O río Sumapaz é un río colombiano que discorre polos departamentos de Cundinamarca e Tolima. O seu nome débese ao seu lugar de nacemento a 4710 metros de altitude no Páramo de Sumapaz, o de maior extensión a nivel mundial; situado en zona rural de Bogotá. É un dos principais afluentes do río Magdalena na parte alta da súa conca. No período español coñeceuse como río Fusagasugá con 200 km de lonxitude, xunto cos seus afluentes, os ríos: Pilar, Gobernador, Bejucal, San Juan, Negro, Guavio, Batán, Juan Viejo, Corrales, Bosque, Colorado, Barroblanco, Subia ou Chocho, Panche e Pagüey; todos eles, agás o último nacen no Páramo de Sumapaz e de San Fortunato. O val de Fusagasugá salienta polo seu clima e os cerros que o rodean. Alí existiu a lagoa de Fusagasugá de 100 km², que probablemente se desbordou cara ao val de Melgar.