A Sainte-Chapelle é unha capela gótica situada na Île de la Cité no centro de París (Francia), construída no século XIII por Lois IX. Foi proxectada en 1241, iniciada en 1246 e concluída moi axiña, sendo consagrada en abril de 1248. Está considerada unha das obras principais do período radiante da arquitectura gótica. Foi construída para acoller as reliquias adquiridas polo rei Lois IX, polo que foi considerada coma un enorme relicario. As paredes foron substituídas por grandes fiestras que filtran a luz grazas ás vidreiras polícromas.