Patinaxe

A patinaxe é unha actividade recreativa e deportiva consistente en deslizarse sobre unha superficie regular mediante uns patíns colocados nos pés. Como deporte pódese dividir, atendendo á superficie utilizada para patinar, en dúas grandes categorías:

Rollerskaters en París.

Patinadora en Roma realizando un soul grind.

Patinaxe sobre xeo

Artigo principal: Patinaxe sobre xeo.

Lévase a cabo sobre unha superficie de xeo, ben sexa natural ou artificial. No caso da superficie artificial, utilízanse recintos pechados chamados pavillóns ou palacios de xeo que poden contar con bancadas para acoller competicións deportivas das diversas especialidades de patinaxe sobre xeo.

Nos últimos tempos estanse popularizando as chamadas pistas de "xeo sintético" (que consiste nunha superficie de polietileno que permite patinar con patíns de coitelas, independentemente do clima ou da época do ano). Non é o mesmo, pero parécese moito.

Patinaxe sobre rodas

Practícase sobre superficies distintas do xeo, polo xeral de asfalto, formigón, terrazo ou parqué que, á súa vez, pode ter unha capa de rodadura en material plástico (poliuretano, resina sintética etc.). O deporte da patinaxe sobre rodas pódese desenvolver en lugares específicos, como pistas ou circuítos; ou ben en lugares non específicos habilitados para a ocasión (como acontece nas rúas ou estradas nas probas de larga distancia).

Os patíns de rodas poden ser de dos tipos: o clásico, coñecido tamén como quad, que ten catro rodas colocadas por parellas en dous eixes;e o patín en liña, que ten unha disposición similar a dos patíns de xeo; substituíndo a coitela por unha prancha que sostén un número variable de rodas (entre tres e cinco) situadas unha a continuación doutra. Estas rodas teñen un diámetro variable entre 76 e 100 milímetros, e pode darse o caso de pranchas deseñadas para aloxar rodas de varios tamaños. A comezos do ano 2000 utilizouse unha variante dos patíns clap que actualmente están en desuso.

Especialidades deportivas da patinaxe

Pista de patinaxe en Sada.

Patinaxe sobre xeo

• Hóckey sobre xeo
• Patinaxe artística sobre xeo
• Patinaxe de velocidade sobre xeo

Patinaxe sobre rodas

• Hóckey a patíns
• Hóckey sobre patíns en liña
• Patinaxe artística sobre rodas
• Patinaxe de velocidade sobre patíns en liña
• Patinaxe agresiva
• Patinaxe de rúa

Skate

O Skate ou skateboarding é unha modalidade de patinaxe inventada en California (Estados Unidos) e que consiste en deslizarse en riba dun monopatín (tamén coñecido como skateboard ou skate) sobre calquera superficie que se encontre pola rúa pola cal sexa posíbel facelo, ou tamén sobre pistas especialmente deseñadas para facelo, os skateparks ou pistas de skate.

As persoas que practican este deporte son chamadas skaters e os obxectivos desta práctica son variados: o simple lecer, a arte e beleza plástica, a profesional, ou simplemente como medio de transporte. Nas interpretacións do skate como actividade recreativa, artística e profesional, o obxectivo non é outro que o de procurar a beleza no manexo do monopatín executando manobras de diferente grao de dificultade. O seu carácter en principio non competitivo fai que sexa catalogado moitas veces como deporte libre.

O skate é unha práctica sobre todo urbana, razón pola cal se relacionou moi estreitamente coa cultura de rúa e urbana e, dado que os seus practicantes adoitan ser de idade moi nova, coa cultura xuvenil. É especialmente intensa a relación co mundo do punk, chegándose mesmo a desenvolver o denominado skate punk. Segundo un informe da American Sports, en 2002 existían 18,5 millóns de skaters, dos cales o 85% eran menores de 18 anos e o 74% de xénero masculino.