Knight Lore

Knight Lore é un videoxogo desenvolvido por Ultimate para o ZX Spectrum en 1984 dentro da serie Sabreman tras Sabre Wulf e Underwurlde, a diferenza deles empregou unha perspectiva isométrica, o que constituíu unha grande innovación na época e que nos permite ter unha visión tridimensional de todas as pantallas polas que pasamos. Tim Stamper e Chris Stamper foron os que escribiron o código do xogo. O éxito do xogo en Europa levou a que se realizaran versións para BBC Micro, Amstrad CPC, MSX e Famicom Disk System que xa non tiñan a limitación orixinal de limitarse a dúas cores polas especifidades do Sepctrum. En Knight Lore Sabreman, o protagonista da triloxía, pola acción dun feitizo transfórmase en home lobo co luar. A acción transcorre no castelo do mago Melkior onde Sabreman debe recoller os ingredientes para facer unha apócema que remate co feitizo. Os ingredientes débense verter na caldeira de Melkior nunha orde determinada, de non levar o ingrediente axeitado unha masa de estrelas obrigará a Sabreman a marchar do cuarto. Ademais dos ingredientes Sabreman ten que recoller unha serie de obxectos que son precisos para superar certos obstáculos.

Knight Lore
Desenvolvedor(es)	Irmáns Stamper
Distribuidora(s)	Ultimate Play The Game
Deseñador(es)	Irmáns Stamper
Lanzamento	7 de decembro de 1984
Xénero	videoxogo de plataformas
Modos de xogo	videoxogo para un xogador
Plataforma(s)	ZX Spectrum, Nintendo Entertainment System, Amstrad CPC, MSX e Family Computer Disk System
[ editar datos en Wikidata ]