Wóslinčanska cyrkej

Wóslinčanska cyrkej je ewangelsko-lutherska cyrkej we Wóslinku w Budyskim wokrjesu. Wona słuži ewangelskej wosadźe Wóslink w cyrkwinskim wobwodźe Budyšin-Kamjenc ewangelskeje krajneje cyrkwje w Sakskej. Hač do 20. lětstotka je so tu tež serbsce prědowało.

Wóslinčanska cyrkej

Stary Wóslinčanski kěrchow wokoło cyrkwje je zrunany; jenož někotre historiske narowne pomniki su so wobchowali, mjez nimi žadyn ze serbskim napisom. Nowe pohrjebnišćo nadeńdźe so wot lěta 1876 kusk zdalene do južneho směra. Nad cyrkwinskimi durjemi je dwurěčna serbsko-němska sada napisana, runje tak nad wołtarjom. W zachodnej hali spomina kamjentna tafla w němskej rěči na padnjenych Prěnjeje swětoweje wójny.

Ewangelska cyrkej we Wóslinku steji jako kulturny pomnik pod škitom.

Stawizny

Po w lěće 1646 namakanym wopismje je so w lěće 1410 wot Mišnjanskeho biskopa kapałka we Wóslinku poswjećiła, w kotrejž mějachu měšnicy z Chrósćic a Kulowa kemše. Hižo 1438 naspomni so prěni raz farar we Wóslinku. Stara cyrkej je so w lěće 1803 wottorhnyła a nowa so wot 1803 do 1805 kusk dale na sewjeru natwariła. Wona słuša ze swojimi třomi emporami k najwjetšim wjesnym cyrkwjam Budyskeho kraja.

Wosada

Do Wóslinčanskeje wosady słušeja nimo Wóslinka samoho tež wjeski Ćisow, Debricy, Jitro, Lěska, Pisany Doł, Skaskow, Tradow a Wysoka kaž tež ewangelscy wobydlerjo někotrych přewažnje katolskich wsow we wokolinje.

Fararjo

doba	mjeno	ródna wjes	žiwjenske daty	přispomnjenja
1663–1669	Jan Ćichor	Wulke Zdźary	1630–1669
1744–1771	Křesćan Bohachwał Kowar	Bukecy	1703–1778
1772–1790	Jan Wićaz	Jědlica	† 1790
1790–1793	Kašpor Róla	Njeswačidła	1762–1793	zemrě při njezbožu z konjom
1793–1846	Karl Heinrich Fuhrmann (Wóznik)	Wormłag (DŁ)	1767–1846
1847–1851	Handrij Nowak	Jaseńca	1769–1850	do toho diakon w Ketlicach
1851–1858	Jaroměr Hendrich Imiš	Bukojna	1819–1897	do toho wučer w Budyšinje, po tym farar w Hodźiju
1859–1886	Jurij Arnošt Wanak	Njeswačidło	1817–1887	do toho w Kotecach, 1886 na wuměnk
1887–1906	Jan Wałtar	Burkhardswalde	1860–1921	do toho wikar we Łazu, po tym farar w Njeswačidle
1907–1956	Pawoł Wićežk	Přišecy	1877–1956	do toho we Łupoji
2020	Michael Nicolaus

Farar Wićežk bě posledni serbski we Wóslinčanskej wosadźe. Wón dźeržeše kóždu njedźelu serbsku Božu słužbu, samo za čas nacionalsocialistiskeho knjejstwa.

Wobrazy

• 
  Cyrkwina wěža
• 
  Dwurěčny napis nad zachodom
• 
  Nutřkowny napohlad
• 
  Dwurěčny napis nad wołtarjom
• 
  Empory z byrglemi

Literatura

• Cornelius Gurlitt: Oßling. W: Beschreibende Darstellung der älteren Bau- und Kunstdenkmäler des Königreichs Sachsen. 35. Zwjazk: Amtshauptmannschaft Kamenz (Land). C. C. Meinhold, Dresden 1912, str. 258–268.

Wotkazaj

 Commons: Ewangelska cyrkej we Wóslinku – Zběrka wobrazow, widejow a awdiodatajow

• Wopisanje Wóslinčanskeje wosady w Statistice Łužiskich Serbow Arnošta Muki (digitalizat)

Cyrkwje w ewangelskim cyrkwinskim wobwodźe Budyšin-Kamjenc

Bart | Bukecy | Budestecy | Budyšink | Budyšin, swj. Pětr | Budyšin, swj. Michał | Halštrow | Hodźij | Horni Wujězd | Hrodźišćo | Hućina | Huska | Chwaćicy | Klukš | Korzym | Kotecy | Kumwałd | Łupoj | Malešecy | Minakał | Njeswačidło | Palow | Porchow | Poršicy | Protecy | Rakecy | Smělna | Smječkecy | Wjelećin | Wóslink | Załom

51.36025514.166095