Ñemboyke piresa'ýre
From Wikipedia, the free encyclopedia
Ñemboyke piresa'ýre oñepyrũ oñembovaivévo pe temiandu he'íva oĩ tapicha atýra imba'eguasuvéva ha omoheñói upéicha tembiapo oñemboyke térã omoha'eñóva umi hesegua'ỹvape. Ñemboyke piresa'ýre he'ise avei pe mbo'epy avakuaatyguigua ha jokuaikuaa remimo'ã oúva ko temiandúgui.[1][2][3][4] He'iháicha pe Tetãnguéra Amandaje Oipe'aséva Ñemboyke Piresa'ýre Opaichagua oñemoañete va'ekue ONU Amandaje Guasúpe ára 21 jasypakõi 1965:
«pe mbo'eha he'íva ituichaveha umíva irrása oikoéva ijapu hína tembikuaaty rupive, iñaña hína tekoporã rupive, ndahekojojái hína avano'õkuaa rupive ha ikatu oporombohasa asy, ha [...] ndaipóri mba'eve mba'ekuaarãme térã aporekópe ikatúva he'i iporãha, taha'e ha'éva, ñemboyke piresa'ýre».[5]
Pe vorekue peteĩha oĩva tetãnguéra amandaje oipe'aséva ñemboyke piresa'ýre opaichagua kuatiápe he'i ñemboyke piresa'ýre he'iseha:
«Oimeraẽ tekoavy, ñemosẽ, ñesãmbyky térã jeporavo ojejapóva rrása, piresa'y, ñemoñare téra tetã ha tekoha ypy rupive, omomba'eveséva térã omomichĩséva tekoiterape yvypórape guarã ha tekosãso tenondeguaitéva jehechakuaa, jepuru térã apo oikóva tekojojápe ha ojejapóva jokuaikuaa rekópe, avano'õ, arandupy térã oimeraẽ jeiko ambuéva maymáva renondépe».[6]
Vorekue 1ha
Umi tembiapo, temimo'ã ha tekorã oñemboykéva piresa'ýre omoĩ sãmbyhyha rysýi umi tapicha atýra apytépe, taha'e ha'éva ojehechaukávo opavavépe térã ojejapóvo kañyhápe, ha upéicha he'i iporãha oĩrõ tapichakuéra atýra ipokatuvéva térã orekovéva tekoiterape. Buraschi ha Aguilar he'i ñemboyke piresa'ýre "ojehechaukaha heta temimo'ã, ñemongeta ha tembiapo rupive oporombogueséva, otakýva, oporomboykéva, oporomoha'eñóva, oporomomba'aporeíva, orairõva ha oporomosẽva”.[7]
Ojejoko hag̃ua ñemboyke piresa'ýre, ONU omboguata 1965 jave pe Tetãnguéra Amandaje Oipe'aséva Ñemboyke Piresa'ýre Opaichagua, ha upe rire omoĩ ára 21 jasyapy Ñemboyke Piresa'ýre Ñemboguete Ára Yvoragua ramo.