Estadio Nuevo Colombino

O Nuevo Colombino é o estadio de fútbol do Recreativo de Huelva, decano do fútbol español. Foi inaugurado oficialmente o 8 de novembro de 2001 e substituíu o antigo Estadio Colombino ou Estadio Municipal que se atopaba emprazado na barriada de Isla Chica desde 1957.

Estadio Nuevo Colombino
Datos
Coordenadas	37°14′47″N 6°57′15″O
Localización	Huelva, España
Construción
Inauguración	8 de novembro de 2001
Arquitecto	Joaquín Aramburu
Estadio
Superficie	Céspede natural
Dimensións	105 x 68
Capacidade	21.670
Propietario	Concello de Huelva
Operadora	Huelva
Localía	Recreativo de Huelva
Eventos
Partidos internacionais amigables
[ editar datos en Wikidata ]

Historia

O estadio foi proxectado polo arquitecto onubense Joaquín Aramburu cun orzamento de 14 millóns de euros e a cargo da empresa AZAGRA. Está situado na marxe da ría de Huelva, na actual Avenida do Decano (anteriormente Avenida de Francisco Montenegro). Foi deseñado para revitalizar a zona do porto coñecida como Barriada de Pescadería e para ofrecer ao seu titular, o Recreativo de Huelva, un estadio moderno e funcional acorde coas expectativas deportivas sobre o club. Dáse a casualidade que eses terreos foron os mesmos nos que se comezou a xogar ao fútbol na cidade alá polo século XIX.

Vista desde a Ría de Huelva

Vista da tribuna desde a praza principal.

A súa capacidade é de 21.670 espectadores sentados, incluíndo así mesmo trinta e dous palcos privados e setenta e dúas prazas en cabinas de prensa, sala de prensa de 110 metros cadrados, ximnasio de 226 metros cadrados e grandes vestiarios. Destaca nesta construción a súa tribuna principal, á que se accede desde o exterior a través dunha praza alta con vistas á ría e na que se atopan os despachos de billetes, a tenda oficial e un restaurante. No interior esta tribuna aparece cuberta por unha visera que cobre tanto a parte media como a alta. Na actualidade está en marcha un proxecto de ampliación do novo estadio, obra proxectada polo arquitecto Joaquín Aramburu e Francisco Botella, que permitirá que o campo conte con 5.000 novas localidades, pasando de 21.670 espectadores a 26.670.

Inauguración

A tribuna, dando as costas á ría de Huelva, dispón na súa traseira dunha praza de lecer.

O Nuevo Colombino foi inaugurado oficialmente o 8 de novembro de 2001 nun partido entre o Recreativo de Huelva e o Newcastle inglés, no que o equipo onubense venceu por tres goles a cero, dous de Pavón e outro de Canterla. Poucos días despois a selección española xogou un partido amigable ante a de México dirixida por Javier Aguirre, á que venceu por un gol a cero, obra de Raúl. O primeiro partido oficial de liga xogouse o día 6 de xaneiro dese ano (xusto 71 anos logo da apertura do primeiro estadio recreativista, o Velódromo).

Véxase tamén

Ligazóns externas

• Sitio web do Recreativo