Hajno Jordan

Fryco Hajno Franc Jordan (němsce Heinrich Jordan; * 24. nowembra 1882 w Popojcach, † 28. měrca 1917 w Villers-devant-le-Thour w Francoskej) běše serbski wučer, mjenowědnik a kulturny prócowar.

Hajno Jordan (1882–1917)

Hajno Jordan, bratr Karla Jordana narodźi so w Popojcach jako druhi syn Hendricha Jordana a jeho mandźelskeje Emilije rodź. Pjatarjec z Wjerbna. Wón wopyta šulu swojeho nana w Popojcach a po tym gymnazij w Choćebuzu. Mjez 1901 do 1904 chodźeše na wučerski seminar w Starej Darbni a skutkowaše po tym jako wučer w Gołbinje. Wot lěta 1913 běše wučer w Slepom a wot 1916 wojak w prěnjej swětowej wójnje, hdźež we wojowanjach při rěce Somme zemrě.

W Časopisu Maćicy Serbskeje wozjewi Hajno Jordan nastawki wo ležownostnych mjenach w Delnjej Łužicy a w Bramborskim Casniku dalše mjeńše přinoški. Wón běše čłon serbskeho towarstwa w Starej Darbni a 1910 bu jako naslědnik nana předsyda Błótowskeho wučerskeho towarstwa. Hajno Jordan běše čłon Maśicy Serbskeje a wot 1910 tež jeje pismawjedźer a pokładnik.

Žórło

• Gerat Hančka: Jordan, Hajno. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 235.