![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/f/f3/Kirche_Schm%25C3%25B6lln-Putzkau_M%25C3%25A4rz_2017_%25282%2529.jpg/640px-Kirche_Schm%25C3%25B6lln-Putzkau_M%25C3%25A4rz_2017_%25282%2529.jpg&w=640&q=50)
Jan Awgust Sykora
serbski farar, spisowaćel a ludowědnik / From Wikipedia, the free encyclopedia
Jan Awgust Sykora (němsce Johann August Sickert; * 27. septembra 1835 w Malešecach, † 19. decembra 1921 w Biskopicach) bě serbski farar, spisowaćel a ludowědnik.
![Thumb image](http://upload.wikimedia.org/wikipedia/commons/thumb/f/f3/Kirche_Schm%C3%B6lln-Putzkau_M%C3%A4rz_2017_%282%29.jpg/640px-Kirche_Schm%C3%B6lln-Putzkau_M%C3%A4rz_2017_%282%29.jpg)
![Thumb image](http://upload.wikimedia.org/wikipedia/commons/thumb/7/7e/Sm%C4%9Blna_%E2%80%93_row_Jana_Awgusta_Sykory.jpg/640px-Sm%C4%9Blna_%E2%80%93_row_Jana_Awgusta_Sykory.jpg)
Wón narodźi so do zamóžneje ewangelskeje burskeje swójby a wopyta w Budyšinje najprjedy měšćansku šulu a wot 1848 do 1856 gymnazij. Po studiju teologije w Lipsku, kiž 1860 dokónči, skutkowaše najprjedy tři lěta jako domjacy wučer a bu 1863 na farske městno do Smělneje pola Biskopic powołany, hdźež bě hač do kónca powołanskeho žiwjenja w lěće 1899 z poslednim serbskim fararjom.
Jan Awgust Sykora spisa cyły rjad nabožinskich a popularnohistoriskich knihow, kotrež wuda zwjetša w rjedźe Serbskeho lutherskeho knihowneho towarstwa. Jeho basnje wostachu we wšelakich časopisach rozbrojene.
Sykora bě subsenior Lipšćanskeho Serbskeho prědarskeho towarstwa a wot lěta 1861 čłon Maćicy Serbskeje. Jako farar reprezentowaše pozdźišo konserwatiwne křidło serbskeho ewangelskeho duchownstwa a wustupi 1886 jako protest přećiwo rěčnej swojotnosći a kritiskej křesćanskosći Jana Radyserba-Wjeloweje knihi „Trójniki“ z Maćicy. Awtobiografiski spis, w kotrymž wopisa Sykora žiwjenske wobstejnosće Malešanskeje wulkoburskeje swójby, wuda Ota Wićaz w lěće 1936 pod titulom W Malešecach před 100 lětami.
Jeho narowny kamjeń steji při južnej fasadźe Smělnjanskeje ewangelskeje cyrkwje swj. Jana.