Allen & Unwin

Allen & Unwin is in Australyske útjouwerij, dy't yn 1990 fuortkommen is út 'e oarspronklike, Britske útjouwerij George Allen & Unwin, bekend as de útjouwer fan 'e wurken fan J.R.R. Tolkien.

Allen & Unwin
algemien
hist. namme	George Allen & Unwin Australia
nasjonaliteit	Australysk
type	privaat
sektor	útjouwerij
haadkertier	Crows Nest (Nij-Súd-Wales)
oprjochte	1976
fuortk. út	George Allen & Unwin
offisjele webside
www.allenandunwin.com

Skiednis

De Australyske ôfdieling fan 'e Britske útjouwerij George Allen & Unwin waard yn 1976 oprjochte, ûnder de namme fan George Allen & Unwin Australia Ltd. Doe't de memme-ûndernimming yn 1990 oernommen waard troch HarperCollins Publishers, koe de Australyske difyzje himsels útkeapje, en waard it in selsstannige útjouwerij ûnder de ferienfâldige namme Allen & Unwin.

Sûnt hat it bedriuw him ûntjûn ta ien fan 'e súksesfolste ûnôfhinklike útjouwerijen fan Austraalje, en bringt it jiers oant 250 nije titels út. Dêrby giet it sawol om literêre en kommersjele fiksje as om non-fiksje, lykas biografyen, autobiografyen, skiednis, misdie, polityk en reisferhalen, mei dêropta ek berneboeken.

It haadkantoar fan Allen & Unwin is fêstige yn Crows Nest, by Sydney, mar it bedriuw hat ek kantoaren yn Melbourne, Auckland (yn Nij-Seelân) en Londen (yn Ingelân). Fierders fertsjintwurdiget Allen & Unwin ferskate ûnôfhinklike Britske útjouwerijen op 'e Australyske en Nijseelânske merk, wêrûnder Bloomsbury Publishing, Faber & Faber, Profile Books, Serpent's Tail, Atlantic Books en Canongate Books. Troch dy oerienkomst waard bgl. de distribúsje fan 'e Harry Potter-rige fan Bloomsbury yn Australaazje dien troch Allen & Unwin.

Keppelings om utens

• (in) Offisjele webside fan Allen & Unwin

Boarnen, noaten en referinsjes