych poměrach prěnich lět serbskeho sydlišća w Americe. W Serbinje chodźeše do wosadneje šule, hdźež skutkowaštaj jeho nan a pozdźišo jeho bratr Gerhard (1852–1916) jako wučerjej. Po konfirmaciji wopušći Serbin a běše wot 1874 šuler cyrkwinskeho gymnazija w Fort Wayne (Indiana). Wot 1880 wopyta teologiski seminar w St. Louis, Missouri.
Po nawróće do Serbina sta so w lěće 1883 z naslědnikom nana jako wosadny farar. Tutón napisa hłownje za njeho w samsnym lěće serbsku cyrkwinsku agendu, jeničku serbsku knihu, kiž je so hdy w zamórskich krajach ćišćała. Pod nawodom Hermana Kiliana so wot lěta 1870 šćěpjena Serbinska wosada w lěće 1914 zaso zjednoći. Přiwšěm so serbska kolonija w jeho lětach do dalokeje měry přeněmči. Poslednju serbsku konfirmaciju swjećeše w lěće 1905. Naposledk wotměwaše hišće jónu měsačnje serbske kemše za přewažnje staršich wěriwych.
Ze smjerću Hermana Kiliana womjelkny serbšćina w Serbinje po 65 lětach jako cyrkwinska rěč. Wón wotpočuje w swójbnym rownišću na Serbinskim kěrchowje.
Kilian bě woženjeny z Marju, rodźenej Mjerwic (Mörbe) a měješe z njej dweju synow a dwě dźowce.
- Trudla Malinkowa: Spominamy. Pomhaj Bóh, 1/2020, str. 12
- The Wendish Research Exchange: In Memory of Former Pastor Hermann T. Kilian, in Serbin, Texas. (jendź.)
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
