Betuláceas

Betulaceae, as Betuláceas, son unha familia da orde das fagais. Está composta por árbores ou arbustos dicotiledóneos caducifolios e monoicos que se atopan en rexións temperadas e zonas de montaña nos trópicos. A ela pertencen os amieiros e os bidueiros.

Betuláceas (Betulaceae)
O carpe (Carpinus betulus)
Clasificación científica
Reino: Plantae Subreino: Tracheobionta División: Magnoliophyta Clase: Magnoliopsida Subclase: Hamamelidae Orde: Fagales Familia: Betulaceae
Xéneros
Véxase no texto
Sinonimia
Carpinaceae Corylaceae

No pasado, esta familia estaba dividida en dúas, Betulaceae (Alnus e Betula) e Corylaceae (o resto); porén, estudos recentes no Angiosperms Phylogeny Group, levaron a incluír a antiga familia Corylaceae dentro das Betulaceae.

Descrición

Posúen follas simples, alternas, con estípulas caedizas. Flores masculinas con perianto sinxelo, en grupos de 3 na axila dunha bráctea, dispostas en candeas pénsiles. Flores femininas sen perianto, de xineceo ínfero bicarpelar, en grupos de 2 ou 3 na axila dunha bráctea, dispostas en candeas dereitas. As brácteas florais están acompañadas por xeralmente dúa bractéolas. Polinización anemófila. Froitos en núcula aplanada, a miúdo con ás, situados nunha infrutescencia estrobiliforme formada polas brácteas e bractéolas acrecidas e endurecidas. Arredor de 70 a 157 especies repartidas en 6 xéneros (véxase cadro), a meirande parte naturais dos países temperados do hemisferio norte.

Xéneros

• Alnus, os amieiros.
• Betula, os bidueiros.
• Carpinus, os carpes.
• Corylus, as abeleiras.
• Ostrya, os carpes lupulinos.
• Ostryopsis, os carpes abeleiras.
• Palaeocarpinus.

Véxase tamén

Ligazóns externas

Wikimedia Commons ten máis contidos multimedia na categoría:  Betuláceas

Wikispecies posúe unha páxina sobre:  Betuláceas