Caleta de Sebo

Caleta de Sebo (tamén chamada Caleta del Sebo) é unha localidade situada na parte suroriental da illa canaria de La Graciosa, que pertence administrativamente ao concello lanzaroteño de Teguise, na provincia das Palmas, España. Situado a 1,2 quilómetros da illa de Lanzarote, Caleta de Sebo é o principal núcleo de poboación de La Graciosa e, por iso, é considerada a capital de facto da illa.

Caleta de Sebo.

Historia

A orixe da poboación remóntase ao século XIX. En 1861 o Goberno permite á empresa anglo-española Cappa y Maqueda o establecemento dunha factoría de salgadura de peixe. Este establecemento implicou a construción dos almacéns e as primeiras casas da illa. A finais do século XIX, co afán por establecer as pesqueiras canario-africanas na illa, formouse a aldea de Caleta de Sebo.^[1]​

Demografía

Tiña unha poboación de 733 habitantes en 2019, o que representa a práctica totalidade da poboación da illa de La Graciosa, que contaba no mesmo ano con 737 habitantes.

Variación demográfica^[2] de Caleta de Sebo

2000	2001	2002	2003	2004	2005	2006	2007	2008	2009	2010	2011	2012	2013	2014	2015	2016	2017	2018	2019
626	615	624	617	628	635	656	638	646	642	657	653	663	679	696	718	743	748	730	733

Economía

As súas principais actividades económicas son a pesca e o turismo.

Comunicacións

Posúe un porto que comunica La Graciosa coa localidade lanzaroteña de Órzola, no concello de Haría.

Lugares de interese

En arquitectura destaca a igrexa parroquial da localidade, a Igrexa da Nosa Señora do Carme, tamén chamada Virxe do Mar, patroa da illa de La Graciosa e de Caleta de Sebo. Cada 16 de xullo realízase a tradicional procesión marítima da Virxe.

Notas

1. "Plan Rector de Uso y Gestión del Parque Natural del Archipiélago Chinijo" (PDF). Goberno de Canarias. 2005. Consultado o 18 de maio de 2016.
2. "Instituto Nacional de Estadística". Arquivado dende o orixinal o 22 de maio de 2011. Consultado o 31 de outubro de 2011.

Véxase tamén

• Casas de Pedro Barba